رەسەيدە ءوتىپ جاتقان فۋتبولدان الەم چەمپيوناتىندا جۇما كۇننىڭ كەشىنەن جەكسەنبىگە قاراعان تۇنگە دەيىن شيرەك فينالدىڭ 4 ويىنى تولىق وينالىپ ءبىتىپ, جارتىلاي فينالعا شىققان قۇرامالاردىڭ اتتارى بەلگىلى بولدى. ناتيجەسىندە قارسىلاستارىنا قاراعاندا, جارامدىلىق پەن تاباندىلىقتى ارتىق تانىتقان فرانتسيا, بەلگيا, انگليا جانە حورۆاتيا كوماندالارى وسى تورتتىكتى ءتۇزدى.
بۇگىن تۇندە سانكت-پەتەربۋرگتە فرانتسيا – بەلگيا, ال ەرتەڭ سول ۋاقىتتا ماسكەۋدە حورۆاتيا – انگليا قۇرامالارى اراسىندا جارتىلاي فينالدىق كەزدەسۋلەر وينالادى.
ۋرۋگۆاي – فرانتسيا 0:2. فرانتسۋزدار كەزدەسۋدى وتە ساۋاتتى وتكىزدى. ولار ءتىپتى چەمپيوناتتىڭ شيرەك فينالىنا تۇسەتىن وراسان زور سالماقتى دا ونشالىقتى سەزىنبەگەن سياقتى. اۋەلگىدە ەۋروپالىقتار دوپقا وزدەرى ەگەلىك ەتىپ, ماتچتى ۋىسىندا ۇستاۋعا ارەكەت ەتتى. ويىننىڭ سول ساتىندە قورعانىسقا كوبىرەك كوڭىل بولگەن ۋرۋگۆايلىقتار بۇعان ونشالىقتى قارسىلىق كورسەتە قويمادى. باسىندا ءبارى وسىلاي ۇيلەسىپ جاتتى. وسىدان-اق ولاردىڭ جىلدام ءجۇيتكىگەن قارسى شابۋىلدى وزدەرىنە نەگىزگى قارۋ ەتىپ الاتىنى كورىنىپ تۇردى. بىراق مۇنىڭ الدىنداعى ويىندا جاراقات الىپ قالعان ەدينسون كاۆانيسىز ۋرۋگۆايلىقتاردىڭ شابۋىلدارى قاۋقارسىز بولىپ شىعاتىنى ۇزاماي سەزىلىپ قالدى. مۇنىڭ ۇستىنە, ولارعا مۇنداي جورىقتاردى شۇعىل ۇيىمداستىرۋ وڭايعا سوعا بەرمەدى.
وسىلايشا فرانتسۋزداردىڭ باسىمدىلىعى بارعان سايىن ايقىندالا ءتۇستى. ولار ءبىرىنشى تايمنىڭ سوڭىندا قارسى قاقپا ماڭىندا بەلگىلەنگەن ايىپ دوبىن بەرەردە الدىن الا ويلاستىرىلعان كومبيناتسيالارىن قولدانىپ, العاشقى گولدارىن سالىپ كەتتى. ايىپ دوبىن ۇرعان انتۋان گريزمانن دوپتى قاقپا الاڭىنىڭ ورتاسىنا اۋەلەتىپ جەتكىزدى. سول جەردە رافاەل ۆاران ونى باسپەن ۇرىپ, قاقپانىڭ ءبىر بۇرىشىنا قيالاي تاستادى. ادەتتە ۋرۋگۆايلىقتار ستاندارتتى جاعدايدا وتە سەنىمدى ويناۋشى ەدى. بۇل جولى ولاردى انتۋان مەن قاقپا جانىنا سوڭعى ساتتە بارعان رافاەل الداپ ءتۇسىردى.
وسىدان كەيىن ۋرۋگۆايعا ويىندى باسقاشا قۇرۋعا تۋرا كەلدى. الايدا, زاپاستاعىلار ورىندىعىنىڭ قىسقالىعى مۇنى تۇگەل وزگەرتۋگە مۇمكىندىك بەرمەدى. سونىڭ سالدارىنان وڭتۇستىكامەريكالىقتار قارسىلاستارىنا تولىمدى قارسىلىق كورسەتە المادى. ەكىنشى تايمدا «سەلەستە» ءبىرشاما ۋاقىت تارتىستى قىزدىرا تۇسكەندەي بولىپ ەدى, الايدا ونىڭ عۇمىرى ۇزاققا بارمادى. ءبارىن قاقپاشى فەرناندو مۋسلەرانىڭ ءبىر ءساتسىز ويىنى بۇزىپ جىبەردى. ول گريزماننىڭ الىستان ۇرعان دوبىن قوس قولداپ قايتارىپ جاتىپ, تورعا قاراي جىبەرىپ الدى. وسىمەن بار ۇمىتتەرىنەن ايرىلىپ, سالدارى سۋعا كەتكەن ۋرۋگۆايلىقتار ماتچ سوڭىن سۇرەڭسىز وتكىزدى. ال جەڭىستىڭ جەلقايىعىنا مىنگەندەرىن سەزىنگەن فرانتسۋزدار تاعى ءبىراز ۋاقىت اتويلاپ بارىپ باسىلدى.
