«Kulanshi» زاماناۋي ونەر ورتالىعى مەن ەۋرازيالىق ونەر اكادەمياسى ەلوردادا «ءبىر قادام العا» اتتى جاس سۋرەتشىلەردىڭ كورمەسىن ۇيىمداستىردى. كورمەنىڭ كۋراتورى – بەينەلەۋ ونەرى سالاسىنداعى فيلوسوفيا دوكتورى, ەۋرازيالىق ونەر اكادەمياسىنىڭ پرەزيدەنتى لەيلا ماحات.
ۆەرنيساجدا قازاقستاندىق جاس سۋرەتشىلەر دانيار مۇحامبەتوۆ, يۋليا موسكالەنكو, ءازيز سارامبەتوۆ, جەڭىس مولدابەكوۆ, ەلەنا ميرونەنكو, ءمادينا قۋانىشەۆا, قانات ءابديننىڭ جانە اۆستريالىق فلوريان مەسنەردىڭ تۋىندىلارى قويىلدى. ونەرتانۋشىلاردىڭ ايتۋىنشا, جاس سۋرەتشىلەردىڭ كارتينالارى ەلىمىزدىڭ بەينەلەۋ ونەرىنىڭ دامۋىنداعى جاڭا كەزەڭدى بەينەلەيدى, جاڭا كوزقاراس, جاڭا يدەيا تۋدىرادى.
اسىرەسە ۆەناداعى فانتاستيكالىق رەاليزم مەكتەبىنىڭ وكىلى, سۋرەتشى فلوريان مەسنەردىڭ جۇمىسى كوپشىلىكتىڭ نازارىن اۋداردى. ونىڭ كارتينالارى ادام ءومىرىنىڭ ءار قادامى تۋرالى ويلانۋعا جەتەلەيدى.
«ءبىز ادامدار وزدەرىنىڭ شىنايى بولمىسىن بىلمەيتىن قوعامدا ءومىر ءسۇرىپ جاتىرمىز. مەنىڭ كارتينالارىم ادامداردى وياتۋعا شاقىرادى» دەيدى سۋرەتشىنىڭ ءوزى فلوريان مەسنەر.
جاس سۋرەتشىلەر كورمەسى 15 تامىزعا دەيىن جالعاسادى.
بايان اسىلبەكوۆا
