ستاتيستيكا كوميتەتىنىڭ مالىمەتىنشە, بۇگىندە ەلوردادا 14 پەن 29 جاس ارالىعىنداعى 245 مىڭ ادام تۇرادى. ونىڭ 82 مىڭى – ستۋدەنتتەر بولسا, 126 مىڭى – جۇمىس ىستەپ, قالانىڭ قارقىندى دامۋىنا ۇلەس قوسىپ جۇرگەن جاستار. ەلباسى تاپسىرماسىمەن جاستار جىلى بولىپ جاريالانعان 2019 جىلى ولاردىڭ ءومىر ءسۇرۋ ساپاسىن ارتتىرۋدا مەملەكەت تاراپىنان بىرقاتار جۇمىس اتقارىلدى.
العا قويىلعان مىندەتتەردى ءتيىمدى ورىنداۋ ماقساتىندا جىل باسىندا شاھار اكىمدىگى «نۇر-سۇلتان جاستارى – 2019» اتتى جول كارتاسىن ازىرلەدى. اتالعان قۇجاتقا سايكەس 11 باعىت بويىنشا 136 جوبا مەن 600 ءىس-شارا جوسپارلاندى. مۇنىڭ بارلىعىنا 2 ملرد-تان اسا تەڭگە ءبولىندى. الگى ءىس-شارالاردىڭ قاتارىنا جاستارعا ارنالعان ينفراقۇرىلىم, ءبىلىم بەرۋ, جۇمىسپەن قامتۋ, قولجەتىمدى باسپانا, كاسىپكەرلىك پەن قارجىلىق ساۋاتتىلىق, دەنساۋلىق ساقتاۋ, مادەنيەت, سپورتپەن شۇعىلدانۋ, سالاۋاتتى ءومىر سالتىن ۇستانۋ, ۆولونتەرلىك قىزمەت, تالانتتى جاستاردى قولداۋ جانە باسقا دا ماڭىزدى سالالار كىردى.
جۇمىسپەن قامتۋ قارقىندى جۇرگىزىلدى
«ەكى قولعا ءبىر كۇرەك» ىزدەگەن جاستارعا باس قالادا بارىنشا قولايلى جاعداي جاسالدى. بۇل تۇستا ەلورداداعى جۇمىسپەن قامتۋ ورتالىعىنىڭ ءرولى زور ەكەنىن ايتا كەتۋ كەرەك. اتالعان ۇيىمنىڭ اقپاراتىنا سۇيەنسەك, 2019 جىلعى 1 قاراشاعا دەيىنگى ون اي ىشىندە 5086 استانالىق جاس جۇمىسسىزدىقتان الەۋمەتتىك قورعاۋ شارالارىمەن قامتىلدى. ولاردىڭ باسىم بولىگى قوعامدىق جۇمىس پەن جاستار پراكتيكاسىنا جىبەرىلدى, سونداي-اق الەۋمەتتىك جۇمىسقا دا تارتىلدى. ال 16 مەن 29 جاس ارالىعىنداعى 261 ادام قىسقامەرزىمدى كۋرستاردا وقىتىلدى. شاشتاراز, بەت ارلەۋشى, تىگىنشى سەكىلدى قازىرگى تاڭداعى سۇرانىسقا يە ءارى تابىسى دا قوماقتى ماماندىق تۇرلەرىن يگەرۋ ارقىلى ولارعا جاڭا مۇمكىندىكتەردىڭ ەسىگى اشىلدى.
بۇدان بولەك, 1121 ادام كاسىپكەرلىك نەگىزدەرىن ۇيرەندى. ونىڭ ىشىندە 516 جاس ۇمىتكەرگە جاڭا بيزنەس-جوبالارىن جۇزەگە اسىرۋ ءۇشىن مەملەكەتتىك گرانت بەرىلدى. «جاس كاسىپكەر» باعىتى بويىنشا ءبىلىم العانداردىڭ قاتارىندا 220 ادام وزدەرىنىڭ جەكە كاسىپتەرىن اشۋعا گرانت الدى.
