«ۇرەيلەنۋ» ەزۋگە كۇلكى ۇيىرەدى

1 شىلدەدە استانا تويىنا ارنالعان «ساحنادان سالەم!» حالىقارالىق تەاتر فەستيۆالى ءوز شىمىلدىعىن اشادى. كۇن سايىن قالالىق تەاتر ساحنالارىندا تۇركيا, رەسەي مەن قازاقستان شىعارماشىلىق ۇجىمدارىنىڭ سپەكتاكلدەرى قويىلادى. باس قالاعا بارلىعى توعىز تەاتر ترۋپپاسى كەلەدى.

ولاردىڭ ىشىندەگى ەڭ ايتۋلىسى – تۇركيا مەملەكەتتىك تەاترىنىڭ «مەراكي» (قازاق تىلىنە اۋدارعاندا – «ۇرەيلەنۋ») قويىلىمى. بۇل – ءومىرى ۇرەيلەنىپ ءجۇرىپ, اقىرى, ءتۇرلى كۇلكىلى وقيعالارعا تاپ بولاتىن ادام جايىنداعى اسەرلى ءارى جايدارى كومەديا. كەيىپكەر اينالاداعى بار نارسەگە الاڭدايدى, ءار نارسەنى بىلگىسى كەلەدى. سوڭىندا بويىن بيلەگەن قورقىنىش پەن سەزىمى ونى تىعىرىققا تىرەيدى.

تاعى ايتا كەتەرلىگى, مەرەكە كۇندەرى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترى ساحناسىندا ج.ايماۋىتوۆ اتىنداعى قازاق مۋزىكالىق-دراما تەاترى (پاۆلودار) – «اپكەنىڭ الەگى», ماڭعىستاۋ قۋىرشاق تەاترى – «سدوبنايا ليزا – ناستوياششايا كوشكا» قويىلىمىمەن, ا.يمانباەۆانىڭ تەاترلاندىرىلعان مۋزىكالىق ورتالىعى (الماتى) «مەدەيا» قويىلىمدارىن ۇسىنادى. ال م.گوركي اتىنداعى مەملەكەتتىك اكادەميالىق ورىس دراما تەاترى ساحناسىندا م.گوركي اتىنداعى مەملەكەتتىك رەسپۋبليكالىق ورىس دراما تەاترى (رەسەي, داعىستان, ماحاچكالا) – «ودولجيتە تەنورا!», قوستاناي وبلىستىق ورىس دراما تەاترى – «حوديات سلۋحي», اقمولا وبلىستىق ورىس دراما تەاترى – «ەديت پياف», س.قوجامقۇلوۆ اتىنداعى قازاق مۋزىكالىق-دراما تەاترى (جەزقازعان) «ءابىلمانسۇر» سپەكتاكلدەرىن ۇسىنادى. وقۋشىلار سارايىنداعى جاستار تەاترى ساحناسىنان كورەرمەن تۇركيا مەملەكەتتىك تەاترىنىڭ «Meraki», ع.مۇسىرەپوۆ اتىنداعى بالالار جانە جاسوسپىرىمدەر تەاترىنىڭ (الماتى) «كۇشىك كۇيەۋ» كومەديالارىن تاماشالاي الادى.

حالىقارالىق تەاتر فەستيۆالى اياسىندا استاناعا بارلىعى 204 اكتەر كەلەدى. ولاردىڭ ويىنىن اشىربەك سىعاي, وفەلىك گالينا ۆەربيتسكايا, امانكەلدى مۇقان سياقتى تەاتر سىنشىلارى باعالايدى.

مەرەكە قارساڭىندا استانا تەاترلارى بىرقاتار قويىلىمداردىڭ تۇساۋىن كەسپەك. ماسەلەن, ق.قۋانىشباەۆ اتىنداعى قازاق مۋزىكالىق-دراما تەاترى «ءتىل تابىسقاندار» كومەدياسىن ساحنالايدى. قويىلىم اۆتورى – قىرعىز دراماتۋرگى مار بايجيەۆ, رەجيسسەرى – بولات ۇزاقوۆ. م.گوركي اتىنداعى ورىس دراما تەاترى يزرايلدىق لەون اگۋليانسكيدىڭ «تورعايدىڭ ۇياسى» تراگەدياسىن ۇسىنباق. قويۋشى رەجيسسەرى – بەكبولات پارمانوۆ. جاستار تەاترى ساحناسىندا «جەر مەن كوكتىڭ اراسى» قويىلىمى كورسەتىلەدى.

استانا قالاسى قۋىرشاق تەاترى «مەرەكە» قويىلىمىن ساحنالايدى.