الەمدە, بىزبەن كورشىلەس ەلدەردە ىندەت تاعى ءورشي باستادى. دەمەك, بەيقامدىققا بوي الدىرۋعا بولمايدى دەگەن ءسوز. ساقتىقتا قورلىق جوق. سول سەبەپتەن ەلوردادا كارانتين شارالارى كۇشەيتىلەدى. قاتاڭ تالاپتاردى بۇزعان مەكەمەلەر مەن نىساندار جابىلادى. باس قالانىڭ تۇرعىندارى مەن قوناقتارى كوپشىلىك ورىنداردا بەتپەردە تاعىپ ءجۇرۋ ءتارتىبىن ساقتاعانى ءجون. قانداي جاعداي بولسا دا ءبىر-بىرىمىزگە, جاقىنىمىزعا جاناشىر بولايىق, حالايىق!
نۇر-سۇلتان قالاسى اكىمىنىڭ ورىنباسارى باقتيار ماكەننىڭ توراعالىعىمەن COVID-19 ەكىنشى تولقىنىنا دايىندىق جانە ءموبيلدى توپتار جۇمىسى تالقىلاندى.
قازاقستان رەسپۋبليكاسىنىڭ پرەزيدەنتى ق.توقاەۆتىڭ COVID-19 ەكىنشى تولقىنىنا دايىندىق تۋرالى تاپسىرماسى اياسىندا ەلوردادا كارانتين شارالارىنىڭ ساقتالۋىنا مونيتورينگ جانە باقىلاۋ جونىندەگى شارالاردى كۇشەيتۋ تۋرالى بۇيرىق بەرىلدى. ەرەجەلەردى ءجيى بۇزاتىن نىساندار: ويىن-ساۋىق مەكەمەلەرى, قوعامدىق تاماقتانۋ ۇيىمدارى – كافەلەر, مەيرامحانالار, كاراوكە, بارلار, ساۋدا ورتالىقتارى مەن بازارلار.
نۇر-سۇلتان قالاسى اكىمىنىڭ ورىنباسارى باقتيار ماكەن ءموبيلدى توپتار جۇمىسىن كۇشەيتۋدى جانە كاسىپكەرلىك سۋبەكتىلەرىنە كۇندەلىكتى تۇنگى جانە كۇندىزگى رەيدتەر جۇرگىزۋدى, كارانتيندى بۇزۋشىلاردى جاۋاپكەرشىلىككە تارتۋدى تاپسىردى.
«سونىمەن قاتار, COVID-19 ەكىنشى تولقىنى بولعان جاعدايدا ءدارى-دارمەك جەتىسپەۋشىلىگى مەن ءدارىحانالاردا باعانىڭ وسۋىنە جول بەرمەۋ قاجەت. جاۋاپتىلار ءدارى باعاسىن قاتاڭ باقىلاۋعا الۋى كەرەك. باسقا ەلدەردەن كەلەتىندەر ءۇشىن مىندەتتى پتر تەستىلەۋ قاجەت» دەدى ب.ماكەن.
ماسكا تاعۋ ءتارتىبىن ساقتاماعان ازاماتتارعا دا شارا قولدانىلادى. جينالىستى قورىتىندىلاي كەلە, جينالعاندار COVID-19 تارالۋىن بولدىرماۋعا جانە الدىن الۋعا باعىتتالعان شەشىمدەرگە قولداۋ ءبىلدىردى.