«بيزنەستىڭ جول كارتاسى – 2020» باعدارلاماسى اياسىندا استانالىق 25 جاس كاسىپكەرگە – 75 ملن تەڭگە, ال «جاس كاسىپكەر» باعدارلاماسى بويىنشا 110 ملن تەڭگە ءبولىندى.
سونىمەن قاتار بالالار ءۇيىنىڭ تۇلەكتەرىنە, سونداي-اق ەرەكشە قاجەتتىلىكتى تالاپ ەتەتىن جاستاردىڭ جۇمىسقا ورنالاسۋىندا دا ۇسىنىلىپ جاتقان كومەك ەداۋىر. مىسالى, جىل باسىنان بەرى بالالار ءۇيىنىڭ 8 تۇلەگى جۇمىسقا تۇرۋعا ءوتىنىش بەرسە, ونىڭ بەسەۋى جۇمىسسىزدىقتان الەۋمەتتىك قورعاۋ شارالارىمەن قامتىلدى, ۇشەۋى جۇمىسقا ورنالاسىپ, ال ەكەۋى مەملەكەتتىك قىزمەتكە جىبەرىلدى. ەرەكشە قاجەتتىلىكتى تالاپ ەتەتىن جاستارعا كەلسەك, وسى ساناتقا جاتاتىن 105 جاس الەۋمەتتىك قورعاۋ شارالارىمەن قامتاماسىز ەتىلگەن. ونىڭ ىشىندە 11-ءى – تۇراقتى جۇمىسقا, 8-ءى – الەۋمەتتىك جۇمىس ورىندارىنا, ۇشەۋى – جاستار پراكتيكاسىنا, 81-ءى الەۋمەتتىك جۇمىسقا تارتىلدى.
جوعارىدا اتالعان شارالاردىڭ بارلىعى NEET (Not in Education, Employment or Training, ياعني «نە جۇمىس ىستەمەيتىن, نە وقىمايتىن, وزگە دە ىستەرمەن اينالىسپايتىن» دەگەن ماعىنانى بەرەدى) جاستاردىڭ سانىن ازايتۋعا مۇمكىندىك بەرگەنىن ايتا كەتكەن ابزال. 2019 جىلدىڭ ەكىنشى توقسانىنداعى ناتيجەگە سەنسەك, قالاداعى NEET جاستاردىڭ ۇلەسى 6,8 پروتسەنتتى قۇرايدى. 2018 جىلعى جاعدايمەن سالىستىرعاندا كورسەتكىش 0,4 پروتسەنتكە تومەندەگەن.
باسپانالى بولۋ بۇيىردى
بيىل ەلوردادا تۇڭعىش رەت جۇمىس ىستەيتىن جاستار ءۇشىن 1050 پاتەر بەس جىلعا جالعا بەرىلدى. مۇنىڭ ىشىندەگى 848-ءى – اۋدانى 30-دان 55 شارشى مەترگە دەيىنگى ءبىر بولمەلى پاتەرلەر, قالعانى – ەكى جانە ءۇش بولمەلىك پاتەرلەر. ۇمىتكەرلەردەن ءوتىنىش قابىلداۋ 5-12 قاراشا ارالىعىندا www.smart.astana.kz پورتالىندا ەلەكتروندى تۇردە جۇرگىزىلدى. بارلىعى 6 304 ادامنان قۇجات قابىلدانىپ, 3520-سى بايقاۋعا قاتىسۋعا جىبەرىلگەن. پاتەر كىلتىن العان جاستار الداعى قاڭتاردان باستاپ قونىس تويىن تويلايدى. بەس جىل ىشىندە ولاردىڭ جاڭا پاتەر ساتىپ الۋعا العاشقى جارنانى ەمىن-ەركىن جيناپ الۋىنا مۇمكىندىگى مول.
قازاقستانداعى جاستار جىلى
«نۇر-سۇلتان جاستارى – 2019» اتتى جول كارتاسىن ازىرلەدى. اتالعان قۇجاتقا سايكەس 11 باعىت بويىنشا 136 جوبا مەن 600 ءىس-شارا جوسپارلاندى. مۇنىڭ بارلىعىنا 2 ملرد-تان اسا تەڭگە ءبولىندى.
