بيىل ەلوردادا اشىلعان مۋزىكالىق جاس كورەرمەن تەاترى العاشقى ماۋسىمىن تاۋەلسىزدىك كۇنى قارساڭىندا ۇلى ابايدىڭ مەرەيتويىنا وراي زاڭعار جازۋشى مۇحتار اۋەزوۆتىڭ «اباي-توعجان» مۋزىكالىق دراماسىمەن اشتى. سالتاناتتى شارانىڭ اشىلۋىنا قالا اكىمى التاي كولگىنوۆ قاتىسىپ, جاس ونەر ۇجىمىنا شىعارماشىلىق تابىس تىلەسە, قازاقستاننىڭ ەڭبەك ەرى ءاسانالى ءاشىموۆ ىستىق ىقىلاستى لەبىز ءبىلدىردى.
باس شاھاردىڭ رۋحاني-مادەني ومىرىنە مازمۇندى مانەرىمەن قوسىلىپ وتىرعان ونەر ورداسى جاس ۇرپاقتىڭ بويىنا رۋحاني قۇندىلىقتاردى دارىتىپ, وتاندىق جانە الەمدىك مۋزىكالىق قويىلىمداردى ساحنالاۋ ارقىلى بالالار مەن جاسوسپىرىمدەردىڭ مادەني-ەستەتيكالىق الەمىن, تانىم-تاعىلىمىن, شىعارماشىلىق الەۋەتىن جەتىلدىرۋگە باعىتتالعان. تەاتردىڭ ديرەكتورى – قازاقستاننىڭ ەڭبەك سىڭىرگەن قايراتكەرى, بەلگىلى رەجيسسەر اسحات ماەميروۆ.
ونەر ورداسى ءوز جۇمىسىن وتكەن ءبىرىنشى قازاننان باستادى. 28-30 قىركۇيەكتە كاستينگ وتكىزىپ, تەاترعا 50-دەن استام ونەرلى جاستاردى تاڭداپ الدى. ولاردىڭ قاتارىندا قازاقستاننىڭ ەڭبەك سىڭىرگەن قايراتكەرى, 71-كانن حالىقارالىق كينوفەستيۆالىنىڭ جەڭىمپازى سامال ەسلياموۆا, «دارىن» مەملەكەتتىك جاستار سىيلىعىنىڭ لاۋرەاتتارى ايان وتەپبەرگەن, اسىلحان تولەپوۆ, ءادىلحان ماكين جانە راسۋل ۋسمانوۆ سەكىلدى تالانتتى جاستار بار.
ەلىمىزدەگى تەاتر الەمىندە العاش ساحنالانعان «اباي-توعجان» قويىلىمى – جاستاردىڭ جۇرەك قىلىن شەرتىپ, وي-ارماندارىن اسقاقتاتاتىن تۋىندى. مۇندا الىپ اقىننىڭ بوزبالا كەزەڭىن بەينەلەگەن وقيعالار كورەرمەندى ىڭكار سەزىمگە بولەدى. جاس ابايدىڭ جۇرەگىندە ويانعان العاشقى ماحابباتى, كوكىرەگىندە تۋعان تۇڭعىش جىرى دا اۋەزدى انگە اينالىپ, كورگەن ادامنىڭ جۇرەك پەرنەسىن تەربەتتى. اقىننىڭ توعجانعا دەگەن سىرلى سەزىمى ومىرگە دەگەن قۇشتارلىققا ۇلاسىپ, اسقاق ماحابباتىنىڭ تەمىرقازىعىنا اينالدى. قويىلىمدا اقىننىڭ ويلى جىرلارى مەن ەستى اندەرى ورىندالعاندا, ساحنا اسەم تۇرگە ەندى. بۇل تۋىندىنىڭ ينستسەنيروۆكاسىن جاس تەاترتانۋشى ميراس ءابىل جازعان. ساحناعا قويعان رەجيسسەر اسحات ماەميروۆتىڭ وقيعانى وربىتۋدەگى تاپقىرلىعى قويىلىمداعى ۇتىمدى كورىنىستەر ارقىلى شىنايى كورىندى. سپەكتاكلدەگى رولدەردى ويناعان اكتەرلەردىڭ ونەرى دە ەشكىمدى بەيجاي قالدىرمادى. جالپى بۇل قويىلىمدى جۇرتشىلىققا ۇسىنۋ بارىسىندا مۋزىكالىق كەڭەسشى ديماش قۇدايبەرگەننىڭ, قويۋشى-سۋرەتشى الما سىرباەۆانىڭ, كومپوزيتور باۋىرجان اقتاەۆتىڭ, بالەتمەيستەر شىرىن مۇستافينانىڭ, حورمەيستەر عالىمجان بەرەكەشەۆتىڭ ەڭبەكتەرى دە بار ەكەندىگىن ايتا كەتەيىك.
قويىلىمنىڭ پرەمەراسى 15-16 جەلتوقساندا دا جالعاسادى.
