بۇگىنگى تاڭدا قازاقستانعا جىلىنا 1,5 ملن توننادان استام مۇناي ونىمدەرى سىرتتان تاسىمالدانادى. سوندىقتان, بولاشاقتا ەلىمىزدە ءتورتىنشى مۇناي وڭدەۋ زاۋىتى سالىنۋى ابدەن مۇمكىن. بۇل كۇردەلى ماسەلە بولعاندىقتان, ۇكىمەت ءالى ناقتى شەشىمگە كەلگەن جوق. الايدا, يمپورتقا تاۋەلدىلىگىمىزدى ازايتۋ ءۇشىن بىلتىر اتىراۋ, پاۆلودار جانە شىمكەنت مۇناي وڭدەۋ زاۋىتتارى جاڭعىرتىلا باستادى. جاڭعىرتۋ جۇمىستارى 2016 جىلى اياقتالۋى ءتيىس. سول كەزدە بۇل زاۋىتتاردىڭ قۋاتى دا ارتا تۇسەدى. ورتالىق كوممۋنيكاتسيالار قىزمەتىنىڭ بريفينگىنە قاتىسقان «قازمۇنايگاز» ۇلتتىق كومپانياسى باسقارما توراعاسى ساۋات مىڭباەۆ ءسوزىنىڭ القيسساسى وسىنداي بولدى.
«قازمۇنايگاز» باسشىسى جاقىندا وتكەن كومپانيانىڭ القا وتىرىسىندا ەلىمىز جانار-جاعارماي تاپشىلىعىنا ۇرىنۋى مۇمكىندىگىن ايتقان. ارينە, بۇل جاعداي تۋىندايتىن بولسا, بەنزين مەن ديزەل وتىنىنىڭ قىمباتتاۋىنا اكەلىپ سوعادى. وسى جونىندە قويعان سۇراعىمىزعا «بىزدە ءساۋىر ايىنا دەيىن جەتەتىن بەنزيننىڭ, مامىر ايىنا دەيىنگى ديزەل وتىنىنىڭ قورى بار» دەپ جاۋاپ بەردى ساۋات مۇحامەتبايۇلى.
بىلتىر «قارتالى – استانا» سولتۇستىك گاز قۇبىرىنىڭ قۇرىلىسى باستالۋى ءتيىس بولاتىن. بىراق, بۇل جۇمىس باستالماي جاتىپ توقتاپ قالعان. ساۋات مىڭباەۆتىڭ ايتۋىنشا, قۇبىردىڭ جوبالىق-سمەتالىق قۇجاتتاماسى قازىردە دايىن. قۇرىلىس جۇمىستارىنىڭ باعىتى ۇكىمەتتە تالقىلانىپ جاتقان كورىنەدى.
ايماقتاردى گازبەن قامتۋ باعدارلاماسى تۋرالى «تۇركىستان, قىزىلوردا قالالارىنىڭ تۇرعىندارىنا, الماتىنىڭ ماڭىنداعى تالعار حالقىنا گاز جەتكەرۋ سەكىلدى كوپتەگەن جوبالار بار» دەگەن كومپانيا باسشىسى بۇل جۇمىستار ءوز رەتىمەن جۇرگىزىلىپ كەلە جاتقاندىعىن جەتكىزدى.
سونداي-اق, مەملەكەت باسشىسى نۇرسۇلتان نازارباەۆتىڭ تاپسىرماسىنا سايكەس, «قازمۇنايگاز» كومپانياسى جۇمىسشىلارىنىڭ جالاقىسى 1 ساۋىردەن باستاپ 10 پايىزعا كوتەرىلەتىنىن ايتتى.
امانعالي شميتۇلى