1121 ادام كاسىپكەرلىك نەگىزدەرىن ۇيرەندى. ونىڭ ىشىندە 516 جاس ۇمىتكەرگە جاڭا بيزنەس-جوبالارىن جۇزەگە اسىرۋ ءۇشىن مەملەكەتتىك گرانت بەرىلدى. «جاس كاسىپكەر» باعىتى بويىنشا ءبىلىم العانداردىڭ قاتارىندا 220 ادام وزدەرىنىڭ جەكە كاسىپتەرىن اشۋعا گرانت الدى.
«بيزنەستىڭ جول كارتاسى – 2020» باعدارلاماسى اياسىندا استانالىق 25 جاس كاسىپكەرگە – 75 ملن تەڭگە, ال «جاس كاسىپكەر» باعدارلاماسى بويىنشا 110 ملن تەڭگە ءبولىندى.
بيىل ەلوردادا تۇڭعىش رەت جۇمىس ىستەيتىن جاستار ءۇشىن 1050 پاتەر بەس جىلعا جالعا بەرىلدى.
2019 جىلعى 1 قاراشاعا دەيىنگى ون اي ىشىندە 5086 استانالىق جاس جۇمىسسىزدىقتان الەۋمەتتىك قورعاۋ شارالارىمەن قامتىلدى.
بۇعان قوسىمشا, قالا اكىمدىگى شاھاردىڭ مۋنيتسيپالدى قىزمەتىنىڭ بىلىكتى كادرلىق كورپۋسىن قۇرۋ بويىنشا جۇمىس اتقارۋدا. سونىڭ بارىسىندا ءبىلىم بەرۋ جانە دەنساۋلىق ساقتاۋ مەكەمەلەرىنىڭ قىزمەتكەرلەرىنە, سونداي-اق پوليتسيا دەپارتامەنتىنىڭ وكىلدەرىنە پاتەر ساتىپ الۋعا
1 ملن تەڭگە كولەمىندە كومەك بەرىلەدى. بۇل سوما يپوتەكالىق
نەسيە راسىمدەۋگە قاجەتتى العاشقى جارنانىڭ بولىگى رەتىندە جۇمسالادى. وسى جىلى اتالعان باعىت بويىنشا 22 ادام باسپاناعا قول جەتكىزدى.
دەنساۋلىق ماسەلەسى دە ەسكەرۋسىز قالمادى
جاستار جىلىندا سپورت پەن دەنساۋلىق سالالارى دا نازاردان تىس قالعان جوق. جاستاردىڭ دەنساۋلىعىن نىعايتۋ ماقساتىندا ەلوردادا بيىل 87 سەمينار وتكىزىلدى. وندا رەپرودۋكتيۆتى دەنساۋلىقتى ساقتاۋ, سونداي-اق ەرتە جانە قالاۋسىز جۇكتىلىكتىڭ قاۋىپتەرى, جقتب/اقتب-نىڭ الدىن الۋ جولدارى سەكىلدى تاقىرىپتارعا جاستارمەن اشىق اڭگىمە جۇرگىزىلدى. بۇدان بولەك, مەكتەپ وقۋشىلارى العاشقى مەديتسينالىق كومەك كورسەتۋدىڭ نەگىزدەرىنە ۇيرەتىلدى.
قالا اكىمدىگى ۇسىنعان دەرەكتەرگە نازار سالساق, جاستار اراسىنداعى ءسۋيتسيدتىڭ الدىن الۋ اياسىندا توتەنشە پسيحياتريالىق كومەك جونىندەگى ماماندار مەكتەپ وقۋشىلارىمەن جانە ۋنيۆەرسيتەت-كوللەدج ستۋدەنتتەرىمەن 50-دەن اسا ءدارىس پەن دوڭگەلەك ۇستەل وتكىزدى.
جاستارعا ارنالعان سپورت كلۋبتارىن دامىتۋ بويىنشا دا ءبىرقاتار شارۋا اتقارىلدى. سونىڭ بارىسىندا دجيۋ-دجيتسۋ, تاەكۆوندو, كاراتە سەكىلدى بىرنەشە سپورت تۇرلەرىنەن تەگىن ۇيىرمەلەر ىسكە قوسىلدى. جالپى بۇگىندە استانادا 719 سپورت كەشەنى بار.
