2016 جىلدىڭ 14 قاڭتارىندا پرەزيدەنت نۇرسۇلتان نازارباەۆ قازاقستان حالقى اسسامبلەياسىنىڭ قۇرىلعان كۇنىن, ياعني 1 ناۋرىزدى العىس ايتۋ كۇنى ەتىپ جاريالادى.
مۇنداي مەرەكەنىڭ كوكتەمنىڭ العاشقى كۇنى قازاق جەرىندە تويلانۋىنىڭ سەبەبى بار. بۇل اسسامبلەيانىڭ كوپ جىلعى ەل اراسىن جاقىنداتۋعا سەبەپ بولعان قىزمەتىنىڭ ناتيجەسى دەر ەدىم.
وسى جىلدارى اسسامبلەيانىڭ بەلسەندى ءبىر مۇشەسى رەتىندە بار كۇش-جىگەرىمىزدى قوعامدا ەتنوسارالىق كەلىسىمدى جانە تولەرانتتىقتى ودان ءارى نىعايتۋ ءۇشىن قولايلى جاعداي جاساۋعا, ەل بىرلىگىن نىعايتۋعا جۇمساپ كەلەمىز.
قازاق باۋىرلارىمىزدىڭ توپتاستىرۋشىلىق ءرولىن ارقاۋ ەتە وتىرىپ, ەلىمىزدەگى ءپاتريوتيزمدى, ەتنوسارالىق كەلىسىمدى قامتاماسىز ەتۋ ءبىزدىڭ باستى ۇستانىمىز بولىپ وتىر.
قازاقستان حالقى اسسامبلەياسى جۇمىسىنا شولۋ جاساپ وتىرعانىم بەكەر ەمەس, العىس ايتۋ كۇنى وسى قۇرىلىمنىڭ قۇرىلعان كۇنىنە بايلانىپ تۇر.
العىس ايتۋ – ادامزات بالاسىنىڭ جاقسى قاسيەتىنىڭ ءبىرى. اللاعا رازىلىعىمىز ەشقاشان اۋزىمىزدان تۇسپەگەن حالىقتىڭ وكىلىمىز. وسى كۇنى قازاقستاندا جاساپ جاتقان وزگە ۇلت وكىلدەرىنىڭ مەملەكەت قۇرۋشى قازاق حالقىنا العىس ايتۋدىڭ ءمان-ماعىناسى جۇرەكتى ەرەكشە تولقىتادى.
راس بىزدەردىڭ كوبىمىز, اسىرەسە كورەي, نەمىس, ينگۋش-شەشەن حالىقتارى وسى ەلگە كەڭەستىك زوبالاڭ كەزىندە كەلدى. ادام باسى تۇگىل تۇتاس حالىقتى تەڭسەلتىپ جىبەرگەن زاماندا قۇشاعى كەڭ قازاقتىڭ قۇشاعىنا كەلىپ تىعىلدى. ۇلتى – تۇرىك, جانى قازاق اسىلى اليقىزى وسماننىڭ ايتاتىن جاقسى ءسوزى بار, ول قيىن كەزەڭدە «جارتى قۇرتتى جارىپ, ءبۇتىن قۇرتتى ءبولىپ جەدى» دەگەنىندەي, قازاق ەشكىمدى جاتسىنعان جوق. جارتى قۇرتتىڭ قۋاتى بويىمىزعا ءنار, تىرلىگىمىزگە كۇش بەرگەن.
سول جاقسىلىقتى كورگەن انالارىمىزدان «قازاقتىڭ الدىنا تۇسپەڭدەر» دەگەن اماناتىن بىزدەر دە قۇلاعىمىزعا قۇيىپ وستىك.
ال كەيىنگى ۇرپاق شە؟! مىنە, بۇل مەرەكە كەيىنگى ۇرپاق ءۇشىن كەرەك. تاريحىمىزدىڭ اقتاڭداق بەتتەرىن جادىندا ساقتاۋى ءۇشىن, تار زاماندا تابىسقان حالىقتىڭ باتىل ارەكەتىن ۇلىقتاۋ ءۇشىن, قيىن-قىستاۋ زاماندا دا جاماندىققا جاقسىلىقپەن قايتارۋدىڭ نە ەكەنىن ءبىلۋى ءۇشىن قاجەت.
حاسان شاريپوۆ,
قازاقستانداعى وزبەك
ەتنومادەني بىرلەستىگى
توراعاسىنىڭ ورىنباسارى,
قحا مۇشەسى
