جاڭارۋ مەرەكەسىنە سۋرەتشىلەر شاشۋى
ۇلتتىق مۋزەيدە قىلقالام شەبەرلەرى ءباتيما زاۋىربەكوۆا, گۇلجامال تاگەنوۆا جانە ەلەنا تيو شىعارماشىلىعىنان سىر شەرتەتىن «ناۋرىز. جاڭارۋ» كورمەسى اشىلدى. ەكسپوزيتسياعا كوركەمسۋرەت جانە گوبەلەن تەحنيكاسىمەن ورىندالعان ءار جانرداعى 100-دەن استام جۇمىس قويىلدى.
ءباتيما زاۋىربەكوۆا – بەلگىلى گوبەلەن شەبەرى, ش.ءۋاليحانوۆ اتىنداعى مەملەكەتتىك سىيلىقتىڭ لاۋرەاتى, قازاقستاننىڭ ەڭبەك سىڭىرگەن قايراتكەرى. ونىڭ تۋىندىلارى ءا.قاستەەۆ اتىنداعى مەملەكەتتىك ونەر مۋزەيى, ۇلتتىق مۋزەي زالدارىنا جانە قازاقستان پرەزيدەنتىنىڭ رەزيدەنتسياسىندا قويىلىپ, اقش پەن ەۋروپانىڭ جەكە كوللەكتسيالارىندا تۇر. ال بۇل كورمەدەن سۋرەتشىنىڭ «انا مەن ءسابي», «قىز ۇزاتۋ», «ساۋكەلە كيگەن ارۋ», «جىبەك جولى», «شىعىس اۋەندەرى» سىندى جۇمىستارىن تاماشالاۋعا بولادى.
گۇلجامال تاگەنوۆا قالا كوشەلەرى مەن الاڭدارى, زامانداس قۇربىلارى مەن شىعىس ارۋلارىنىڭ بەينەلەرىن شىعارماشىلىعىنا ارقاۋ ەتەدى. بۇل «الماتىداعى تاڭ», «ادەمى-اي», «سىڭلىلەر», «قىزعالداق ۇستاعان قالىڭدىق», «ۆەنەتسيانى ارالاعاندا» كارتينالارىنان كورىنەدى.
ەلەنا تيو پەيزاجدار مەن پورترەتتەرگە, ناتيۋرمورتقا اۋەس. ءوز كارتينالارىن ول گوللانديا مەن فرانتسيا يمپرەسسيونيستەردىڭ داستۇرىندە سالادى. شىعىس تاقىرىبى دا وعان جات ەمەس. وعان «بۋتاكوۆكاداعى كۇز», «قىز قۋ», «ەستەلىك» جۇمىستارى دالەل.