ۇلىستىڭ ۇلى كۇنى الماتى اۋدانىنا قاراستى كۇيگەنجار, ينتەرناتسيونالنىي, جەلەزنودوروجنىي تۇرعىن الاپتارىندا كەڭىنەن مەرەكەلەنىپ, ۇلتتىق قۇندىلىقتارىمىز دارىپتەلدى.
كۇيگەنجار تۇرعىن الابىندا جاڭادان اشىلعان №42 ورتا مەكتەپتە مەرەكەلىك كونتسەرت ءوتىپ, وقۋشىلار تەاترلاندىرىلعان قويىلىمدار قويدى. اۋىل حالقى بەلسەنە اتسالىسقان مەرەكەلىك ءىس-شارادا قاريالار قاۋىمى دا ءوز ونەرلەرىن ورتاعا سالدى. 20 ناۋرىزدا ينتەرناتسيونالنىي تۇرعىن الابىنىڭ تۇرعىندارى «تاعام» ءدامحاناسىندا باس قوسىپ, الەۋمەتتىك جاعدايى تومەن وتباسىلارعا, ارداگەرلەر مەن مۇگەدەكتەرگە ارنايى داستارقان جايدى. جىلى لەبىزدەر مەن ءتىلەكتەر ايتىلعان دۋمان كەشە, 21 ناۋرىز كۇنى, جەلەزنودوروجنىي تۇرعىن الابىندا جالعاستى. №29 مەكتەپ وقۋشىلارى ءتۇرلى شارالار – ارقان تارتۋ, اسىق اتۋ سياقتى جارىستار وتكىزىپ, اۋىل تۇرعىندارىن كونتسەرتتىك باعدارلامالارىمەن قۋانتتى. «قازگەرستروي» بك اق كومپانياسى ءوز كيىز ءۇيىن تىگىپ, اۋداننىڭ كوپبالالى انالارىنا ازىق-تۇلىك قورجىنىن تاراتتى.
نۇرگۇل احانقىزى
