استانالىق مارافونشى سالتانات تۇيتەباەۆتىڭ بارعان جەرىنەن جۇلدەسىز قايتپايتىنىنا كوزىمىز ابدەن جەتكەن. ەلگە كەلسە, الدىمەن «استانا اقشامى» گازەتىنىڭ رەداكتسياسىنا ارنايى باس سۇعىپ, اقجولتاي جاڭالىعىمەن بولىسەدى. اقساقال بۇل جولى جاڭا زەلانديادا وتكەن ارداگەرلەر وليمپياداسىنان التىن مەدالمەن ورالدى.
ءتورت جىلدا اينالىپ ءبىر كەلەتىن ارداگەرلەر وليمپياداسى 1985 جىلى كانادانىڭ تورونتو قالاسىنان باستاۋ العان. وسى جىلى بۇل بايراقتى باسەكە وكلەند قالاسىندا جالاۋىن جەلبىرەتتى. وعان الەمنىڭ 100-دەن استام ەلىنەن 25 مىڭ سپورتشى قاتىستى.
حالىقارالىق دارەجەدەگى سپورت شەبەرى سالتانات تۇيتەباەۆ 70-74 جاس ساناتىندا 20 شاقىرىمدى 1 ساعات 42 مينۋت 14 سەكۋندتا باعىندىرىپ, قاتارلاستارىنىڭ الدى بولدى. ودان 11 مينۋت 7 سەكۋندقا قالىپ قويعان جاڭازەلانديالىق گرەحەم شارپ ەكىنشى كەلدى. ال ۇزدىك ۇشتىكتى كريستوفەر ليتلەۆۋد تۇيىندەدى.
ءبىزدىڭ قاريا مۇنىمەن توقتالىپ قويماي, اراعا بەس كۇن سالىپ 10 شاقىرىمدىق جارىسقا قاتىسىپ, كۇمىس جۇلدە يەلەندى. تارتىستى سايىستا تەك اۆستراليالىق سپورتشىعا جول بەردى.
كەلەسى وليمپيادا 2021 جىلى جاپونيادا وتەدى. سالتانات اتا وعان دەيىن يسپانيادا بولاتىن الەم چەمپيوناتىنا دايىندىقتى باستاۋدى جوسپارلاپ وتىر ەكەن. دۇنيەنىڭ ءتورت بۇرىشىن ارالاپ, مەرەيى تاسىعان اقساقال وسىنداي ايتۋلى جارىستارعا قاتىسۋىنا زور قولداۋ كورسەتىپ جۇرگەن استانا قالاسى دەنە شىنىقتىرۋ جانە سپورت باسقارماسىنىڭ باسشىسى بەرىك مارجىقپاەۆقا ەرەكشە العىسىن ءبىلدىردى.
ورىنبەك وتەمۇرات
