كەشە قازاقستان حالقى تىلدەرى كۇنىنە وراي نۇر-Cۇلتان قالاسى اكىمدىگىنىڭ «جانۇيا» وتباسى ينستيتۋتىن قولداۋ ورتالىعىندا «قازاق ءتىلى – بابامنىڭ ءتىلى!» اتتى شارا ءوتتى.
مەملەكەتتىك ءتىلدىڭ ۇگىت-ناسيحاتىن كۇشەيتىپ, ونىڭ قولدانىس اياسىن كەڭەيتۋ ماقساتىندا وتكىزىلگەن مەرەكەلىك ءىس-شاراعا قاتىسقان پارلامەنت ءماجىلىسىنىڭ دەپۋتاتى, قازاقستان حالقى اسسامبلەياسى توراعاسىنىڭ ورىنباسارى ناتاليا دەمەنتەۆا مەملەكەتتىك ءتىلدىڭ ءمانى مەن ماڭىزىنا توقتالدى. «ەلىمىزدىڭ بولاشاعى مەملەكەتتىك ءتىلدىڭ دامۋىمەن تىكەلەي قاتىستى. سەبەبى ول – ەلىمىزدەگى 130-دان استام ۇلتتىڭ ءدىلى مەن ءتىلىن توعىستىراتىن التىن ارقاۋ. ونىڭ ۇستىنە بۇگىن قازاقتىڭ ادەبيەت زەرتتەۋشى عالىمى, تۇركىتانۋشى, پۋبليتسيست, پەداگوگ, اۋدارماشى, قازاق ءتىل ءبىلىمى مەن ادەبيەتتانۋ عىلىمدارىنىڭ نەگىزىن سالۋشى عالىم, ۇلتتىق جازۋدىڭ رەفورماتورى, اعارتۋشى احمەت بايتۇرسىنۇلىنىڭ تۋعانىنا 150 جىل تولىپ وتىر. مىنە, وسىنداي ساليقالى ساتتە ءبىر اراعا باس قوسىپ, مەملەكەتتىك ءتىلدى دامىتۋ تۋرالى تالقى وتكىزىپ جاتقانىمىزدىڭ ءوزى – مەرەي. ارينە, قازىر مەملەكەتتىك ءتىلدىڭ مارتەبەسىن كوتەرۋ – كەزەك كۇتتىرمەيتىن مىندەت. وتكەن 10-20 جىلدىڭ الدىنداعىمەن سالىستىرعاندا, ەلىمىزدە مەملەكەتتىك تىلدە سويلەيتىن وزگە ۇلت ازاماتتارى بارعان سايىن كوبەيىپ كەلەدى. مەن ءوزىم دە ۇلتىم باسقا, ورىس ءتىلدى ورتادا ءوستىم, بىراق جوعارى وقۋ ورنىندا قازاق ءتىلىن ۇيرەنىپ, 20 جىل ۇستازدىق ەتتىم. دەمەك, نيەت بولسا, مەملەكەتتىك ءتىلدى ۇيرەنۋدىڭ ەش قيىندىعى جوق. ءتىل توعىسسا, ءدىل دە توعىسادى» دەدى ول.
شاراعا نۇر-سۇلتان قالاسىنداعى ءبىر ءبولىم ءتىل جاناشىرلارى, قازاق ءتىلىن ناسيحاتتاپ جۇرگەن اق جاۋلىقتى اجەلەر, سونداي-اق وقۋ ورىندارىنىڭ تۇلەكتەرى قاتىستى.
