ىنتىماقتاستىق جونىندە ىمىرالاستى
بۇرناعى كۇنى «استانا ەكسپو-2017» ۇلتتىق كومپانياسى مەن «پاراسات» ۇلتتىق عىلىمي-تەحنولوگيالىق حولدينگى جانە سولتۇستىك قازاقستان وبلىسىنىڭ اكىمدىگى اراسىندا ىنتىماقتاستىق تۋرالى مەموراندۋمعا قول قويىلدى. قۇندى قۇجاتتار تاراپتار اراسىنداعى ىنتىماقتاستىقتى ارتتىرىپ, كورمەگە قاجەتتى جوبالاردى جۇزەگە اسىرۋعا مۇمكىندىك بەرەدى.
مەموراندۋمعا سايكەس, «ەكسپو» كورمەسىندە قازاقستاندىق عالىمدار دۇنيەجۇزىلىك الدىڭعى قاتارلى تەحنولوگيالاردان ەش كەم تۇسپەيتىن ازىرلەمەلەرىن كورسەتە الادى. قازىردىڭ وزىندە «پاراسات» ۇلتتىق حولدينگى كۇن جانە جەل ەنەرگەتيكاسى باعىتتارى بويىنشا تۇزىلگەن جيىرماعا جۋىق باعدارلامانى قولعا الدى. كورمە اياقتالعان سوڭ, «استانا ەكسپو-2017» ۇلتتىق كومپانياسى ۇسىنعان جوبالار مەن ماكەتتەردىڭ تەحنولوگيالارىن وندىرىستە قولدانۋعا مۇمكىندىك تۋادى.
«ەكسپو» كورمەسىندە قازاقستاندىق عالىمدار الەم جۇرتشىلىعىن قانداي دا ءبىر عىلىمي جەتىستىگىمەن تاڭ قالدىرادى دەپ ايتۋ قيىن. دەگەنمەن, ءبىزدىڭ ەشكىمدى دە بەيجاي قالدىرمايتىن, دۇنيەجۇزىلىك الدىڭعى قاتارلى تەحنولوگيالاردان كەم تۇسپەيتىن جوبالارىمىز بار. ماسەلەن, الماتىداعى فيزيكا-تەحنولوگيا ينستيتۋتىمەن كۇن ساۋلەسىنەن ەنەرگيا الاتىن پانەلدەردى ادەتتەگىدەي اينەكتەن ەمەس, جۇمساق ماتەريالداردان جاساۋ باعىتىندا جۇمىستار جۇرگىزىپ جاتىرمىز» دەيدى «پاراسات» حولدينگىنىڭ باسقارما توراعاسى ابدىكارىم زەينۋللين. ونىڭ ايتۋىنشا, وتاندىق عالىمدار قۋاتى ۇزاققا جەتەتىن اككۋمۋلياتورلىق باتارەيالاردى جاساۋدى دا قولعا العان. «بىزدە الەم بويىنشا سيرەك كەزدەسەتىن مەتالداردىڭ مول قورى بار. ال قۋاتى كوپكە جەتەتىن «بولاشاقتىڭ» اككۋمۋلياتورلارى ءدال وسى سيرەك مەتالدار نەگىزىندە جاسالادى. ەگەر ءبىز شيكىزاتتى دا وزىمىزدەن شىعارىپ, ءونىمدى دە ءوزىمىز وندىرسەك, باسەكەلەس ورتا قالىپتاسىپ, اككۋمۋلياتورلاردىڭ باعاسى دا ارزانداي تۇسەدى» دەيدى ءا.زەينۋللين.
وسىلايشا, مەموراندۋمعا قول قويعان تاراپتار «ەكسپو» كورمەسىن قازاقستاندىق عالىمداردىڭ زەرتتەمەلەرىمەن قامتاماسىز ەتۋ ءۇشىن كۇش بىرىكتىرۋگە نيەتتى. سوعان سايكەس, «ەكسپو-2017» شەڭبەرىندە قازاقستان رەسپۋبليكاسىنىڭ تازا قۋات كوزدەرىن ءازىرلەۋ تۋرالى» 2013-2017 جىلدارعا ارنالعان باعدارلاما بويىنشا يننوۆاتسيالىق عىلىمي-تەحنيكالىق جوبالاردى جۇزەگە اسىرۋ جانە حالىقارالىق مامانداندىرىلعان كورمەدە ولاردى تانىستىرۋ جوسپارلانىپ وتىر.
بۇدان بولەك, «استانا ەكسپو-2017» ۇلتتىق كومپانياسى سولتۇستىك قازاقستان وبلىسى اكىمدىگىمەن دە كەلىسىمشارتقا وتىردى. قوس تاراپ كورمەدە جوسپارلانعان جۇمىستاردى جۇمىلا جۇزەگە اسىرۋدى كوزدەيدى.
«ەلباسى جۋىردا عانا كورمەنىڭ قۇرىلىسى مەن جوسپارلانعان ءىس-شارالاردى وتكىزۋگە وتاندىق كاسىپكەرلەر اتسالىسسىن» دەدى. وسى ورايدا, ءبىز تەك سولتۇستىك قازاقستان وبلىسى عانا ەمەس, ەلىمىزدىڭ باسقا ايماقتارىمەن دە كەلىسىمشارتقا وتىرماقپىز» دەيدى «استانا ەكسپو-2017» ۇك باسقارما توراعاسى تالعات ەرمەگياەۆ. وعان قوسا, كومپانيا باسشىسى ەكسپو-2017 اياسىندا قولدانىلاتىن تاۋارلار مەن قىزمەتتەردىڭ ءتىزىمى وسى جىلدىڭ سوڭىنا دەيىن بەلگىلى بولاتىنىن اتاپ ءوتتى.
ەركەجان ساتىمبەك