قازىر بۇقارالىق سپورتقا بەت بۇرعان جۇرتتىڭ قاتارى كوبەيىپ كەلەدى. ونى ەلوردالىقتاردىڭ ترياتلون جارىستارىنا قاتىسۋعا ەرەكشە ىنتا تانىتۋىنان بايقاۋعا دا بولادى. استانادا اشىلعان ترياتلون پاركى كوپشىلىكتىڭ سپورتپەن شۇعىلدانۋىنا تاپتىرمايتىن ورىنعا اينالدى. وتكەن سەنبى, جەكسەنبى كۇندەرى بۇل جەردە ءبىر توپ كاسىبي جانە اۋەسقوي سپورتشىلار قر كۋبوگىنىڭ ءۇشىنشى كەزەڭىندە باق سىنادى.
سپورتتى ءومىر سالتىنا اينالدىرعان قاراپايىم ادامداردىڭ سىنعا تۇسەتىن ءبىر جارىسى – وسى ترياتلون. ويتكەنى بۇل سپورت تۇرىندە قاتىسۋشىلار ءبىر ەمەس, ءۇش بىردەي سايىستان: جۇزۋدەن, جۇگىرۋدەن جانە ۆەلوجارىستان جۇيرىك بولۋ كەرەك. ءبىر قىزىعى, مۇنداي جارىستاردا كاسىبيلەردەن گورى, اۋەسقويلار ءجيى بوي كورسەتەدى. مىسالى, 17-18 ماۋسىم كۇندەرى استانادا ترياتلوننان وتكەن قر كۋبوگىنىڭ العاشقى كۇنىندە 30 كاسىبي سپورتشى قاتىسسا, كەلەسى كۇنى 120 اۋەسقوي جارىستى.
بۇل ترياتلون سايىسىن ۇيىمداستىرۋعا قازاقستان ترياتلون فەدەراتسياسى, استانا قالاسىنىڭ دەنە شىنىقتىرۋ جانە سپورت باسقارماسى جانە قالالىق سپورتتىق-بۇقارالىق ءىس-شارالاردى وتكىزۋ ديرەكتسياسى مۇرىندىق بولدى.
– استانادا ترياتلوننان قر كۋبوگىنىڭ ءۇشىنشى كەزەڭى ءوتىپ جاتىر. بۇعان قاتىسۋعا نيەت بىلدىرگەندەردىڭ قاتارى كوپ. ءبىر ترياتلوندا ءۇش سپورت ءتۇرى بىرىكتىرىلگەن. بولاشاقتا استانادا اتالعان سپورت تۇرىنە دەگەن قىزىعۋشىلىق ارتا تۇسەدى دەپ ويلايمىز, – دەيدى استانا اكىمدىگىنىڭ سپورتتىق-بۇقارالىق ءىس-شارالاردى وتكىزۋ ديرەكتسياسىنىڭ باسشىسى ازامات يماشەۆ.قاتىسۋشىلار ەلدىڭ ءار وڭىرىنەن جينالدى. كاسىبي سپورتشىلار سۋپەرسپرينتتەن 10 شاقىرىم 300 مەتر قاشىقتىقتى باعىندىردى: 300 مەتر – ءجۇزۋ, 8 شاقىرىم – ۆەلوجارىس جانە 2 شاقىرىم – جۇگىرۋ.
ال 18 ماۋسىم كۇنى جالپى مەجە 25 شاقىرىم 750 مەتر قاشىقتىق بويىنشا سپرينتكە كاسىبيلەرمەن قاتار, اۋەسقويلار دا شىقتى. قاتىسۋشىلار 750 مەتر جۇزۋدەن, 20 شاقىرىم ۆەلوجارىس تۇرىنەن جانە 5 شاقىرىم جۇگىرۋدەن سىنعا تۇسەدى.
سۋپەرسپرينتتە باق سىناعان كاسىبيلەردىڭ اراسىنا ۇلتتىق قۇرامانىڭ جاس مۇشەسى دارىن قونىسباەۆ بارىنەن جۇيرىك بولدى. ودان كەيىنگى ورىندى الەكساندر اۆتۋشكو الدى. ال ۇزدىك ۇشتىكتى قر كۋبوگىنىڭ ەكىنشى كەزەڭىندە كوش باستاعان سەمەن پيۆوۆاروۆ تۇيىندەدى.
قىزداردان 24 سپورتشى جارىستى. ولاردىڭ اراسىنان اناستاسيا اۆتۋشكو جەڭىمپاز اتاندى. ەكىنشى ورىندى يانا موروزوۆا يەلەنسە, ءۇشىنشى ورىندى ارۋجان امانجولوۆا الدى.
ورىنبەك وتەمۇرات
