نۇر-سۇلتان قالاسىنداعى №25 ورتا مەكتەپتە قورعانىس مينيسترلىگىنىڭ ۇيىمداستىرۋىمەن «ايبىن» اسكەري-پاتريوتتىق جيىنداردىڭ بەس جىلدىعىنا وراي اسكەري-قولدانبالى جانە ينتەللەكتۋالدى سپورت تۇرلەرىنەن كورسەتىلىم ءوتتى.
اتاپ ايتقاندا, 17-22 ماۋسىم ارالىعىندا قاراعاندى وبلىسىندا وتەتىن رەسپۋبليكالىق سايىسقا نۇر-سۇلتان قالاسىنىڭ نامىسىن قورعايتىن №25 مەكتەپتىڭ «جاس بۇركىت» اسكەري-پاتريوتتىق كلۋبى ءوز دايىندىقتارىن كورسەتتى. جاسوسپىرىمدەر اۆتوماتتى دالدەپ اتۋ, اۆتوماتتى شاشىپ-جيناۋ, اسكەري كيىمدى ۋاقىتقا كيۋ, تۋرنيككە تارتىلۋ جانە باسقا دا شەبەرلىكتەرىن ورتاعا سالدى.
«ءساۋىر ايىندا بولعان ىرىكتەۋ كەزەڭىنەن وتكەن 10 ۇل جانە 5 قىزىمىز اسكەري كلۋبتا ۇيرەنگەن جاتتىعۋلارىن كورسەتتى. بۇلار – 12 مەن 17 جاس ارالىعىنداعى وقۋشىلارىمىز. ەندى ولار نۇر-سۇلتان قالاسىنىڭ اتىنان ۇلكەن جارىسقا تۇسەدى. جەڭىسكە جەتىپ قانا قويماي, قىزىقتى ەموتسيالار مەن جاڭا دوستار تابادى دەپ ويلايمىن» دەيدى قورعانىس مينيسترلىگىنىڭ يدەولوگيالىق جۇمىستار بويىنشا باسقارماسى باسشىسىنىڭ ورىنباسارى, كاپيتان ەربولات ءجۇسىپوۆ.
ارايلىم امىربەكقىزى,
ل.گۋميلەۆ اتىنداعى ەۋرازيا
ۇلتتىق ۋنيۆەرسيتەتىنىڭ ستۋدەنتى
