استانا مەديتسينا ۋنيۆەرسيتەتىندە ەلباسىنىڭ تاياۋدا حالقىمىزعا ارناعان «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىن تالقىلاعان جيىن ءوتتى. وعان قر ءبىلىم جانە مينيسترلىگىنىڭ ماماندارى, وقۋ ورداسىنىڭ ۇستازدارى مەن ستۋدەنتتەرى قاتىستى.
جيىندا قر ءبىلىم جانە عىلىم مينيسترلىگىنىڭ جاۋاپتى وكىلى نۇريلا قىدىرباەۆا پرەزيدەنتتىڭ جولداۋدا ايتىلعان وزەكتى ماسەلەلەرىن ءسوز ەتتى.
«بالالاردى مەكتەپكە دەيىنگى ۇيىمداردا بىلىممەن قامتۋ – ەڭ ماڭىزدى نارسە. ولار ءبىرىنشى سىنىپقا كەلگەندە جوعارى دەڭگەيدە دايىن بولۋ قاجەت. بۇل – ۋاقىت تالابى. دامىعان ەلدەردە بۇعان ەرەكشە ماڭىز بەرەدى. قازىر مەملەكەت پەن جەكەمەنشىك ارىپتەستىك جاقسى دامىپ كەلەدى. ەلىمىزدەگى جەكەمەنشىك بالاباقشالاردىڭ ۇلەسى 30 پايىزعا جەتتى. ال رەسپۋبليكا بويىنشا 3 پەن 6 جاستاعى بالالاردى بالاباقشامەن قامتۋ 95 پايىزدى قۇرادى. الداعى جىلى مۇنى 100 پايىزعا جەتكىزۋ كوزدەلىپ وتىر. بۇل كورسەتكىش باس قالادا 80 پايىزدى كورسەتەدى. قازىر مينيسترلىك بالالاردى 1 مەن 3 جاستان باستاپ دامىتۋ باعدارلاماسىن قولعا الىپ جاتىر» دەدى مينيسترلىك وكىلى.
سونداي-اق بالاباقشا تاربيەشىلەرىنىڭ ءبىلىم ساپاسىن كوتەرۋ ءۇشىن جىل سايىن 1 مىڭعا جۋىق مامان كۋرستان وتسە, ەندى ونىڭ سانىن 15 مىڭعا كوتەرۋ كوزدەلگەن. سونىمەن قاتار تاربيەشىلەردە مەكتەپ مۇعالىمدەرى سەكىلدى ۇلتتىق تەستىلەۋدەن ءوتىپ, ولارعا جاڭا كاتەگوريالار بەلگىلەنىپ, ەڭبەكاقىلارى وسەدى.
قازىر قوعامدا جەتكىنشەكتەردىڭ ءومىرى مەن دەنساۋلىعىن قورعاۋدا وزەكتى ماسەلەنىڭ بىرىنە اينالعان. ەلىمىزدەگى مەكتەپتەردىڭ 80 پايىزى, بالاباقشالاردىڭ 60 پايىزى بەينەباقىلاۋمەن جابدىقتالعان. ال ەلورداداعى ءبىلىم ورىندارىنا بەينەباقىلاۋ 100 پايىز ورناتىلسا, بالاباقشالاردا 62 پايىز قويىلعان.
قر ءبىلىم جانە عىلىم مينيسترلىگىنىڭ وكىلى الداعى ۋاقىتتا جوعارى وقۋ ورىندارىنا تالاپ كۇشەيەتىندىگىن ايتتى. «ەندى ءبىز جوعارى وقۋ ورىندارى مەن كوللەدجدەردەگى ءبىلىم ساپاسىن تۇلەكتەردىڭ جۇمىسقا تۇرۋ رەيتينگىسىمەن باعالايمىز. ەگەر دە وقۋ ورنىن بىتىرگەن جاس مامان ءوز ماماندىعى بويىنشا جۇمىس تابا الماسا, ول ماماندىقتىڭ ليتسەنزياسى قايتارىلادى. بيىل وسىنداي 25 ماماندىقتىڭ ليتسەنزياسى قايتارىلدى» دەدى نۇريلا قىدىرباەۆا.
