ەلوردادا مۇمكىندىگى شەكتەۋلى جاندارعا ارنالعان «شىعارماشىلىق ءۇيى» شەبەرحاناسى جاڭا ماۋسىمىن باستادى. مۇندا قامكوڭىل قالا تۇرعىندارىنىڭ بوس ۋاقىتىن ءتيىمدى وتكىزۋگە بارلىق جاعداي جاسالعان.
استانادا الەۋمەتتىك-ەڭبەك شەبەرحانالارى ءۇش جىلدان بەرى جۇمىس ىستەپ كەلەدى. بيىل جاڭا شىعارماشىلىق باعىت ەنگىزىلىپ وتىر. ەندى بۇل ورتالىققا كەلگەندەر ءتۇرلى كادەسىيلار جاساپ, قىش قۇمىرا جاساۋ ىسىنە ماشىقتانادى.
– بىزگە قولونەرمەن اينالىسقىسى كەلەتىندەر ءجيى كەلىپ جاتىر. ولاردىڭ باسىم بولىگى اربامەن, كەيبىرى بالداقپەن جۇرەدى. بۇل جەردە بارلىعى بەلگىلى ءبىر ىسپەن شۇعىلدانىپ, كاسىپكە داعدىلانادى. ءبىز اۋەستىك تانىتقانداردىڭ بارىنە قولداۋ كورسەتىپ, باعىت-باعدار بەرەمىز, – دەيدى «دوس» تاۋەلسىز ءومىر ورتالىعى» مۇگەدەكتەر بىرلەستىگىنىڭ ءتورايىمى دينا ەردىلدينوۆا.
مۇندا تاجىريبەلى شەبەرلەر ءدارىس بەرىپ, ايەلدەرگە قاعازدان گۇل شوقتارىن, اشەكەيلەر, جاساۋدى كورسەتىپ, توقۋ مەن ۇساق مونشاقتاردان كەستە تىگۋدى ۇيرەتەدى. ال ەرلەردىڭ اعاش ويۋ ونەرىن مەڭگەرۋگە, قىش پەن كەراميكالىق بۇيىمدار جاساۋعا مۇمكىندىگى مول.
– مەن ءبىرىنشى رەت قاتىسىپ وتىرعان جوقپىن, بۇعان دەيىن دە اعاش پەن قىشتان بۇيىمدار جاساپ كوردىك. اعاشتان ءتۇرلى مۇسىندەر, كەيىننەن قىشتان قۇمىرالار, پىشىندەر ىستەدىك. قىشپەن جۇمىس ىستەۋ قيىن, سوندا دا بار كۇشىمىزدى سالامىز, تىرىسامىز. بۇعان دەيىن ۇيدە كوپ وتىراتىنمىن, ال «دوس» قوعامىمەن تانىسقان سوڭ كۇندەرىم قىزىقتى وتەتىن بولدى. ۇنەمى ءتۇرلى شارالارعا شاقىرىپ وتىرادى, – دەيدى استانالىق نيكولاي كۆاشنين.
مۇمكىندىگى شەكتەۋلى جاندار «شىعارماشىلىق ۇيىنە» ءتۇرلى باعىتتار بويىنشا جازىلا الادى. ال كۋرستاردى تامامداعان سوڭ شەبەرلىك دارىستەرىنە قاتىسقاندارعا سەرتيفيكاتتار تابىستالادى.
