استانانىڭ 20 جىلدىعىنا وراي مادەنيەت جانە سپورت مينيسترلىگى مەن ۇلتتىق سپورت فەدەراتسياسىنىڭ ۇيىمداستىرۋىمەن «ۇلى دالا رۋحى» فەستيۆالى جالاۋىن جەلبىرەتىپ, ەل سپورتشىلارى الامان بايگە مەن تەڭگە ءىلۋ, جامبى اتۋ سياقتى سپورت تۇرلەرىنەن سايىسقا ءتۇستى.
جامبى اتۋ سپورتى بويىنشا قۇرالايدى كوزگە اتقان تۇركىستاندىق سۇر مەرگەندەر جەڭىس تۇعىرىنان كورىندى. ال ەكىنشى ورىندى شىعىس قازاقستان وبلىسىنىڭ مەرگەندەرى ەنشىلەسە, قولا جۇلدە اقتوبەلىكتەرگە بۇيىرىپ, ۇزدىك تورتتىكتى اقمولا وبلىسىنىڭ مەرگەندەرى قورىتىندىلادى.
تەڭگە ءىلۋ سايىسىندا دا تۇركىستان وبلىسى سپورتشىلارىنىڭ اسىعى الشىسىنان ءتۇستى. ەكىنشى ورىندى بقو, ءۇشىنشى ورىندى اقمولا وبلىسى, ءتورتىنشى ورىندى قاراعاندى وبلىسى يەلەندى.
ال 16 شاقىرىمدىق بايگەدە 28 سايگۇلىك اراسىنان وزا شاپقان الماتى وبلىسىنىڭ لاشىن اتتى تۇلپارى كومبەنى ءبىرىنشى بولىپ كەستى. ەكىنشى, ءۇشىنشى, بەسىنشى ورىندار دا الماتى وبلىسىنىڭ ەنشىسىنە بۇيىردى. اقمولا وبلىسى ءتورتىنشى ورىنعا تابان تىرەدى.
سونداي-اق «قازانات» اتشابارىن شاڭعا بوكتىرگەن 25 شاقىرىمدىق الامان بايگە دە جانكۇيەردى قيقۋعا باستىرىپ, ءدۇبىرلەتىپ ءوتتى. بۇل جارىستا دا الماتى وبلىسىنىڭ تۇلپارى قارا ءۇزدى. سونىمەن قاتار ءتورتىنشى جانە بەسىنشى ورىندار دا وسى وبلىستىڭ جۇلدە قورجىنىن تولىقتىردى. ەكىنشى ورىن جامبىل وبلىسى, ءۇشىنشى ورىن استانا قالاسىنا بۇيىردى. جەڭىمپازدار مەن جۇلدەگەرلەر اقشالاي سىيلىقتارمەن ماراپاتتالدى.
