الدا ۇلتتىق كاسىپكەرلەر پالاتاسىنىڭ العاشقى سەزى شاقىرىلىپ وتىر. القالى جيىننان ەلىمىزدىڭ كاسىپكەرلەرى بۇل پالاتادان نە كۇتەدى, قانداي ماسەلەلەر شەشىمىن تاپقانىن ءجون كورەدى؟ بۇل جونىندە سەزگە دەلەگات رەتىندە قاتىسقالى وتىرعان كاسىپكەر, استاناداعى «تەحنوليزينگ» جشس ديرەكتورى جانار نيازبەكوۆانى اڭگىمەگە تارتقان ەدىك.
–جانار امانگەلدىقىزى, الدىمەن ءوزىڭىز جۇرگىزىپ وتىرعان جۇمىسىڭىز جونىندە ايتا كەتسەڭىز؟
ء–بىزدىڭ «تەحنوليزينگ» جشس 2010 جىلى قۇرىلعان. مەن بيزنەستى سەرىكتەسىممەن بىرگە اشتىم. 2003 جىلدان بەرى وسى سالادا جۇمىس ىستەپ كەلە جاتقاننان كەيىن جەكە كومپانيانى قۇرۋ قيىن بولعان جوق. بىراق, كادر تابۋ ماسەلەسىندە قينالدىق. سونىمەن قاتار, جاڭا كومپانياعا دەگەن كرەديتورلاردىڭ كوزقاراسى باسقاشا بولدى. «بۇلار كىمدەر, قولىنان نە كەلەدى؟» دەپ, بىزگە سەنىمسىزدىك تانىتقاندار بولدى. بىراق, ءبىز از ۋاقىتتىڭ ىشىندە ءوزىمىزدى كورسەتە بىلدىك. قازىر 400-دەن اسا كليەنتىمىز بار.
–سوندا سىزدەر قانداي تەحنيكا تۇرلەرىن ليزينگكە بەرۋمەن شۇعىلداناسىزدار؟
– «تەحنوليزينگ», نەگىزىنەن, اۋىل شارۋاشىلىعىنا قاجەتتى تەحنيكانى ساتىپ الادى. اتاپ ايتقاندا, كومباين, ەكسكاۆاتور, بۋلدوزەر, اۆتوبۋس, جۇك كولىكتەرى جانە كوممۋنالدىق شارۋاشىلىعى ماشينالارىن كليەنتتەرىمىزگە ارى قاراي ساتىپ الۋ قۇقىمەن ارەنداعا بەرەمىز. جىلدىق ۇستەمەسى ورتاشا باعاممەن – 10-14 پايىز. كولىكتەردىڭ كوبىسى امەريكا مەن ەۋروپا ەلدەرىنىكى. قىتايدان الدىراتىنىمىز بار. بۇل ەندى تەحنيكانىڭ تۇرىنە بايلانىستى.
–بىلتىر قىركۇيەك ايىندا كاسىپكەرلەردى قولداۋعا ارنالعان ۇلتتىق كاسىپكەرلەر پالاتاسى قۇرىلعانىن ءوزىڭىز جاقسى بىلەسىز. وسى ۋاقىتقا دەيىن بۇل بيزنەس قاۋىمداستىعىنىڭ ءسىزدىڭ سەرىكتەستىككە قانداي دا ءبىر پايداسى بولدى ما؟
– ءبىز ءىرى بيزنەس وكىلى رەتىندە قانداي دا ءبىر مەملەكەتتىك قولداۋعا يە بولۋ ءۇشىن ءوزىمىز جۇگىرەمىز. ۇكىمەتكە, ءتيىستى ورگاندارعا حات جازامىز. بىراق سول حاتىمىز ايلاپ, جىلداپ جاتىپ قالاتىن كەزدەر از ەمەس. مۇمكىن, حاتىمىز ءتيىستى يەسىنە جەتپەي جاتا ما, ايتەۋىر, سارىلىپ كوپ كۇتەتىن ەدىك. ءسويتىپ جۇرگەندە جوعالىپ تا كەتەتىن. ال ەندى ۇلتتىق كاسىپكەرلەر پالاتاسى قۇرىلعالى بۇل ماسەلەنىڭ ءتۇيىنى شەشىلدى-اۋ دەيمىن. بىلتىر قارجىلىق جەلىمەن جۇمىس ىستەيتىن كومپانيالارعا مەملەكەت ارنايى سۋبسيديا ءبولدى. زاڭ بويىنشا بۇل قارجىلاي كومەك كەز كەلگەن كومپانياعا قولجەتىمدى بولۋعا ءتيىس. سونىڭ ىشىندە ءبىز بەلسەندى جۇمىس ىستەپ جاتقان ليزينگتىك كومپانيا رەتىندە وتەتىنىمىزگە سەنىمدى ەدىك. بىراق, ءبىز وتە الماي قالدىق. سويتسەك, پايىزدىق ستاۆكالارىنا, قارجىلىق اينالىمعا بايلانىستى بەلگىلى ءبىر شەكتەۋلەرى بار ەكەن. مۇنى ءبىز بىلگەن جوقپىز. ال بيىل سۋبسيديانى الۋعا پالاتا ارقىلى حات جازدىق. ماسەلەمىز ەكى ايدىڭ ىشىندە شەشىلدى. ۇلتتىق كاسىپكەرلەر پالاتاسى كاسىپكەرلەردى قولدايتىن كۇش سەكىلدى. بۇگىندە كاسىپكەرلەرگە قاتىستى كەز كەلگەن مەملەكەتتىك دەڭگەيدەگى شەشىم وسى بيزنەس قاۋىمداستىقتىڭ كەلىسىمىمەن جۇزەگە اسىرىلادى. ءارى پالاتاعىلار قانداي دا ءبىر جوبا دۇنيەگە كەلسە, بۇل تۋرالى دەرەۋ وزدەرىندە تىركەۋدە تۇرعان كاسىپكەرلەردى حاباردار ەتەدى. وسى جاعىنان كومەگى كوپ بولىپ تۇر.
