«جاس جۇرەك جايىپ ساۋساعىن…»
«استانا» كونتسەرت زالىندا «ۇلى دالا جاستارى» اتتى ادەبي-مۋزىكالىق كەش جانە وسى اتاۋمەن «قورقىت» ءداستۇرلى ساز توبىنىڭ كونتسەرتى ءوتتى. استانا قالاسى مەملەكەتتىك اكادەميالىق فيلارمونياسى ۇيىمداستىرعان بۇل كەشتەردە جاس اقىنداردىڭ جىرلارى وقىلىپ, جاس كومپوزيتورلاردىڭ شىعارمالارى ورىندالدى.
تالانتتى جاستاردى قولداۋ ماقساتىندا وتكەن ادەبي-مۋزىكالىق كەشتە فيلارمونيانىڭ قازاق وركەسترىنىڭ سۇيەمەلدەۋىمەن حالىقارالىق جانە رەسپۋبليكالىق بايقاۋلاردىڭ لاۋرەاتتارى مۇراتبەك حايرولدا, ديانا ماي, جاقسىگەلدى ماياساروۆ اندەردى اۋەلەتتى. دارىندى ءبيشى كوركەم شولوشوۆا مىڭ بۇرالا بيلەدى. «استانالىق» تسيرك ءارتىسى حورلان جانمىرزاەۆا ءوزىنىڭ ءنومىرىن ۇسىندى.
قۋات ەجەمبەك, جادىرا بايبۇلانوۆا سەكىلدى جاس اقىندار جىر وقىدى. بارىنەن قىزىعى, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى ورال ابدراۋوۆ پەن قازاق ۇلتتىق ونەر ۋنيۆەرسيتەتىندە «ءداستۇرلى جىر» ماماندىعىندا وقىپ جاتقان سۇلۋجان تاۋبالدىنىڭ ايتىسى بولدى. قىز بەن جىگىت ايتىسىن جاساعان اقىندار كورەرمەننىڭ دەلەبەسىن قوزدىردى.
كەش بارىسىندا نۇرلان بەكەنوۆ, ارمان جايىم, ءابدىجالي بەكنۇر سياقتى كومپوزيتورلاردىڭ تۋىندىلارى شىرقالدى.
بىزدە جاس كومپوزيتورلار بارشىلىق ەكەن. «قورقىت» توبىنىڭ كونتسەرتىندە سازگەرلەر شەرۋىن كوردىك دەسەك, ارتىق ايتقانداي بولماس. توپتىڭ قۇرامىندا مۋزىكانتتار عانا ەمەس, ءان جازۋمەن اۋەستەنەتىندەر دە بارىن كوردىك. ولار كۇردەلى شىعارمالاردى دا شىعارادى. اتاپ ايتساق, ەرمۇرات ۇسەنوۆ پەن سەرىكجان جانە ءالىبي ءابدىنۇروۆتاردىڭ شاكىرتتەرى ارۋجان ەسىركەپ «ورتەكە ءبيى» تۋىندىسىن, ازامات ابدراحيەۆ دومبىرا مەن فورتەپيانوعا ارنالعان «جاس تالاپ» پەساسىن ۇسىندى. بۇعان قوسا, قۋات نۇرقوجا, راحمەت قۋانىش, ەركەعالي ماحمۇتقان, دايانا تۇرمانوۆا, ءۋالي داۋرەن, عايسا توعجان, ءادىلجان توبجانوۆ, اليزات دۇزەلباي, ولجاس بايبەك, ۇكىتاي ەرنيازوۆ, ايبەك ارىمبەك سىندى سازگەرلەردىڭ شىعارمالارى ورىندالدى.
«جاس جۇرەك جايىپ ساۋساعىن, تالپىنعان شىعار ايعا الىس» دەپ ۇلى اباي ايتپاقشى, بۇل كونتسەرتتەردەن جاستاردىڭ جالىنىمەن قاتار سەزىمى دە كورىندى.