برازيليا – بەلگيا 1:2. ءدال سول جۇما كۇننىڭ تۇنىندە وڭتۇستىك امەريكانىڭ تاعى ءبىر كومانداسى – الەمنىڭ بەس دۇركىن چەمپيونى برازيليا قۇراماسى دا مۋنديالمەن قوش ايتىسۋعا ءماجبۇر بولدى.
لاتىن امەريكاسىنىڭ وكىلدەرى بىردەن شابۋىلعا كوشۋگە ۇمتىلدى. الايدا, ەۋروپالىقتار ولاردىڭ ءاربىر قادامىن جولدان كەسىپ تاستاپ وتىردى. بۇل جولى نەيمار ءوزىنىڭ «اكتەرلىك» قابىلەتى بارىن ۇمىتىپ كەتكەندەي بولدى. ءبىرىنشى گولدى 13-مينۋتتا «قىزىل پەرىلەر» سالدى. بۇدان الدىن برازيليا ويىنشىلارى بەرگەن ەكى بۇرىشتاما زالالسىز كەتىپ ەدى, بەلگيالىقتارعا كەزەك كەلگەندە, ونىڭ قاۋپى ارتا ءتۇستى. الدىمەن ناسەر شادلي بۇرىشتان دوپ لاقتىردى. ونى باسپەن اۋتقا جىبەرمەك بولعان فەرناندينو يىعىمەن قاعىپ, ءوز قاقپاسىنا ءتۇسىرىپ الدى.
ەۋروپالىقتار ەكىنشى دوپتى 31-مينۋتتا قۇيىنداي قۇيعىتقان قارسى شابۋىلدىڭ سوڭىندا سوقتى. ونىڭ بارىسىندا رومەلۋ لۋكاكۋ ءوزى العان دوپتى توقتاتپاستان كەۆين دە بريۋينەگە اسىردى. ال «مانچەستەر ءسيتيدىڭ» وكىلى ونى 10 مەتر جەردەن باعاننىڭ استىنا قاراي اتىپ جىبەردى – 2:0!
«پەنتاكامپەوندار» تەك 76-مينۋتتا عانا رەناتو اۋگۋستونىڭ كۇش سالۋىمەن ءبىر دوپتىڭ قارىمتاسىن قايتارا الدى. ول سودان 3 مينۋت قانا بۇرىن پاۋلينونىڭ ورنىنا شىققان ەدى. كەلە سالا ءبىر گول سوعىپ, ينتريگانى قىزدىرا ءتۇستى. كەزەكتى شابۋىل كەزىندە سول قاپتالدان فيليپپە كوۋتينودان دوپ العان اۋگۋستو قاقپانىڭ وڭ بۇرىشىن الا تەپتى. گول! بىراق بۇدان ارتىققا ولاردىڭ شامالارى كەلمەدى. قورعانىستا قاتەسىز ويناعان بەلگيالىقتار تابلوداعى ەسەپتى ساقتاپ قالدى.
«مەنىڭ 30 جىلدىق جاتتىقتىرۋشىلىق مانسابىم كەزىندەگى ەڭ كۇردەلى ماتچ وسى بولدى, – دەدى برازيليا قۇراماسىنىڭ باس جاتتىقتىرۋشىسى تيتە ماتچتان كەيىن. – بىراق جانكۇيەرلەر كەزدەسۋدەگى ناتيجەنىڭ سىرتىندا نەندەي نارسەلەر تۇرعانىن جاقسى كورىپ تۇر. سوندىقتان شىعار, ولار ءبىزدى جەڭىلىستەن كەيىن دە تۇسىنىستىكپەن قارسى الدى, ولار كوماندانىڭ بولاشاعىنا سەنەدى».
بەلگيا قۇراماسى وسىمەن ءوزىنىڭ تاريحىندا ەكىنشى رەت جارتىلاي فينالعا شىعىپ وتىر. جانكۇيەر قاۋىم بۇعان ونىڭ ءبىرىنشى رەت 1986 جىلى كسرو قۇراماسىمەن وتكەن كەسكىلەسكەن ويىندا قول جەتكىزگەنىن ۇمىتپاعان شىعار. سول جولى گي ءتيستىڭ شاكىرتتەرى كەڭەس فۋتبولشىلارىن 4:3 ەسەبىمەن ۇتىپ ەدى. بىراق بەلگيالىقتار بۇل جولى سونداي تابىسپەن شەكتەلىپ قالامىز دەپ وتىرعان جوق. ولار ەندى فينالدا شايقاسۋ ءۇشىن بار كۇش-جىگەرلەرىن سالاتىندارىن ايتىپ وتىر.
