الداعى جىلى استانادا وتەتىن «ەكسپو-2017» حالىقارالىق مامانداندىرىلعان كورمەسىنە قاتىساتىندىعىن بۇگىنگى كۇنگە دەيىن 105 مەملەكەت راستاسا, 82 ەل رەسمي شارتقا قول قويدى.
كەشە ەلباسى نۇرسۇلتان نازارباەۆتىڭ جاپونياعا رەسمي ساپارى اياسىندا وسى ەلدىڭ «ەكسپو-2017» حالىقارالىق مامانداندىرىلعان كورمەسىنە قاتىساتىندىعى تۋرالى شارت جاسالدى. قۇجاتقا توكيو قالاسىندا «استانا ەكسپو-2017» ۇك» اق باسقارماسىنىڭ توراعاسى احمەتجان ەسىموۆ پەن كورمەنىڭ جاپوندىق سەكتورىنىڭ كوميسسارى تومياسۋ ناكامۋرا قول قويدى.
ۇلتتىق كومپانيا باسشىسى احمەتجان ەسىموۆ جاپوندىق تاراپقا استانا قالاسىندا «بولاشاق ەنەرگياسى» تاقىرىبىندا «ەكسپو-2017» كورمەسىن وتكىزۋ باستاماسىنا قولداۋ كورسەتكەندىكتەرى ءۇشىن العىس ءبىلدىردى. ول وساكا, تسۋكۋبا جانە ايچي قالالارىندا ەكسپو كورمەلەرىن وتكىزگەن جاپونيانىڭ ءىس-تاجىريبەسى مەن تابىسى قازاقستان ءۇشىن اۋقىمدى شارانى ساپالى ۇيىمداستىرۋدىڭ جارقىن مىسالى ەكەنىن ايتتى.
– بالامالى ەنەرگەتيكا سالاسىندا الدىڭعى قاتارلاردا تۇرعان ەل رەتىندە جاپونيا «ەكسپو-2017» كورمەسىندە ءوزىنىڭ جەك سالاسىنداعى ەڭ تاماشا جەتىستىكتەرىمەن تانىستىرادى. «ەكسپو-2017» ءبىزدىڭ مەملەكەتىمىزدىڭ جاڭارتىلاتىن ەنەرگيا كوزدەرى وبلىسىنداعى عىلىمي الەۋەتىمەن تانىستىرۋعا ارنالعان الاڭعا اينالادى جانە وسى سالاداعى كوپ جاقتى ءارىپتەستىكتىڭ دامۋىنا تۇرتكى بولادى, – دەدى جاپونيا سەكتسياسىنىڭ كوميسسارى تومياسۋ ناكامۋرا.
«استانا ەكسپو-2017» حالىقارالىق مامانداندىرىلعان كورمەسىنە قاتىسۋشى ەلدەردىڭ ءتىزىمىن جاساۋ ءراسىمى ەكى كەزەڭنەن تۇرادى: كورمەگە قاتىسۋدى رەسمي تۇردە راستاۋ, سودان كەيىن قاتىسۋ شارتىنا قول قويىلادى.
بۇگىنگى تاڭدا استانادا وتەتىن حالىقارالىق كورمەگە قاتىساتىنى جونىندە ۇسىنىستاردىڭ ءالى دە تۇسەتىنى بەلگىلى بولىپ وتىر.
