جامبىل وبلىسىنىڭ اۋىل شارۋاشىلىق وندىرۋشىلەرى نۇر-سۇلتانعا 500 تونناعا جۋىق ءونىم اكەلدى. 3-قىركۇيەكتە ەلوردادا وتكەن اۋىل شارۋاشىلىق جارمەڭكەسىندە جامبىل وبلىسىنىڭ وندىرۋشىلەرى ءوز ونىمدەرىن ۇسىندى. وبلىستىڭ اۋىل شارۋاشىلىق تاۋارىن وندىرۋشىلەر ءوز ونىمدەرىن دەلدالسىز تىكەلەي ساتتى, سونىڭ ناتيجەسىندە ءونىمنىڭ باعاسى 10-20%-عا تومەن بولدى.
جامبىل وبلىسى اۋىل شارۋاشىلىعى باسقارماسىنىڭ باسشىسى ەربول جيەنقۇلوۆ بيىل جارمەڭكەگە 423 ميلليون تەڭگەگە 495 توننا ءونىم اكەلىنگەنىن ايتتى.
«ەلورداعا ءبىزدىڭ وڭىردەن 90-نان استام كاسىپكەر ءوز ونىمدەرىن اكەلدى. ولاردىڭ اراسىندا جىلقى ەتى, سيىر ەتى, قوي ەتى, تاۋىق ەتى, شۇجىق ونىمدەرى, ءسۇت ونىمدەرى, جۇمىرتقا, كونديتەرلىك ونىمدەر, ماكارون ونىمدەرى, بالىق, بال جانە وزگەلەرى بار. جامبىل وبلىسىنان اكەلىنگەن بارلىق ءونىم نارىقتان 15-20%-عا تومەن. سونىمەن قاتار, ءبىز وسى جارمەڭكەگە مەركىدەگى زاۋىتتان قانت جەتكىزۋدى ۇيىمداستىردىق. 10 توننا قانت اكەلىندى, ول كيلوگرامىنا 480 تەڭگەدەن ساتىلدى» دەدى باسقارما باسشىسى.
اۋىل شارۋاشىلىق وندىرۋشىلەرى استانالىقتار ءۇشىن الداعى ۋاقىتتا قولجەتىمدى باعادا كوكونىس پەن جەمىس-جيدەك ساتۋعا مۇمكىندىك بار ەكەنىن اتاپ ءوتتى. سونىمەن قاتار, مۇنداي جارمەڭكەلەر تەك تۇرعىندارعا عانا ەمەس, وندىرۋشىلەردىڭ وزدەرىنە دە پايدالى. مىسالى, مالىك جۇماعۇلوۆ ءوز ءونىمىن شۋ اۋدانىنىڭ تولە بي اۋىلىنان جەتكىزدى.
«ءبىز ەلورداعا جارمەڭكە باستالاردان ءبىر كۇن بۇرىن كەلدىك. بۇگىن تاڭعى 7-دەن باستاپ جۇمىسقا كىرىستىك. قاربىز, پياز, ءسابىز, قاۋىن جەتكىزدىك. ءبىز قاربىزدىڭ كيلوگرامىن 100 تەڭگەدەن ساتامىز. پياز دا 100 تەڭگەدەن. سۋپەرماركەتتەردە پيازدىڭ باعاسى 150-160 تەڭگە شاماسىندا بولسا, ءبىز ونى 90-100 تەڭگەدەن ساتامىز. بۇل جارمەڭكەگە ءبىز 11 توننا قاربىز اكەلدىك. قالا تۇرعىندارى ءبىزدىڭ ونىمدەرىمىزدى ۇناتىپ جاتىر. وسىنى ۇيىمداستىرعان اكىمدىككە ەرەكشە العىسىمدى بىلدىرەمىن» دەدى ول.
جارمەڭكەگە تاڭەرتەڭ كەلگەن قالا تۇرعىنى ۇيىمداستىرۋشىلارعا العىس ءبىلدىرىپ, تاۋارلار مەن باعالار تۋرالى ءوز ويىن جەتكىزدى.
«جارمەڭكەنى ۇيىمداستىرۋشىلارعا العىس ايتقىم كەلەدى. جۇرت جامبىل وبلىسىنان جەتكىزىلگەن تاۋارلاردىڭ ساپاسىنا وتە ريزا. باعالار قولجەتىمدى. ماعان قاربىز بەن قاۋىن ۇنادى. ءسۇت ونىمدەرىنىڭ, ەتتىڭ نەشە ءتۇرى بار. سونداي-اق 480 تەڭگەدەن بىرنەشە كيلوگرامم قانت ساتىپ الدىم» دەدى قالا تۇرعىنى.
ەلورداداعى وڭىرلەردىڭ اۋىل شارۋاشىلىق وندىرۋشىلەرىنىڭ جارمەڭكەسى اپتا سايىن جالعاسادى. وسى اپتادا استانالىق تۇرعىندارعا قىزىلوردا وبلىسىنىڭ ونىمدەرى ۇسىنىلادى.
گۇلشات ساپارقىزى