شۆەتسيا – انگليا 0:2. اعىلشىندار بۇل ءساتتى 28 جىل كۇتتى. ولار 1990 جىلدان بەرى قاراي بىردە-ءبىر رەت الەم چەمپيوناتىنىڭ شيرەك فينالىنان اسىپ كورمەگەن ەدى. مىنە, سول ساتسىزدىكتىڭ شىلبىرى ءۇزىلدى. ونىڭ جورالعىسى وسىنىڭ الدىندا كولۋمبيامەن كەزدەسۋدەگى پەنالتي سەرياسىندا ءبىرىنشى رەت جەڭىسكە جەتۋلەرىنەن باستالعان سياقتى.
فۋتبول وتانىنىڭ تۇلەكتەرى ويىنداعى ەكى گولدى دا باسپەن سوقتى. «ءۇش ارىستان» شۆەتسيانى بۇل جولى زاڭدى تۇردە ۇتتى. ويىن بارىسىندا ولاردىڭ باسىم بولعانىنا ەشكىمنىڭ كۇمانى جوق شىعار. ولار سول باسىمدىقتى 30-مينۋتتا گولعا اينالدىردى. وندا گارري ماگۋاير كوزگە ءتۇستى. ال ەكىنشى دوپ 59-مينۋتتا دەلە اللي مەرگەندىگىمەن سالىندى. بىراق ورتاق جەڭىسكە ۇلەس قوسقان جالعىز بۇل ەكەۋى عانا ەمەس. كوماندالىق ويىندا وسى ۇتىستى ۇتىمدى ەتۋگە اتسالىسقاندار جەتەرلىك. بىراق قورعانىس شەبىنىڭ كوپ قاتەلىككە ۇرىنۋى بۇل ناتيجەنى وزگەرتىپ جىبەرۋى مۇمكىن ەدى. سول كەزدە جاس قاقپاشى دجوردان پيكفورد بارىنشا شەبەرلىك كورسەتىپ, ءوزىنىڭ قاقپاسىن گولدان امان ساقتاپ قالدى.
رەسەي – حورۆاتيا 1:1. ويىن ەموتسيالىق تۇرعىدا قىزۋ سيپاتتا ءوتتى. سوعان قاراماستان, بۇل قۇرامالار كەزەكتى مارتە نەگىزگى ۋاقىتتا دا, قوسىمشا ۋاقىتتا دا تەڭ ويناپ, جەڭىمپازدى ويىننان كەيىنگى پەنالتيلەر سەرياسىندا انىقتادى. بۇدان بۇرىنعىلاردان ايىرماشىلىعى, بۇل جولى وۆەرتايمدا دا قارسىلاستار ءبىر-بىرلەرىنە گول سوعا الدى. ءسويتىپ, نەگىزگى جانە قوسىمشا ۋاقىتتاردا 2:2 دەگەن ەسەپ تىركەلدى. تەك پەنالتيدە حورۆاتتار 4:3 بولىپ باسىم ءتۇستى.
ماتچتى ءبىرشاما قارقىندى باستاعان رەسەيلىكتەر 31-مينۋتتا ەسەپ اشتى. ونى دەنيس چەرىشەۆ قاقپا الاڭىنىڭ سىرتىنان قاتتى ۇرىپ ءتۇسىردى. بىراق بۇل كەزدە حورۆاتيا ويىن تىزگىنىن تولىق دەرلىك ءوز قولىنا الىپ العان ەدى. سوندىقتان ونىڭ ەسەپتى تەڭەستىرۋىنە دە كوپ ۋاقىت كەتكەن جوق. الدىمەن سول قاپتالدان يۆان سترينيچ العا ۇمتىلىپ, ماريو ماندجۋكيچكە پاس جەتكىزدى. ول ءوز كەزەگىندە رەسەيلىكتەر شەبىنە كىرىپ, قاقپا الدىنا كولبەي دوپ تاستادى. وعان بارىنەن بۇرىن جەتكەن اندرەي كراماريچ باسپەن ۇرىپ, قاقپادان ءبىر-اق شىعاردى. قارسىلاستار بۇدان كەيىن ەكسترا-تايمدا تاعى ءبىر-ءبىر گولدان سوقتى. ولاردى الاڭ يەلەرى ساپىنان ماريو فەرناندەس (115), حورۆاتتاردان دوماگوي ۆيدا (101) ءتۇسىردى.
سونىمەن, رەسەيلىكتەردىڭ الەم چەمپيوناتىنداعى ەرتەگىگە بەرگىسىز ساياحاتى وسى ويىنمەن بىرگە اياقتالدى. باس جاتتىقتىرۋشى ستانيسلاۆ چەرچەسوۆتىڭ قۇراماسى تاعى ءبىر سەنساتسيا جاساپ, جارتىلاي فينالعا شىعۋعا ءسال عانا قالىپ بارىپ توقتادى.
