جانعا جايلى جاعاجاي
ەلباسى نۇرسۇلتان نازارباەۆ استانا قالاسىنداعى ورتالىق ساياباقتا بولدى.
مەملەكەت باسشىسى ساياباقتىڭ ينفراقۇرىلىمىمەن تانىسىپ, جاڭادان اشىلعان جاعاجاي ايماعىن كوردى.
سونداي-اق, نۇرسۇلتان نازارباەۆ ەلەكتروموبيلمەن قوعامدىق دەمالىس ايماقتارىن ارالاپ شىعىپ, ەلوردا تۇرعىندارىمەن اڭگىمەلەستى.
قازاقستان پرەزيدەنتى قالالىقتاردىڭ جاپپاي, بەلسەندى جانە مازمۇندى دەمالىسى ءۇشىن بارىنشا قولايلى جاعدايلار جاساۋدىڭ ماڭىزدىلىعىن اتاپ ءوتتى. مەملەكەت باسشىسىنىڭ ايتۋىنشا, مادەني-ساۋىقتىق قىزمەتتەردى ساپالى ۇيىمداستىرۋ جاستاردىڭ, اسىرەسە, جاز مەزگىلىندەگى ۋاقىتىن پايدالى وتكىزۋىنە سەپتىگىن تيگىزەدى.
سونىمەن قاتار, مەملەكەت باسشىسى اۋەسقوي ءجاسوسپىرىم بالۋانداردىڭ بەلدەسۋى ءوتىپ جاتقان ساياباقتىڭ سپورت الاڭىندا بولدى.
قالانىڭ ورتالىق ساياباعىنىڭ ينفراقۇرىلىمىن جەتىلدىرۋ جۇمىستارى اياسىندا اتتراكتسيوندار ورناتۋ جۇمىسى ءجۇرگىزىلىپ, سپورتتىق جانە ەرەسەكتەر مەن بالالارعا ارنالعان باسسەيندەرى بار زاماناۋي جاعاجاي ايماعى اشىلدى. سونداي-اق, جاتتىعۋ الاڭى, شاڭعى روللەرىنە ارنالعان ۇزىندىعى 3,8 شاقىرىم تراسساسى بار دەنە شىنىقتىرۋ جانە ساۋىقتىرۋ ايماعى اشىلعان. ساياباق اۋماعىنداعى ساۋدا نىساندارى شاھاردىڭ ارحيتەكتۋرالىق ستيلىمەن ءۇيلەستىرىلدى.
مۇندا كۇن سايىن كلاسسيكالىق جانە تانىمال مۋزىكا كونتسەرتتەرى, تازا اۋادا بۇقارالىق سپورتپەن اينالىسۋ ءتارىزدى مادەني-كوپشىلىك جانە سپورت شارالارى وتەدى. جاڭعىرتۋ جۇمىستارى ءناتيجەسىندە ساياباققا كەلۋشىلەر سانى جۇمىس كۇندەرى 3 مىڭعا دەيىن, ال دەمالىس كۇندەرى 10 مىڭعا دەيىن كوبەيدى.