– الداعى قر ۇلتتىق كاسىپكەرلەر پالاتاسىنىڭ سەزىندە قانداي ماسەلە كوتەرىلگەنىن قالار ەدىڭىز؟
– مەنىڭشە, وسى سەزدە ۇلتتىق كاسىپكەرلەر پالاتاسىنا مۇشە رەتىندە كاسىپكەرلەرگە سالىناتىن مىندەتتى مۇشەلىك جارنا ماسەلەسى بىرجاقتى شەشىلۋى كەرەك. وسى جارنانىڭ الدىن الا بەلگىلەنگەن ءتاريفى بار. ورتا جانە شاعىن بيزنەس وكىلدەرىنە بەلگىلەنگەن جارنا مولشەرى بار. بىزدىكى – ودان بولەك تاريف. بىراق, بۇل جەردە ءبىر تۇسىنبەۋشىلىك بار. ءىرى كومپانيالار اراسىندا تاريف ماسەلەسى ناقتى انىقتالماعان. ماسەلەن, كومپانيالار جىلدىق اينالىمدا بىرنەشە ميلليارد نەمەسە بىرنەشە جۇزدەگەن ميلليارد پايدا ءتۇسىرۋى مۇمكىن, ال ءتاريفى بىردەي. ەكىنشى جاعىنان, كوپ كاسىپكەرلەر, اسىرەسە, ورتا جانە شاعىن بيزنەس وكىلدەرى وسى مۇشەلىك جارنانى نە ءۇشىن تولەيتىنىن بىلمەيدى. بىلمەگەن سوڭ, تولەگىسى كەلمەيتىنى انىق. ايتالىق,جىلدىق جارنانى تولەۋ ۋاقىتى سول جىلدىڭ قاڭتارى مەن 31 جەلتوقسان ارالىعى دەپ كورسەتىلگەن. كاسىپكەرلەردىڭ 90 پايىزدان استامى ءالى جارنا قۇيعان جوق. ءبارى جەلتوقسان ايىن كۇتىپ ءجۇر. مەنىڭ ۇسىنىسىم, مۇشەلىك جارنانى نە ءۇشىن تولەۋ كەرەكتىگىن پالاتا وكىلدەرى جان-جاقتى ءتۇسىندىرىپ بەرسە دەيمىن. سونداي-اق, ۇلتتىق كاسىپكەرلەر پالاتاسى نەمەن اينالىساتىنىن, ولاردىڭ كاسىپكەرلەرگە قانداي پايداسى بارىن بازاردا ساۋدا جاساپ جۇرگەن قاراپايىم كاسىپكەر بىلە بەرمەيدى. سوندىقتان, ولاردىڭ اراسىندا ۇگىت-ناسيحات جۇمىستارىن كوبىرەك جۇرگىزۋ قاجەت دەپ سانايمىن.
راسىمەن دە ۇلتتىق كاسىپكەرلەر پالاتاسى ەلدەگى ىسكەر ازاماتتاردىڭ باسىن قوسادى ءارى كاسىپكەرلەرگە قاتىستى قانداي دا ءبىر ماسەلەنى بىرلەسىپ شەشۋدى كوزدەيدى. «جالعىز ءجۇرىپ جول تاپقانشا, كوپپەن بىرگە اداس» دەيدى. كەز كەلگەن تۇيتكىلدى بىرگە شەشىپ وتىرساق, بۇل بيزنەستىڭ دامۋىنا ىقپال ەتەرى ءسوزسىز. وسى جاعىنان العاندا, بىزگە بيزنەس قاۋىمداستىقتىڭ پايداسى ۇلكەن. ەندى پالاتا ەلىمىزدەگى شاعىن بيزنەستە جۇرگەن حالىقتى تارتىپ, ولارعا قانداي مەملەكەتتىك قولداۋلار بارىن ءتۇسىندىرىپ, زاڭدىق تۇرعىدان ساۋاتتى كومەك بەرە الۋى كەرەك. جالپى, بۇل شارۋالارعا ايرىقشا ءمان بەرىپ, كەڭىنەن ناسيحاتتالعانى ءجون.
