تاۋەلسىزدىك سارايىندا حالىقارالىق بالالاردى قورعاۋ كۇنىنە وراي «سيقىرلى بوياۋلار الەمى» اتتى كورمە ءوتتى. بۇل كورمەگە قالالىق «ەسىل» بالالار كوركەمونەر مەكتەبىنە باراتىن 5 جاستان 16 جاسقا دەيىنگى جەتكىنشەكتەردىڭ 100-دەن اسا جۇمىسى قويىلدى.
شارانىڭ اشىلۋىندا ءسوز العان اتالعان مەكتەپتىڭ مۇعالىمى گۇلشارا التىنساريەۆا: «حالقىمىزدا «بۇلاق كورسەڭ كوزىن اش» دەگەن ناقىل بار. ءبىز دە ونەرگە تالپىنعان بالالارعا دۇرىس جول كورسەتسەك دەدىك. كورمەدەگى تۋىندىلاردى ءبىر كۇندە, ءبىر اپتادا جاساعان جوقپىز. بۇل – وقۋشىلاردىڭ ءبىر جىلدىق جۇمىسىنىڭ جەمىسى. وسى جەردە اتا-انالارعا دا العىسىمدى ايتىپ وتسەم دەيمىن. بولاشاقتا وسى جەتكىنشەكتەر اراسىنان تانىمال سۋرەتشىلەر شىعىپ جاتسا, ءبىزدىڭ ەڭبەگىمىزدىڭ جانعانى دەپ ويلايمىن» دەدى ول.
بالالاردىڭ قولىنان شىققان كارتينالار شىنايىلىعىمەن كوز تارتادى. بوياۋلارى دا اشىق, كومپوزيتسيالىق قۇرىلىمى دا كوركەم. ءبىر بايقاعانىمىز, جەتكىنشەكتەر ءوز جۇمىستارىندا تابيعاتتى, جان-جانۋارلاردى, اسەم ەلوردانىڭ بيىك ۇيلەرىن شەبەر بەينەلەگەن. ماسەلەن, رامازان ءىزىم اتتى بالانىڭ «جازعى كورىنىس» دەگەن تۋىندىسىندا اقباس تاۋدىڭ ەتەگىندەگى اۋىل, سارقىراعان وزەن, قۇستارى شۋىلداعان توعاي, جالعىز اياق جول – ءبارى جاراسىمدى ۇيلەسىم تاپقان. بۇل سۋرەتتى توعىز جاستاعى بالا ەمەس, كانىگى قىلقالام شەبەرىنىڭ قولىنان شىققان دەپ ويلايسىز. وسىنداي دۇنيەلەردى باسقالاردىڭ دا جۇمىستارىنان كەزدەستىرەسىز.
كورمەگە قوناق بولىپ كەلگەن قازاقستان سۋرەتشىلەر وداعىنىڭ مۇشەسى ەركىنبەك ەسىموۆ جەتكىنشەكتەردىڭ شىعارماشىلىعىن جوعارى باعالاپ, ولارعا ساتتىلىك تىلەدى. سىرباز سۋرەتكەر ورالحان بوكەيدىڭ «قۇم مىنەزى» پوۆەسىنىڭ ءبىر كەيىپكەرى «قۇمدار ءان سالادى» دەپ تولعانۋشى ەدى. بىلە بىلسەك, قۇم عانا ەمەس, بوياۋلار دا ءان سالادى ەكەن. ءبىز ونى بالالار قولىنان شىققان كارتينالارداعى بوياۋدان اڭعاردىق.
