«اق جول» پارتياسىنىڭ ۇگىت-ناسيحات توبى جاس سايلاۋشىلارمەن جانە «اق جول» پارتياسىنىڭ قۇرداستارىمەن كەزدەسۋ وتكىزدى.
ءىس-شارا جاڭا تەحنولوگيالاردى ازىرلەۋمەن قازاقستان, قىرعىزستان, وزبەكستان, رەسەي بويىنشا تاۋارلاردى جەتكىزۋمەن اينالىساتىن «KBT Store» كومپانياسىندا ءوتتى. كومپانيادا 18-35 جاس ارالىعىنداعى 1200 ادام جۇمىس ىستەيدى. كاسىپورىندى «100 جاڭا ەسىم» بايقاۋىنىڭ جەڭىمپازى, ءماجىلىس دەپۋتاتتىعىنا كانديدات, «اقجولدىق» ازات سەمبينوۆ باسقارادى.
ءوز سوزىندە ازات پەرۋاشەۆ «اق جول» پارتياسىنىڭ قۇرداستارىن ومىرلەرىندەگى العاشقى سايلاۋمەن, ءبىرىنشى داۋىس بەرۋلەرىمەن قۇتتىقتادى.
– «اق جول» پارتياسىنا 18 جىل تولدى, وتكەن ۋاقىت ىشىندە ءۇش رەت پارلامەنتكە ءوتتى. كوپشىلىگىڭىز ءبىرىنشى رەت داۋىس بەرمەكسىزدەر. بۇل سىزدەردىڭ ساياسي وسۋلەرىڭىز جانە وسى ساتتە دۇرىس تاڭداۋ جاساۋ وتە ماڭىزدى, – دەدى ول ءوزىنىڭ قۇتتىقتاۋىندا.
«اق جول» كوشباسشىسى پارتيانىڭ سايلاۋالدى باعدارلاماسى تۋرالى ايتىپ, بيزنەستى قولداۋ جانە الەۋمەتتىك ادىلەتتىلىك تۋرالى بولىمدەرگە ەرەكشە توقتالدى.
– «اق جول» پارتياسى قازاقستاندى مۇمكىندىكتەر مەملەكەتىنە اينالدىرۋعا ۇمتىلۋدا. قازاقستاندا ءومىر ءسۇرۋ جانە جۇمىس ىستەۋ, وتانىمىزدا ءجۇرىپ دامۋ پەرسپەكتيۆالارى جاستار ءۇشىن كەز كەلگەن باسقا ەلدەرگە قاراعاندا الدەقايدا تارتىمدى بولۋى ءتيىس. سىزدەردىڭ ارالارىڭىزدا – بولاشاق مينيسترلەر, كومپانيا باسشىلارى, بيزنەسمەندەر بار. ءسىز ءوز ويىڭىزدى كەدەرگىسىز جۇزەگە اسىرا الاتىن, كەتكىڭىز كەلمەيتىن ەلدە ءومىر ءسۇرۋىڭىز كەرەك. ءبىز دارىندى جاستاردىڭ ەلدەن كەتۋىنە قارسىمىز. جىل سايىن قازاقستاننان مىڭداعان دارىندى جاس جىگىتتەر مەن قىزدار كەتىپ, قايتىپ ورالمايدى, بۇل – ءبىزدىڭ ۇلتتىق قاسىرەتىمىز, – دەپ اتاپ ءوتتى پەرۋاشەۆ.
ول ءوز سوزىندە پارتيانىڭ جاستاردى قولداۋ جونىندەگى باستامالارىنا ەرەكشە نازار اۋداردى. اتاپ ايتقاندا: «اق جولدىڭ» وتباسىلاردىڭ يپوتەكالارىن سۋبسيديالاۋ تۋرالى, اۋىلداعى قولجەتىمدى سپورت كەشەندەرىنىڭ قاجەتتىلىگى تۋرالى, بالالار مەن جاستارعا ارنالعان تەگىن سپورت سەكتسيالارى, جۇمىسشى جاستارعا ارنالعان قولجەتىمدى تۇرعىن ءۇي سالۋ تۋرالى ۇسىنىستار.
– بۇگىندە ۇكىمەتتىك باعدارلامالار كوپبالالى وتباسىلارعا باعىتتالعان. بىراق ەشقانداي وتباسى بىردەن ۇلكەيىپ كەتپەيدى. جاستاردى ءاربىر كەزەكتى بالانىڭ دۇنيەگە كەلۋىنە كەزەڭ-كەزەڭىمەن ىنتالاندىرۋ كەرەك. «اق جول» پارتياسى 2012 جىلدان باستاپ مىناداي ۇسىنىس جاساپ كەلەدى: ءبىرىنشى بالا تۋعان كەزدە جانە ودان ءارى ءاربىر كەلەسى بالا تۋعاندا 25%-عا سۋبسيديالاپ, 4-ءشى بالا تۋعان كەزدە وتباسىنىڭ يپوتەكاسىن 0%-عا دەيىن تومەندەتە وتىرىپ, كوپبالالى وتباسى ساناتىنا اۋىستىرىلادى.
قالالارعا كوشەتىن اۋىل جاستارىن قولداۋ ءۇشىن اكىمدىكتەر شاعىن وندىرىستەرگە, ءبىلىم بەرۋ مەكەمەلەرىنە جانە الەۋمەتتىك ينفراقۇرىلىمعا ارنالعان ءۇي-جايلارى بار ىقشام الەۋمەتتىك تۇرعىن ۇيلەردى جاپپاي سالۋى ءتيىس. مۇنداي تۇرعىن ءۇي قاراپايىم جانە ارزان بولۋى كەرەك, سوندىقتان جاستار قالادا بەيىمدەلىپ, ءبىلىم الىپ, جۇمىس ىستەي باستايدى, اياققا تۇرىپ, وزدەرىنە ىڭعايلى جاعداي جاسايدى.
قازاقستاننىڭ بولاشاعى – سىزدەر, ءبىز بىرگە وتانىمىزدى كوركەيتۋىمىز كەرەك! – دەپ پەرۋاشەۆ جاس سايلاۋشىلاردى دۇرىس تاڭداۋ جاساۋعا شاقىردى.
«اق جول» پارتياسىنىڭ سايلاۋالدى ۇگىت-ناسيحات جۇمىستارى جالعاسۋدا.
