جاقىندا قازاقستان رەسپۋبليكاسى ۇلتتىق وليمپيادا كوميتەتىنىڭ باستاماسىمەن «التىن سامعاۋ-2019» ۇلتتىق سپورت سىيلىعىنىڭ يەگەرلەرى اتالدى. جىل بويى حالىقارالىق جارىستاردا ەل نامىسىن قورعاپ, جوعارى جەتىستىككە جەتكەن سپورتشىلار مەن باپكەرلەرگە قۇرمەت كورسەتىلدى.
ۇزدىكتەر 10 نوميناتسيا بويىنشا ىرىكتەلىپ, لاۋرەاتتار awards.olimpic.kz سايتىندا داۋىس بەرۋ ارقىلى تاڭدالعان. دەمەك, داۋىس بەرۋگە بارشاعا بىردەي مۇمكىندىك بەرىلگەن. جالپى ايتقاندا, ۇزدىكتەر تۇگەلدەي دۇرىس تاڭدالدى دەۋگە نەگىز بار.
دەگەنمەن ءبىر نوميناتسيادا ەكىۇداي پىكىر تۋىنداعانىن ايتقىمىز كەلەدى. ماسەلەن, «جازعى سپورت تۇرلەرى بويىنشا ۇزدىك باپكەر» سىيلىعىنا ەركىن كۇرەستەن ۇلتتىق قۇرامانىڭ باس باپكەرى اسەت سەرىكباەۆ لايىقتى دەپ تابىلىپتى. بىلە بىلسەك, بيىلعى وتكەن وليمپيادالىق سپورت تۇرلەرى بويىنشا الەم چەمپيوناتتارىنا (2019 جىلى 38 الەم چەمپيوناتى ءوتتى) قاتىسقان سپورتشىلارىمىزدىڭ اراسىنان ءبىر-اق سپورتشىمىز الەم چەمپيونى اتاعىن جەڭىپ الىپتى. ول – بوكسشى بەكزات نۇرداۋلەتوۆ! سونداي-اق بوكستان ۇلتتىق قۇراما جاقسى ناتيجە كورسەتكەنى (1 التىن, 1 كۇمىس, 4 قولا مەدال) بەلگىلى. مىنە, وسى تۇستا الەم چەمپيونىن دايىنداعان سپورتشىنىڭ باپكەرى نەگە ۇزدىك بولمادى دەگەن وي تۋىنداعان ەدى.
ال ەندى كۇرەسكە كەلەتىن بولساق, ەلوردامىزدا وتكەن الەم چەمپيوناتىندا كۇرەس تۇرلەرى بويىنشا 30 سالماقتا الەم چەمپيونى اتاقتارى ساراپقا سالىندى. جاقسى, جۇلدە الدىق, ليتسەنزيا الدىق. شىنىمىزدى ايتساق, قۋانعانىمىزبەن, ىشىمىزدە ءبىر وكىنىشتىڭ قالعانىن نەسىنە جاسىرايىق؟ ءسوزدىڭ توقەتەرى – التىن بولمادى, الەم چەمپيونى شىقپادى. سول باياعى جاقسىلىق ۇشكەمپىروۆ, داۋلەت تۇرلىحانوۆ, باقتيار بايسەيىتوۆتىڭ التىندارىن ەسكە الۋدان اسا المادىق. شىنى كەرەك, كۇرەس تۇرلەرىنەن الەم چەمپيونى اتاعىن سوڭعى رەت وسىدان 26 جىل بۇرىن محيتار مانۋكيان جەڭىپ العان ەكەن.
ويدى وي قوزعايدى. ۇزدىك سپورتشى مەن ۇزدىك باپكەر قالاي تاڭدالادى؟ نەگىزى, بۇل شەشىمدى ۇلتتىق سپورت فەدەراتسيالارىنىڭ باسشىلارى, ۇلتتىق قۇرامالاردىڭ باس باپكەرلەرى, سپورتتىق كوماندالاردىڭ كاپيتاندارى, سونىمەن قاتار سپورت جۋرناليستەرى جاساعان ءجون بولار ەدى دەپ ويلايمىز. ال ءبىر سايت ارقىلى ۇزدىكتى تاڭداۋ دۇرىس ەمەس سەكىلدى. ويتكەنى سايتتىڭ مالىمەتىن تۇزەتەتىن, كوبەيتەتىن, ازايتاتىن, ياعني «قۇلاعىن بۇرايتىن» مۇمكىندىگى بولادى. وسى جەردە كۇدىك تە, كۇمان دە بولۋىن ەسكەرگەن ءجون سياقتى.
«ۇزدىك سپورتشى» نەمەسە «ۇزدىك باپكەر» سىيلىقتارى الەم چەمپيونى بولعان سپورتشىعا نەمەسە الەم چەمپيونىن دايىنداعان باپكەرگە بەرىلمەسە, وندا مۇنداي سىيلىقتاردى بەلگىلى ءبىر سايتتىڭ ۇزدىگى دەپ اتاعانىمىز دۇرىس بولاتىن شىعار. كەلەشەكتە وسىنداي جاعدايلار ەسكەرىلسە ەكەن دەيمىز.
