مەملەكەت باسشىسى نۇرسۇلتان نازارباەۆ ەلوردانىڭ ەسىل اۋدانىنان ورىن تەبەتىن جاڭا مەشىتتىڭ العاشقى ىرگەتاسىن قالادى.
بۇل نىسان ەكسپو قالاشىعىنىڭ جانىنداعى جاڭا ساياباق اۋماعىندا بوي كوتەرەدى. ونىڭ جالپى اۋماعى 57 مىڭ شارشى مەتردى الىپ, كولەمى بوتانيكالىق ساياباقتان دا ۇلكەن بولادى. مۇنارانىڭ بيىكتىگى 130 مەترگە, كۇمبەز ديامەترى 63 مەترگە جەتپەك.
– مۇندا ورتالىق ازيادا تەڭدەسى جوق ساۋلەتتى, بىرەگەي مەشىت سالىنادى. بۇل جوبا مەملەكەتتىك بيۋدجەت ەسەبىنەن جۇزەگە اسىرىلمايدى. قۇرىلىس جۇمىستارىن ورىنداۋ ءۇشىن ارنايى قور قۇرىلىپ, وعان باسقا دا قازاقستاندىقتار قول ۇشىن سوزا الادى. مەن تاۋەلسىزدىك جىلدارىندا تابىسقا جەتىپ, بۇگىندە وسى يگىلىكتى ىسكە اتسالىسىپ وتىرعان بارلىق بيزنەسمەنگە العىسىمدى بىلدىرەمىن, – دەدى ەلباسى.
سونداي-اق پرەزيدەنت بۇل عيمارات تەك قۇلشىلىق ەتەتىن ورىن عانا ەمەس, تۋريستەردى تارتاتىن جاڭا ورتالىققا اينالاتىنىن جەتكىزدى.
30 مىڭ ادامدى سىيدىرا الاتىن ءدىني كەشەندە يسلام مۇراجايى, كىتاپحانا, قولونەر شەبەرحاناسى جانە باسقا دا مەكەمەلەر ورنالاسادى.
