وتكەن جەكسەنبىدە ەلوردادا Nur-Sultan Half Marathon ءبىرىنشى جارتىلاي مارافونى ءوتتى. جۇگىرۋ EXPO اۋماعىنان باستالدى, وندا قازاقستاننان جانە الەمنىڭ 24 ەلىنەن كەلگەن 4 مىڭ اۋەسقوي سپورتشى نۇر-سۇلتاننىڭ ەڭ ادەمى جەرلەرىمەن جۇگىردى.
بارلىق قاتىسۋشىلاردى قر مادەنيەت جانە سپورت ءمينيسترىنىڭ ورىنباسارى سەرىك جاراسباەۆ پەن نۇر-سۇلتان قالاسى اكىمىنىڭ ورىنباسارى ەرلان بەكمۇرزاەۆ قارسى الدى. ۇلتتىق عىلىمي كارديوحيرۋرگيالىق «جۇرەك ورتالىعىنىڭ» ديرەكتورى تاتيانا يۆانوۆا-رازۋموۆا مەن جارىس ديرەكتورى سالتانات قازىباەۆا ءسوز سويلەدى.
مارافون قورىتىندىسى بويىنشا ەرلەر اراسىندا 21 كم-دە ريناس احمادەەۆ جەڭىمپاز اتاندى. ونىڭ مارەگە جەتۋ ۋاقىتى – 1 ساعات 2 مينۋت 54 سەكۋند. بۇل – Nur-Sultan Half Marathon تراسساسىنىڭ 21,1 كم-دەگى جاڭا ءابسوليۋتتى رەكوردى.
كوشباسشىلار ابسوليۋتتىك ەسەپتە 21 شاقىرىمعا اقشالاي جۇلدە قورىن ءوزارا ءبولىستى: ءبىرىنشى ورىن – 450 مىڭ تەڭگەدەن, ەكىنشى ورىن – 400 مىڭ تەڭگەدەن, ءۇشىنشى ورىن – 350 مىڭ تەڭگەدەن. جاس ساناتى بويىنشا جەڭىمپازدار (10 كم جانە 21,1 كم) سەرىكتەستەردەن سىيلىق الدى.
ءوز كۇشىن سىناۋ ءۇشىن الماتىدان كەلگەن جارىس ءفيناليسىنىڭ ءبىرى رۋسلان وگلوۆ جارتىلاي مارافوندى ۇيىمداستىرۋ جانە تراسسادان العان اسەرىمەن ءبولىستى.
– جۇگىرۋمەن كوپتەن بەرى اينالىسىپ كەلەمىن. مەن بۇل تراسسانى تاڭدادىم, ويتكەنى ول – الماتىمەن سالىستىرعاندا وتە جەڭىل, بيىكتىگى وتە تومەن, رەكوردتار ءۇشىن ءدال كەلەتىن جول. بۇگىن مەن 10 كم قاشىقتىقتا جەكە رەكورد ورناتتىم, الدىڭعى جەكە رەكوردىمدى وسىدان ون جىل بۇرىن, قازاقستان چەمپيونى بولعان كەزدە ورناتتىم. قازىر مەن اۋەسقويمىن جانە جۇمىستى جاتتىعۋلارمەن ۇيلەستىرەمىن, بۇل وتە قيىن. بۇدان دا جاقسى ناتيجە كورسەتۋىمە بولار ەدى, بىراق ۇيقىمنىڭ قانباۋى جانە تولقىعانىم كەدەرگى كەلتىردى, – دەپ ءوز ويىمەن ءبولىستى سپورتشى.
مارەگە جەتكەن بارلىق جەلاياقتى ساحنادا مۋزىكالىق توپتاردىڭ ورىنداۋىمەن جەڭىمپازداردى ماراپاتتاۋ, سونداي-اق جارتىلاي مارافون سەرىكتەستەرىنىڭ ۇتىس ويىنىمەن ۇلكەن ويىن-ساۋىق باعدارلاماسى كۇتىپ تۇردى.
استانا حالىقارالىق مارافونىندا 75 جاستاعى مارات بالتاباەۆ 21 شاقىرىمدى ەڭسەرىپ, وزىپ كەلدى. اقساقال ءۇشىن بۇل ءبىرىنشى مارافون ەمەس. جۇگىرۋ – ونىڭ ءحوببيى. «جاقسى جۇگىرىپ شىقتىم, بىراق وتە ىستىق بولدى. الماتىدا ءساۋىر ايىندا 1 ساعات 49 مينۋت, ال بۇگىن 1 ساعات 50 مينۋت جۇگىردىم. 21 شاقىرىمدى ەڭسەردىم» دەيدى ەڭ قارت مارافونشى.
