جاستار بيزنەسكە جاقىن بولسا…
نۇر-سۇلتان قالاسىنىڭ جاس كاسىپكەرلەرى ستۋدەنتتەرمەن كەزدەسىپ, وزدەرىنىڭ بيزنەس باستاۋداعى تاجىريبەلەرىمەن ءبولىستى.
«استانا جاستارى» كوممۋنالدىق مەملەكەتتىك مەكەمەسىنىڭ ۇيىمداستىرۋىمەن وتكەن جيىنعا قوعامدىق دامۋ ىستەرى باسقارماسىنىڭ باسشىسى دانيار ەسين مەن سالا ماماندارى قاتىستى. مەكەمە باسشىسىنىڭ ورىنباسارى اقەركە اقتايدىڭ ايتۋىنشا, جىل باسىنان بەرى ءارتۇرلى تاقىرىپتا وتكىزىلگەن 81 شارا 4757 ادامدى قامتىعان. بۇل – 82-شارا.
«Alay food» كومپانياسىنىڭ نەگىزىن قالاۋشى اينۇر ءامىرحان مەن الەۋمەتتىك كاسىپكەر, «Green tal» الەۋمەتتىك كاسىپكەرلىك مەكتەبىنىڭ نەگىزىن قالاۋشى ەمين اسكەروۆ جانە «Rocket study» ءبىلىم بەرۋ اكسەلەراتورىنىڭ جوبا مەنەدجەرى ءدامىر تولەنوۆ وزدەرىنىڭ بيزنەستى قالاي باستاعاندارىن, ونىڭ جولىندا قانداي ساتسىزدىكتەر مەن قيىندىقتاردىڭ بولعانىن كەڭىنەن اڭگىمەلەدى.
– كاسىپپەن اينالىساتىن ادام نەبىر تاۋەكەلگە بەل بۋىپ, قورقىنىشىن جەڭە ءبىلۋى كەرەك. ءار سالاداعى مىقتى ساراپشىلار – وتە كوپ قاتەلىك جاساعاندار. ياعني نەعۇرلىم كوپ قاتە جىبەرسەڭىز, سوعۇرلىم مىقتى ساراپشى بولۋعا مۇمكىندىك ارتا تۇسەدى, – دەدى ەمين اسكەروۆ.
شارا بارىسىندا جيىنعا قاتىسۋشى جاستار سپيكەرلەرگە وزدەرىنىڭ سۇراقتارىن قويدى. ولاردىڭ ساۋالدارىنا جاۋاپ بەرگەن بيزنەسمەندەر ءتۇرلى كەڭەستەرىن ايتىپ, جاستاردى كاسىپپەن اينالىسۋعا شاقىردى.