كەشە قازاقستان رەسپۋبليكاسىنىڭ قورعانىس ءمينيسترى نۇرلان ەرمەكباەۆ, استانا قالاسىنىڭ اكىمى باقىت سۇلتانوۆ, «جاس سارباز» جاسوسپىرىمدەر اسكەري-پاتريوتتىق قوزعالىسى» رەسپۋبليكالىق قوعامدىق بىرلەستىگىنىڭ توراعاسى, اعا لەيتەنانت مەيىربەك مەڭدىعاليەۆ جاستارعا اسكەري-پاتريوتتىق تاربيە بەرۋ سالاسىنداعى ىنتىماقتاستىق جانە ءوزارا ءىس-قيمىل جونىندەگى مەموراندۋمعا قول قويدى.
مەملەكەت باسشىسى نۇرسۇلتان نازارباەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى حالىققا جولداۋىندا بالالار-جاسوسپىرىمدەر بىرلەستىگىن قۇرىپ, مەكتەپتەردە اسكەري-پاتريوتتىق تاربيەنىڭ ءرولىن كۇشەيتۋ تۋرالى تاپسىرما بەرگەن ەدى. وسىنى اتاپ وتكەن نۇرلان ەرمەكباەۆ «جاس سارباز» قوعامدىق بىرلەستىگى ەلباسىنىڭ بۇل تاپسىرماسىن جۇزەگە اسىرۋ ماقساتىندا قۇرىلعانىن ايتتى.
«بۇل بىرلەستىكتىڭ فيليالدارى بارلىق وبلىستاردا قۇرىلىپ, ءوز جۇمىستارىن باستاپ كەتتى. بۇگىندەرى وڭىرلەردەگى 100-دەن اسا مەكتەپتە «جاس سارباز» سىنىپتارى اشىلدى. ول سىنىپتاردا 3 مىڭنان اسا بالا وقىپ جاتىر. جالپى ەل بويىنشا 3 مىڭنان اسا اسكەري-پاتريوتتىق كلۋب قۇرىلدى. ولار 74 مىڭ بالا مەن جاسوسپىرىممەن جۇمىس ىستەپ جاتىر. سونىڭ ىشىندە استانا اكىمدىگى بۇل جۇمىسقا بەلسەندى قاتىسۋعا نيەت ءبىلدىردى. ەلوردا – ەل جۇرەگى, ەلىمىزدىڭ رۋحاني, ساياسي ورتالىعى بولعاندىقتان, اسكەري-پاتريوتتىق تاربيەدە وزگە وڭىرلەرگە ۇلگى بولاتىنىنا سەنىمدىمىز. 2019 جىل – قازاقستان پرەزيدەنتىنىڭ جارلىعىمەن جاستار جىلى بولىپ جاريالانعاننان كەيىن مۇنداي اسكەري-پاتريوتتىق جۇمىستىڭ وزەكتىلىگى بۇرىننان دا ارتا ءتۇستى.
اسكەري-پاتريوتتىق تاربيە تەحنيكالىق جانە سپورتتىق ءبىلىم بەرۋ عانا ەمەس, بولاشاق وتان قورعاۋشىلاردى تاربيەلەۋدى ماقسات ەتەدى» دەدى قورعانىس ءمينيسترى.
باقىت سۇلتانوۆ ب مەملەكەت تاراپىنان وسكەلەڭ ۇرپاقتى قولداۋعا ماڭىزدى قادامدار جاسالىپ جاتقانىن ايتا كەلە, استانادا جاستار جىلىنىڭ اياسىندا اتقارىلاتىن شارالارعا توقتالدى.
«ەلوردادا «استانا جاستارى-2019» وڭىرلىك جول كارتاسى ازىرلەندى. سوعان سايكەس 11 باعىت بويىنشا 600-دەي شارا وتكىزىلەتىن بولادى. جوبالار جاستاردىڭ الەۋمەتتىك جاعدايىن كوتەرۋگە, ءبىلىم, دەنساۋلىق ساقتاۋ, جۇمىسپەن قامتۋ سالالارىندا الەۋەتىن ارتتىرۋعا جانە ولاردىڭ شىعارماشىلىق باستامالارىن قولداۋعا, اسكەري-پاتريوتتىق, وتانسۇيگىشتىك سانانى نىعايتۋعا باعىتتالعان. بۇل جوبالاردى جۇزەگە اسىرۋعا ەلوردانىڭ بارشا جاستارى قاتىساتىن بولادى.
ەلباسى نۇرسۇلتان نازارباەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا كوتەرگەن ماڭىزدى ماسەلەلەردىڭ ءبىرى – پاتريوتتىق تاربيە بەرۋ ءىسى. بۇل رەتتە استانادا «جاس سارباز» بالالار جانە جاسوسپىرىمدەردىڭ قالالىق قوعامدىق بىرلەستىگى قۇرىلىپ, ءبىلىم ۇيىمدارىندا اسكەري-پاتريوتتىق تاربيەنىڭ ءرولىن كۇشەيتۋگە ارنالعان بىرقاتار جوبالاردى جۇزەگە اسىرۋدا. قازاقتا «ەلدى قورعاۋ – ەردىڭ ءىسى, ەردى قورعاۋ – ەلدىڭ ءىسى» دەگەن قاناتتى ءسوز بار. تاريحتا قايسار مىنەزبەن, دانالىقپەن تانىلعان ەلمىز. سوندىقتان دا جاستارىمىزدى جاقسىلىققا, وتانسۇيگىشتىككە, قايسارلىق پەن تاباندىلىققا تاربيەلەيتىن مۇنداي جوبالاردى ىسكە اسىرۋعا ءبىر كىسىدەي اتسالىسۋىمىز قاجەت. بۇگىنگى قول قويىلعان قۇجات ءبىزدىڭ بىرلەسكەن ءىس-قيمىلىمىزدى ايقىنداپ, جاس ورەندەردىڭ اسكەري-پاتريوتتىق تاربيەسىن جان-جاقتى دامىتۋعا, ولاردىڭ باستامالارىن قولداۋعا سەپتىگىن تيگىزەتىنىنە سەنەمىن» دەدى استانا اكىمى.
«جاس سارباز» جاسوسپىرىمدەر اسكەري-پاتريوتتىق قوزعالىسى» رەسپۋبليكالىق قوعامدىق بىرلەستىگىنىڭ العاشقى فيليالى استانادا وتكەن جىلدىڭ جەلتوقسان ايىندا اشىلدى. وسى فيليالدىڭ توراعاسى اسحات باعداتۇلى الدارىنا جۇكتەلگەن مىندەتتى ورىندايتىندارىن جەتكىزدى.
