ۇلىستىڭ ۇلى كۇنى الماتى اۋدانىنىڭ قىرقىنشى كەنتىندەگى №29 مەكتەپتە «ارمىسىڭ, ءاز ناۋرىز» اتتى مەرەكەلىك شارا ۇيىمداستىرىلدى.
بارلىق ءيسى مۇسىلمان ءبىرىن-ءبىرى كوكتەم مەرەكەسىمەن شىنايى قۇتتىقتايتىن بۇل كۇندە وسى اۋداننىڭ تۇرعىندارى اتالمىش مەكتەپكە اعىلدى. ۇلتتىق ناقىشتا بەزەندىرىلگەن زالدىڭ ورتاسىنا اق داستارحان جايىلىپ, ونىڭ ءۇستى ۇلتتىق تاعامدارعا تولتىرىلىپتى. وندا باۋىرساقتىڭ ءتۇر-ءتۇرى, قازى-قارتا, جال-جايا, ىرىمشىك, سۇتتەن جاسالعان سان الۋان تاعامدار – ءبارى تەگىس قويىلعان. مەرەكەنى قىزىقتاۋعا كەلگەندەر دە شات-شادىمان كوڭىل-كۇيمەن وكپە-رەنىشتەرىن ۇمىتىپ, ناۋرىز كوجەدەن ءدام تاتىپ, ءتوس قاعىستىرىپ, يگى تىلەكتەرىن ءبىلدىرىپ جاتتى. وسىنداي ءبىر جاراسىمدى ساتتە ورتاعا شىققان الماتى اۋدانى اكىمىنىڭ ورىنباسارى ءا.قۋاتبەكوۆ جينالعانداردى كوكتەمگى جاڭارۋ مەرەكەسىمەن شىن جۇرەكتەن قۇتتىقتاپ, ءار وتباسىنا اماندىق, بەرەكە-بىرلىك, تىنىشتىق تىلەدى.
– كۇن نۇرىنا جىلىنىپ, مال ءوسىپ, اق مولايىپ, تىرشىلىككە قاسيەت نۇرى قۇيىلاتىن بۇل مەزگىل – بىرلىكتىڭ, ىنتىماقتىڭ, بەرەكە مەن تاتۋلىقتىڭ مەرەكەسى. ەندەشە, بىرلىگىمىز نىعايىپ, بەرەكەمىز ارتا بەرسىن. ۇلىس وڭ, اق مول بولسىن! – دەدى ءاليحان جۇماحانۇلى.
شارا بارىسىندا قازاق حالقىنىڭ سالت-داستۇرلەرى, ادەت-عۇرپى كورسەتىلىپ, بالالارعا ناۋرىز مەرەكەسىنىڭ باستى تاعامى «ناۋرىز كوجە» تۋرالى, «قىدىر اتا» جايىندا تۇسىنىك, مالىمەت بەرىلدى. سوڭىنان سپورتتىق شارالار ۇيىمداستىرىلىپ, جەڭىمپازدار مەن مەرەكەلىك شاراعا قاتىسۋشىلارعا ىنتالاندىرۋ سىيلىقتارى ۇلەستىرىلدى.
