استانانىڭ ىرگەسىندەگى قابانباي اۋىلىندا ءتورتىنشى رەت قاتارىنان «التىن تۇلپار» الامان بايگەسى ءوتتى.
ۇلتتىق سپورت تۇرلەرى قاۋىمداستىعىنىڭ ۇيىمداستىرۋىمەن وتكەن الامان جارىسقا «Samruk kazyna trust» الەۋمەتتىك جوبالاردى دامىتۋ قورى دەمەۋشىلىك كورسەتسە, «نۇر وتان» پارتياسى مەن استانا قالاسىنىڭ اكىمدىگى قولداۋ ءبىلدىردى. ەكسپو-2017 حالىقارالىق كورمەسى اياسىندا وتكىزىلگەن بيىلعى بايگەنىڭ جۇلدە قورى 23 ميلليون تەڭگەنى قۇرادى.
ۇلى دالانى دۇبىرگە بولەگەن الامان جارىسقا 37 سايگۇلىك ءتۇستى. ارينە, بۇل الامان بايگە ءۇشىن كوپ ەمەس. بۇعان دەيىنگى جارىستارعا قاتىسقان اتتاردىڭ سانى 70-تەن كەم بولماپ ەدى.
بيىل بايگە جولى وزگەرىپتى. اتتار بۇرىنعىداي ءبىر اينالىمدا 12 شاقىرىمعا شاپپادى. جارىس شەڭبەرى 7 شاقىرىمعا دەيىن تارتىلىپتى. ياعني, سايگۇلىكتەر اينالما جولدى جەتى رەت اينالىپ شاپتى. الاماندى كورۋگە جينالعان جانكۇيەر ءۇشىن بۇل وزگەرىس وتە ءتيىمدى بولدى دەۋگە تۇرادى. قالاي دەگەنمەن, اۋىزدىعىمەن الىسقان تۇلپارلاردى, ۇزەڭگىسىمەن تەبىسكەن شاباندوزداردى جاقىننان كورگەننىڭ ءجونى بولەك ەكەن.
سونىمەن «التىن تۇلپار» جۇلدەسى ءۇشىن بايگە جولىنىڭ شاڭىن اسپانعا كوتەرگەن تۇلپارلار ءبىرىنشى اينالىمنان كەيىن توپ-توپ بولىپ سەيىلىپ كەتتى. العاشقى اينالىمنان-اق القىنىپ قالعان بىرنەشە ات جارىس جولىنان شىعىپ تا قالدى. ال بايگەگە ارنايى جاراتىلعان سايگۇلىكتەر بىردەن العا وزىپ, جانكۇيەر قاۋىمنىڭ قىزۋ قولداۋىمەن اينالىم وتكەن سايىن باۋىرىن جازىپ, كوسىلە شاپتى.
الاماننىڭ باس جۇلدەسىنە ۇمىتكەرلەر قاراسى سوڭعى اينالىمعا كەلگەندە تىپتەن قىسقارىپ قالدى. كوپتەن سۋىرىلعان ءۇش-اق ات كومبە سىزىعىن كەسىپ ءوتتى. ەڭ قىزىعى سول – جامبىل وبلىسىنان قوسىلعان «سامال» اتتى جيرەن ايعىر ەكىنشى مارتە «التىن تۇلپار» بايگەسىنىڭ جەڭىمپازى اتاندى. شاباندوزى دا سول ات قۇلاعىندا وينايتىن اقجول جۇماتاي. جەڭىمپازدىڭ قانجىعاسىنا 10 ميلليون تەڭگە بايلاندى. ەسبول جاپپاسوۆتىڭ بۇل جۇيرىگى 2015 جىلى دا 98 سايگۇلىكتىڭ ىشىنەن وزا شاپقان ەدى. مارەگە ەكىنشى بولىپ «قويانقاسقا» اتتى تۇلپار كەلدى. ۇزدىك ۇشتىكتى تۇيىندەگەن سايگۇلىك مارەگە اۋپىرىمدەپ جەتتى.
الاماندا وزا شاپقان تۇلپارلاردى باپتاعان اتبەگىلەر مەن شاباندوزدارعا ديپلومدار مەن اقشالاي سىيلىقتار بەرىلدى.
عالىم قوجابەكوۆ
