قازاقستان حالقىنىڭ بىرلىگى كۇنىن استانالىقتار قىزۋ تويلادى. ەڭ ۇلكەن مەرەكەلىك شارا قالانىڭ قاق تورىنە قونىس تەپكەن «قازاق ەلى» مونۋمەنتى جانىنداعى الاڭدا ءوتتى.
وندا ەلورداداعى ەتنومادەني ورتالىقتار جەكە بۇرىشتارىن جاساپ, سالت-داستۇرلەرىنە قاتىستى زاتتارىن كورمەگە شىعاردى. ۇيىمداستىرۋشىلاردىڭ ءبىرى, «استانا جاستارى» ەرىكتىلەر كورپۋسىنىڭ قىزمەتكەرى ۇلان ءماجيت وسىناۋ مەيرامعا 20-دان اسا ەتنوورتالىقتان 300-دەي كىسى اتسالىسقانىن ايتتى. قاتارلاردى ارالاپ ءجۇرىپ, ايىر قالپاقتى اعايىندارىمىز ۇسىنعان جادىگەرلەردىڭ جانىنا ايالدادىق. قىرعىز ەتنومادەني بىرلەستىگىنىڭ مۇشەسى جاڭىلمىرزا تالىپبايقىزىنىڭ تۇسىندىرۋىنشە, مۇندا ولاردىڭ قومۋز مۋزىكالىق اسپابى جانە كوينوك, ەلەچەك, كەمەنتاي سەكىلدى كيىمدەرى بار ەكەن. سورەدەن «ماناس» جىرىن دا كوزىمىز شالدى. ال «لاد» رەسپۋبليكالىق سلاۆيان قوزعالىسىنىڭ وكىلى ۆاسيلي يلتسوۆ بىزگە ورىستىڭ تانىمال كادەسىيىنا اينالعان ماترەشكانىڭ تاريحىن بايانداپ بەردى. «بۇل ويىنشىق 1890 جىلدارى پايدا بولعان. ونىڭ العاشقى نۇسقاسى حونسيۋ ارالىنان اكەلىنگەن» دەدى اقسارى جىگىت. قىزىلدى-جاسىلدى اعاش قۋىرشاقتارعا كوپشىلىكتىڭ دە ىقىلاسى ەرەكشە سەكىلدى.
بۇدان سوڭ, تاۋەلسىزدىك سارايىنىڭ الدىنا تىگىلگەن اپپاق شاتىردىڭ كەلەسى بەتكەيىنە بارىپ, ءتۇرلى ۇلتتىڭ تاعامدارىمەن تانىستىق. ۇزىندىعى 50 مەتر ۇستەلگە جايىلعان داستارقانعا قويىلعان كورەيلەردىڭ كيمبابىنان, دۇنگەندەردىڭ سىپانىنان, ارميانداردىڭ اگانتسىنان اۋىز ءتيىپ, اسپازداردىڭ اڭگىمەسىن تىڭدادىق. داستارقان باسىنا قالا اكىمىنىڭ ورىنباسارى ەرمەك امانشاەۆ تا كەلىپ, ءتىل ۇيىرەر تاتتىلەردەن ءدام تاتتى.
ءدۇبىرلى دۋمان قالالىق الاڭدا, «ءبايتەرەك» تۇبىندە, ستۋدەنتتەر ساياباعىندا جالعاستى.
بوتاگوز ماراتقىزى
