استانا قالاسىندا ءۇش كۇن بۇرىن باستالعان «ادىلەت ورگاندارى كەڭەس بەرەدى» اتتى رەسپۋبليكالىق اكتسيا كەشە مارەسىنە جەتتى. تۇرعىنداردىڭ قۇقىقتىق ساۋاتىن ارتتىرۋعا باعىتتالعان شارا جونىندە قالالىق ادىلەت دەپارتامەنتىنىڭ قىزمەتكەرى الماس ەرمەكوۆ اڭگىمەلەپ بەردى.
– اكتسيا اياسىندا وتكەن شارالارعا كىمدەر تارتىلدى؟
– تەگىن زاڭگەرلىك كومەك كورسەتۋ شاراسىنا دەپارتامەنتتىڭ جاۋاپتى قىزمەتكەرلەرى, مەملەكەتتىك ورگانداردىڭ زاڭگەرلەرى جانە قالالىق نوتارياتتىق پالاتا مەن ادۆوكاتتار القاسىنىڭ وكىلدەرى قاتىستى. سونىمەن قاتار اۋداندىق ادىلەت باسقارمالارىنىڭ, جىلجىمايتىن مۇلىك ورتالىعىنىڭ, سوت اكتىلەرىن ورىنداۋ دەپارتامەنتىنىڭ, ءىىد كوشى-قون باسقارماسىنىڭ جانە ەلوردا اكىمدىگىنىڭ قۇرىلىمدىق بولىمشەلەرىنىڭ وكىلدەرىنەن جاساقتالعان اقپاراتتىق-ناسيحات توپتارى كۇيگەنجار كەنتىندە, الماتى اۋدانىنىڭ №2 حالىققا قىزمەت كورسەتۋ ورتالىعىندا كەڭەستەر بەردى. اكتسيا اياسىندا زاڭگەرلەر قالاداعى كاسىپتىك-تەحنيكالىق كوللەدج ستۋدەنتتەرىمەن, ەتس-166/22 تۇزەۋ مەكەمەسىندەگى سوتتالعاندارمەن جۇزدەستى.
– شارا بارىسىندا استانالىقتار تاراپىنان قانداي سۇراقتار ءجيى قويىلدى ەكەن؟
– نەگىزىنەن, مۇراگەرلەر اراسىندا جىلجىمايتىن مۇلىكتى ءبولۋ, زاڭدى تۇلعانى قايتا تىركەۋ جانە ونى باسقا تۇلعاعا بەرۋ, مەملەكەتتىك تۇرعىن ءۇي قورىنان باسپانا الۋ ءتارتىبى, حالىقتى جۇمىسپەن قامتۋ باعدارلاماسىنا قاتىسۋ ءتارتىبى تۋرالى جانە باسقا دا سۇراقتار ءجيى قويىلدى. اسىرەسە, نوتاريۋستار مەن ادۆوكاتتار كوپ سۇراقتىڭ استىندا قالدى.
تۇزەۋ مەكەمەسىندەگى سوتتالعانداردى كوبىنە كاسساتسيالىق شاعىم, سوت شەشىمىنە قايتا شاعىمدانۋ ماسەلەلەرى مازالايدى ەكەن. ال ستۋدەنتتەر كوبىنە جەتىم بالالارعا ارنالعان كۆوتالار
تۋرالى بىلگىسى كەلەدى جانە جەڭىلدىكتەرگە يە ادامداردىڭ مەملەكەتتىك قوردان باسپانا الۋ ماسەلەلەرىنە قىزىعۋشىلىق تانىتتى.
اكتسيا بارىسىندا ەلوردالىق جاس جۇبايلارعا ارنالعان اشىق ەسىك كۇنى ۇيىمداستىرىلدى. جاستار ومىرلەرىنە قاجەت, قۇندى اقىل-كەڭەستەر الدى.
اسحات رايقۇل
