كەشە «قولجەتىمدى باسپانا – 2020» باعدارلاماسى اياسىنداعى جاس وتباسىلاردى باسپانامەن قامتۋ تەتىگى ىسكە قوسىلىپ, حالىققا قىزمەت كورسەتۋ ورتالىقتارىندا قۇجاتتاردى قابىلداۋ باستالدى. وسىعان بايلانىستى استانا قالاسى تۇرعىن ءۇي باسقارماسى باسشىسىنىڭ ورىنباسارى رۋسلان احمەتوۆتى اڭگىمەگە تارتتىق.
– باعدارلاماعا قاتىسۋعا نيەتتى جاستارعا قانداي تالاپتار قويىلىپ وتىر؟
– باعدارلاماعا كەمىندە ەكى جىل نەكەدە تۇرعان جانە ەرلى-زايىپتىلاردىڭ ەكەۋى دە 29 جاسقا تولماعان جاس وتباسىلار قاتىسادى. سونداي-اق, استانا قالاسىندا كەمىندە ەكى جىل تىركەلىمى بار تولىق ەمەس وتباسىلار ءوتىنىش بەرە الادى. وندا دا بالالاردى تاربيەلەۋشىلەردىڭ بىرەۋى 29 جاسقا تولماعان بولۋى كەرەك.
– وتباسىلاردى ىرىكتەۋ بالدىق جۇيە ارقىلى جۇرگىزىلەدى دەپ ەستىگەن ەدىك. وسىنىڭ جايىن تۇسىندىرسەڭىز.
– بۇل جۇيە بويىنشا ءبىر بالاعا 20 بالدان, ءاربىر ەكىنشى جانە ودان كەيىنگى بالالارعا 30 بالدان قوسىلىپ وتىرادى. سونىمەن قاتار, كوميسسيا ءوتىنىش بەرۋشىلەردىڭ سوڭعى بەس جىلدا قازاقستان رەسپۋبليكاسىنىڭ اۋماعىندا مەنشىكتە ءۇي بولۋىن جانە ونى يەلىكتەن شىعارۋ جاعدايلارىن تەكسەرەدى. مۇنىمەن قوسا, وتباسىنداعى سوزىلمالى اۋرۋلاردىڭ كەيبىر اۋىر تۇرلەرىمەن اۋىراتىن نەمەسە مۇگەدەك ءاربىر مۇشەسى ءۇشىن 10 بالل; مەملەكەتتىك باعدارلامالار شەڭبەرىندە الدىنداعى ىرىكتەۋ كەزەڭىندە سالىنعان تۇرعىن ءۇيدىڭ تىزىمىنە قوسىلماعان ۇمىتكەرلەر ءۇشىن 5 بالل; كامەلەتكە تولعانعا دەيiن اتا-انالارىنان ايىرىلعان, 29 جاسقا تولماعان جەتىم بالالار مەن اتا-انا قامقورلىعىنسىز قالعان بالالار ساناتىنا جاتاتىن ەرلى-زايىپتىلاردىڭ اربىرەۋى ءۇشىن 10 بالل قوسىلادى.
– بيىل قانشا جاس وتباسىن باسپانامەن قامتاماسىز ەتەمىن دەپ جوسپارلاپ وتىرسىزدار؟ ولارعا ارنالعان تۇرعىن ءۇي قۇرىلىسى جۇمىستارىنان دا حابار بەرسەڭىز.
– وسى جىلدىڭ قازان ايىندا 672 جاس وتباسى تىلەنديەۆ داڭعىلىنىڭ وڭتۇسىتىگىنە قاراي ورنالاسقان جالپى اۋدانى 27,2 مىڭ شارشى مەتر تۇرعىن ءۇي كەشەنىندە قونىس تويىن تويلايتىن بولادى. سونىمەن قاتار, سارايشىق كوشەسىنىڭ وڭتۇستىگىندە جالپى اۋدانى 28,3 شارشى مەتر 430 پاتەرلىك تۇرعىن ءۇي تاپسىرىلادى. جالپى, بىلتىر باعدارلاما اياسىندا «كەزەكتە تۇرعاندار مەن جاس وتباسىلارعا ارنالعان باسپانا قۇرىلىسى» باعىتى بويىنشا 6 تۇرعىن ءۇي كەشەنىن سالۋ قولعا الىندى. قۇرىلىس باسقارماسى كەلەسى جىلى برۋسيلوۆسكي-يمانوۆ-جۇبانوۆ كوشەلەرىنىڭ اۋماعىندا ورنالاسقان 272 پاتەرلىك تۇرعىن ءۇي كەشەنىن, سونداي-اق, سارىبۇلاق وزەنىنىڭ بويىندا تىلەنديەۆ داڭعىلىنىڭ وڭتۇستىگىندە ورنالاسقان جالپى اۋدانى 14,6 مىڭ شارشى مەتر 295 پاتەرلىك جانە جانە جالپى اۋدانى 22,9 مىڭ شارشى مەتر 530 پاتەرلىك ەكى تۇرعىن ءۇي كەشەنىن پايدالانۋعا بەرمەك.
– قۇجاتتاردى قابىلداۋ قاي ۋاقىتقا دەيىن جۇرگىزىلەدى؟
– اتالعان كريتەريلەر بويىنشا ازاماتتاردان قۇجاتتاردى قابىلداۋ 14 ماۋسىمعا دەيىن حالىققا قىزمەت كورسەتۋ ورتالىقتارىندا ءۇزىلىسسىز جۇرگىزىلەدى. سوندىقتان باعدارلاماعا ىلىگەمىن دەيتىن جاستاردا ءالى ەكى اپتاداي ۋاقىت بار.
امانعالي شميتۇلى
