استانادا تۇڭعىش رەت ەرلەر مەن قىزدار كوماندالارى اراسىندا شاحماتتان وتكەن الەم چەمپيوناتى ءوز مارەسىنە جەتتى.
جاھاننىڭ كىل مىقتىلارى باقتارىن سىناعان بايراقتى باسەكەدە قازاقستاننىڭ نامىسىن قورعاعان, قۇرامىندا جانسايا ابدىمالىك, دينارا سادۋاقاسوۆا, ءبيبىسارا اساۋباەۆا, گۇلىسحان ناحباەۆا مەن گۇلميرا داۋلەتوۆاداي ويىنشىلارى بار قىزدار كومانداسى توعىزىنشى كەزەڭدە ءۇندىستان, اقش, ارمەنيا, ۆەنگريا مەن ەگيپەت كوماندالارىنان باسىم ءتۇسىپ, جالپى ەسەپتە بەسىنشى ورىنعا تابان تىرەدى.
جالپى, قىزدار اراسىنداعى تارتىستا قىتاي كومانداسى كوش باستاسا, رەسەي ەكىنشى ورىندى, گرۋزيا ءۇشىنشى ورىندى, ۋكراينا ءتورتىنشى ورىندى ەنشىلەدى. ال ۇزدىك بەستىكتى تۇيىندەگەن قازاقستان ازداعان ۇپاي ساندارىمەن ءۇندىستاندى التىنشى ورىنعا ىعىستىردى. اقش, ارمەنيا, ۆەنگريا, ەگيپەت كوماندالارى سوڭعى ورىنعا تۇراقتادى.
ال كوماندا ساپىندا رينات جۇماباەۆ, ءانۋار ىسماعامبەتوۆ, مۇرتاس قاجعالەەۆ, دەنيس ماحنەۆ, پەتر كوستەنكو ونەر كورسەتكەن قازاق جىگىتتەرى چەمپيوناتتى قىتاي شاحماتشىلارىمەن قورىتىندىلادى.
الايدا الاڭ يەلەرى جەكەلەگەن ماتچتاردا جاقسى ناتيجە كورسەتكەنمەن, وليمپيادا چەمپيوندارىنا 1,5:2,5 ەسەبىمەن جول بەرىپ, سەگىزىنشى ورىندى مىسە تۇتتى.
جالپى كوماندالىق ەسەپتە رەسەي ءبىرىنشى ورىندى قانجىعالاسا, ەكىنشى ورىندى ۇلىبريتانيا, ءۇشىنشى ورىندى قىتاي, ءتورتىنشى ورىندى ءۇندىستان ەرلەرى ەنشىلەدى. ۇزدىك بەستىكتى اقش تۇيىندەسە, شۆەتسيا مەن ەگيپەتتىڭ الدىن وراعان قازاقستان يران مەن ازەربايجاننان كەيىنگى ورىنعا جايعاستى.
