ەلوردادا ءوتىپ جاتقان حالىقارالىق ساۋلەتشىلەر كونگرەسى اياسىندا «قالا تىنىسى: اقىلدى اۋدان» بايقاۋىنىڭ جەڭىمپازدارى انىقتالدى. بۇل جولعى گران-ءپريدى باس شاھارعا قىسقى جىلىجاي سالۋ يدەياسىن ۇسىنعان توپ جەڭىپ الدى.
بيىلعى بايقاۋعا 150 ادامنان قۇرالعان 40 كوماندا جيناقتالدى. قاتىسۋشىلارعا ءۇش باعىت بويىنشا مىندەتتەر قويىلدى. ولار جاڭا تەحنولوگيالاردىڭ يننوۆاتسيالىق شەشىمدەرى, قالا قۇرىلىسى جانە قالالىق ورتانى وڭتايلاندىرۋ, سونداي-اق, «جاسىل» باستامالار دەپ اتالدى. ءار توپ وزدەرى تاڭداعان باعىت بويىنشا 48 ساعات ىشىندە جاڭا يدەيا ۇسىنۋ قاجەت. سوڭعى مارەگە 40 كوماندادان سۋىرىلىپ 11 كوماندا شىقتى.
– سايىس وتە قىزىقتى ءارى تارتىستى ءوتتى. ءار كوماندا وزدەرىنىڭ وزىق يدەيالارىمەن جاڭاشا كورىندى. مۇندا ءبىرىنشى ورىندى نازارباەۆ ۋنيۆەرسيتەتىنىڭ ستۋدەنتتەرى يەلەندى. ولار تۇرعىن ءۇي يەسى ۇيالى بايلانىسپەن كولىگىنە ورىن الۋ ءۇشىن RBNB ارقىلى تۇراق پايدالانۋدى ۇسىندى. ەكىنشى ورىندى قالاداعى اعىندى سۋلاردى تازارتۋعا ارناعان جوبانى بەرگەن توپ الدى. ءۇشىنشى ورىن مۇمكىندىگى شەكتەۋلى ادامدارعا IT-مەكتەبىن قۇرۋ يدەياسىن ايتقان كومانداعا بەرىلدى. جۇلدەگەرلەردىڭ ءبارى وزدەرىنىڭ يدەيالارىن «جاستار» ىقشام اۋدانىنداعى يننوۆاتسيالىق شەشىمدەر زەرتحاناسىندا «اقىلدى وكرۋگ» جوباسى اياسىندا جۇزەگە اسىرادى, – دەدى «Astana Innovation» اق باسقارما توراعاسى ولجاس سارتاەۆ.
