بۇگىن استانانىڭ ءار تۇكپىرىندە قازاقستان حالقىنىڭ بىرلىگى كۇنى قىزۋ تويلانىپ جاتىر. ەڭ ۇلكەن مەرەكەلىك شارا قالانىڭ قاق تورىنە قونىس تەپكەن «قازاق ەلى» مونۋمەنتى جانىنداعى الاڭدا وتۋدە. وعان استانا اكىمىنىڭ ورىنباسارى ەرمەك امانشاەۆ تا قاتىستى.
جينالعان جۇرتشىلىق كورىگى قىزعان دۋماندى تاماشالاپ ءماز-مەيرام. ەلورداداعى ەتنومادەني ورتالىقتار جەكە بۇرىشتارىن جاساپ, سالت-داستۇرلەرىنە قاتىستى زاتتاردى كورمەگە شىعارىپتى. ارالاپ ءجۇرىپ, ايىر قالپاقتى اعايىندارىمىز ۇسىنعان جادىگەرلەردىڭ جانىنا ايالدادىق.
قىرعىز ەتنومادەني بىرلەستىگىنىڭ مۇشەسى جاڭىلمىرزا تالىپبايقىزىنىڭ ايتۋىنشا, مۇندا ولاردىڭ قومۋز مۋزىكالىق اسپابى جانە كوينوك, ەلەچەك, كەمەنتاي سەكىلدى كيىمدەرى بار ەكەن. سورەدەن «ماناس» جىرىن دا كوزىمىز شالدى.
ال «لاد» رەسپۋبليكالىق سلاۆيان قوزعالىسىنىڭ وكىلى ۆاسيلي يلتسوۆ بىزگە ورىستىڭ تانىمال كادەسىيىنا اينالعان ماترەشكانىڭ تاريحىن ءتۇسىندىرىپ بەردى. «بۇل ويىنشىق 1890 جىلدارى پايدا بولعان. ونىڭ العاشقى نۇسقاسى حونسيۋ ارالىنان اكەلىنگەن» دەدى اقسارى جىگىت. قىزىلدى-جاسىلدى اعاش قۋىرشاقتارعا كوپشىلىكتىڭ دە ىقىلاسى ەرەكشە سەكىلدى.
بۇدان سوڭ, تاۋەلسىزدىك سارايىنىڭ الدىنا تىگىلگەن اپپاق شاتىردىڭ كەلەسى بەتكەيىنە بارىپ, ءتۇرلى ۇلتتىڭ تاعامدارىنان ءدام تاتتىق. كورەيلەردىڭ كيمبابىنان, دۇنگەندەردىڭ سىپانىنان, ارميانداردىڭ اگانتسىنان اۋىز ءتيىپ, اسپازدارىنىڭ اڭگىمەسىن تىڭدادىق.
ءدۇبىرلى توي قالالىق الاڭدا, «بايتەرەك» تۇبىندە, ستۋدەنتتەر ساياباعىندا جالعاسۋدا.
بوتاگوز ماراتقىزى
