كەلەر جىلى 200-گە تارتا جاياۋ جۇرگىنشىلەردىڭ جولىنا قوسىمشا شامدار ورناتىلاتىن بولادى.
استانا اكىمى اسەت يسەكەشەۆ قالامىزداعى جاياۋ جۇرگىنشىلەردىڭ قاتىسۋىمەن بولاتىن جول-كولىك اپاتتارىنىڭ الدىن الۋ ءۇشىن سول جولدارعا قوسىمشا جارىق ورناتۋدى تاپسىردى.
وسى ماقساتتا استانا قالاسىنىڭ ەنەرگەتيكا باسقارماسى مەن ءىىد بىرلەسە وتىرىپ, قالامىزداعى رەتتەلمەيتىن جاياۋ جۇرگىنشى جولدارىنىڭ جارىقپەن قانشالىقتى قامتىلعانىن سارالادى. ناتيجەسىندە 200-گە جۋىق جاياۋ جۇرگىنشى جولىنىڭ جارىقپەن جابدىقتالۋى ناشار ەكەندىگى انىقتالعان. بۇل دەگەنىمىز – ءتۇن مەزگىلىندە, جاۋىن-شاشىن كۇندەرىندە كولىك جۇرگىزۋشىلەرى جاياۋ جۇرگىنشىلەردى كورە الماي قالۋ قاۋپى جوعارى جەر تەلىمدەرى بارىن بىلدىرەدى.
ەنەرگيا كوزدەرىن جاڭارتۋ جوباسىنىڭ باسشىسى رۋستام قادىروۆتىڭ ايتۋىنشا, جوبا استانانىڭ بارلىق اۋماعىن قامتىپ وتىر. «بۇگىندە ءبىز 200-گە جۋىق جاياۋ جۇرگىنشى جولىنا قوسىمشا جارىق بەرەتىن شامدار ورناتۋدى قولعا الامىز. بۇل جوباعا وڭ جاققا بۇرىلۋ جولىنداعى جاياۋ جۇرگىنشى جولى مەن اۋلا ىشىلىك جولدار كىرمەيدى» دەدى ول.
جاۋاپتى مەكەمەلەر جۇرگىزگەن ساراپتاماعا سايكەس, ەگەر جاياۋ جۇرگىنشى جولىنىڭ بويىندا نەمەسە جانىندا ەنەرگيا قۋاتى تارتىلاتىن بولسا, قوسىمشا شامدارعا جارىق
سودان الاتىن بولادى. ەگەر ونداي مۇمكىندىك بولماعان جاعدايدا, بالاما قۋات كوزدەرىن پايدالاناتىن شامدار قويىلاتىن بولادى. تاپسىرما بويىنشا جوبا 2018 جىلى تولىق ورىندالۋى ءتيىس.
گۇلدانا تالعاتقىزى
