استاناداعى الماتىنىڭ مادەني كۇندەرى اياسىندا مىڭ جاساعان شاھاردان كەلگەن قوناقتار ەلورداداعى ءتورت بالالار ءۇيىنىڭ تاربيەلەنۋشىلەرىنە 1000 كگ-نان اسا اپورت پەن 3000 دانا وتاندىق ءتاتتى شوكولاد سىيلادى.
الماتى قالالىق ىشكى ساياسات باسقارماسىنىڭ جەتەكشىسى نۇرلان سىدىقوۆ باستاعان دەلەگاتسيا الدىمەن SOS بالالار اۋىلىنا باردى. مۇندا 3-تەن 16 جاسقا دەيىنگى 67 بالا تۇرادى. مەيمانداردى جاس جەتكىنشەكتەر جاقسى كوڭىل-كۇيدە قارسى الدى. ولاردىڭ قويعان سۇراقتارىنا ىقىلاسپەن جاۋاپ بەردى. اسەم الماتى قالاسى تۋرالى جەتىك بىلەتىندىكتەرىن ايتتى. ءوز كەزەگىندە نۇرلان سىدىقوۆ بالالارعا مىڭ جاساپ وتىرعان شاھاردىڭ تاريحى مەن دامۋى جايىندا قىسقاشا ءسوز ءوربىتتى.
«ءبىز وسىندا كەلىپ, بالالارعا كىرمەي كەتە المادىق. بالالار – ءبىزدىڭ بولاشاعىمىز. ولاردىڭ دەنى ساۋ بولىپ وسكەنى – ءبىز ءۇشىن وتە ماڭىزدى, سوندىقتان دا دارۋمەندەردىڭ قاينار كوزى – المانى كوبىرەك الىپ كەلدىك» دەدى ول.
جەتكىنشەكتەر قىپ-قىزىل اپورتتى قۇمارتا جەپ, الىستان ادەيىلەپ كەلگەن اعالارىنا العىستارىن ءبىلدىردى.
ازامات ەسەنجول
