ۇلى دالا ۇلاعاتى
اق تۇيەنىڭ قارنى جارىلىپ, سامارقاننىڭ كوك تاسى ءجىبىپ, كۇن مەن ءتۇندى تەڭەلتكەن ءاز-ناۋرىز مەيرامىنا وراي «استانا» كونتسەرت زالىندا «ۇلى دالا ۇلاعاتى» اتتى تەاترلاندىرىلعان مۋزىكالىق قويىلىم ءوتتى. ۇلتىمىزدىڭ سالت-داستۇرلەرى كورسەتىلگەن اسەرلى كەشتى استانا قالاسى مەملەكەتتىك اكادەميالىق فيلارمونياسى «رۋحاني جاڭعىرۋ» باعدارلاماسى اياسىندا ۇيىمداستىردى.
«باتامەن ەر كوگەرەر, جاڭبىرمەن جەر كوگەرەر» دەيتىن حالقىمىز ءاربىر ءىستى باستاردا ابىزداردان, ەل ىشىندەگى سىيلى اقساقالداردان, تانىمال تۇلعالاردان باتا تىلەيدى. جىل باسى – ناۋرىز مەرەكەسى كەلگەندە دە بەرىلەتىن باتالار بار. باتا بەرۋ كورىنىسىمەن اشىلعان كەش بالانىڭ دۇنيەگە كەلگەنىنەن باستاپ, ءومىردىڭ ءارتۇرلى كەزەڭدەرى جاسالاتىن, ۇلتتىق تانىم-ءتۇسىنىكپەن تىكەلەي بايلانىستى ءجون-جورالعىلارىمىزدى كورسەتۋمەن جالعاستى.
استانادا وتكەن كۇيشى, كومپوزيتور, ديريجەر مۇحامەتقالي ءتىناليننىڭ «شىلدەحانا, بەسىك توي, تۇساۋكەسەر, سۇندەت توي» دەپ قايىرىلاتىن «ءبىزدىڭ دالا» اتتى بەلگىلى ءانى بار. بۇل تۋىندى وتكەن عاسىردىڭ سەكسەنىنشى جىلداردىڭ اياعى, توقسانىنشى جىلداردىڭ باسىندا, سالت-ءداستۇرلەرىمىز ورتامىزعا قايتا ورالىپ جاتقاندا جازىلدى. «ۇلى دالا ۇلاعاتى» قويىلىمىندا شىلدەحانادان باستاپ, ءارى قاراي اندە ايتىلاتىن راسىمدەر رەت-رەتىمەن كورسەتىلدى.
اراسىندا اسەم اندەر اۋەلەپ, كۇيلەر كۇمبىرلەدى. وسى كەشتىڭ وتۋىنە مۇرىندىق بولعان فيلارمونيانىڭ قازاق وركەسترىنىڭ كوركەمدىك جەتەكشىسى-باس ديريجەرى, قازاقستاننىڭ ەڭبەك سىڭىرگەن قايراتكەرى ايتقالي جايىموۆتىڭ «بەسىك جىرى», «تويباستار» شىعارمالارى ورىندالدى. بۇعان قوسا, تاتتىمبەت قازانعاپۇلىنىڭ «سىلقىلداق», دينا نۇرپەيىسوۆانىڭ «اسەم قوڭىر» كۇيلەرى, ەۆگەني برۋسيلوۆسكيدىڭ «شاشۋ» شىعارماسى, ت.ب. حالىق كومپوزيتورلارىنىڭ تۋىندىلارى توگىلدى.
كۇنى كەشە عانا «كورىسۋ» نەمەسە «امال» مەرەكەسىن اتاپ وتتىك. كەشتە وسى داستۇرمەن قاتار, جاستاردىڭ ايدىڭ جارىعىمەن ساۋىق-سايران قۇرىپ, اقسۇيەك ويناۋى قامتىلدى. كەلىن تۇسىرگەندە «بەتاشار», «جار-جار» ايتىلاتىنى انىق. ونى دا كوردىك.
كورىنىستەرگە قازاقستاننىڭ ەڭبەك سىڭىرگەن قايراتكەرى گۇلزيرا بوكەيحان, مادەنيەت سالاسىنىڭ ۇزدىكتەرى سەكەن سىزدىق, نۇراي تاناباەۆ, كۇنسۇلۋ تۇرلىبەكوۆا, حالىقارالىق جانە رەسپۋبليكالىق بايقاۋلاردىڭ لاۋرەاتتارى دانيار مۇقان, جازگۇل داڭىلباەۆا, جاقسىگەلدى ماياساروۆ, شاھريزادا تىنىشتىق, فيلارمونيانىڭ باسقا دا ارتىستەرى قاتىسىپ, ءان شىرقادى. سالت-ءداستۇرلەرىمىزدىڭ ءمان-ماعىناسىن اشقان كەش تامىرىمىزدىڭ تەرەڭ ەكەنىن تانىتتى.