«استانا كوگالداندىرۋ قۇرىلىسى» اكتسيونەرلىك قوعامى ەلوردانى جاسىل جەلەككە بولەپ, كوشەلەرگە گۇل, اعاشتار وتىرعىزىپ, اۋاسىن تازارتۋ ءۇشىن قىرۋار جۇمىستار اتقارۋدا. الايدا, اۋلا ءىشى مەن جول جيەكتەرىن كوگالداندىرۋ ماسەلەلەرىندە تۇرعىندار تاراپىنان كەيبىر نارازىلىقتار تۋىنداپ قالاتىنى جاسىرىن ەمەس. وسى جانە باسقا دا تۇيتكىلدى ساۋالدارعا جوعارىدا اتالعان مەكەمەنىڭ جاڭا باسقارما توراعاسى ايبار ءناۋرىزالى جاۋاپ بەرەدى.
– قالادا اعاش وتىرعىزۋ قالاي?
– جاپىراعى جايقالا ءوسىپ تۇرعان اعاش قالاعا ءسان بەرەتىنى ءوز الدىنا, ول اۋانى دا تازارتادى. جازدا كولەڭكەسىنەن سايا تاۋىپ, ادامدار دەمالا الادى. سوندىقتان, ەلوردادا اعاشتى قانشا وتىرعىزسا دا ارتىقتىق ەتپەيدى. ءبىز جوسپارلى تۇردە شىرشا, تال, قاراعاي, سامىرسىن, قايىڭ, ەمەن, تاعى باسقا اعاشتاردى وتىرعىزامىز. راس, شىرشا ۇزاق وسەتىندىكتەن, تۇرعىندار تاراپىنان كەيبىر رەنىشتەر دە ەستىلىپ قالىپ جاتادى. دەگەنمەن, ونىڭ جاسىل ءتۇسى قىسى-جازى توڭىرەگىنە ەرەكشە اسەمدىك ۇيالاتاتىنىن دا ۇمىتپاۋ كەرەك.
الداعى كوكتەمنەن باستاپ ءوز پيتومنيگىمىزدەن جاپىراقتى ۇلكەن اعاشتاردى, ون مەترلىك قايىڭ اعاشتارىن وتىرعىزۋ جوسپارلانۋدا. ءارى ونى الداعى ناۋرىز ايىنا دەيىن وتىرعىزىپ بولۋىمىز قاجەت. ايتپەسە, كەشىگەمىز. نەگىزىنەن العاندا, ەلوردادا اعاش ەگۋ ۋاقىتىندا جوسپارلى جۇرگىزىلۋدە.
– گۇلزارلاردا سايالايتىن اعاش از دەگەنگە نە ايتاسىز؟
– كەلىسەمىن. ويتكەنى, گۇلزارلارعا كوبىنە تال نەمەسە ءالسىز, الاسا اعاشتار ەگىلىپ, ولار تامىر جايا الماي, قۋراپ قالعان. ەندى بۇل قاتەلىكتەن ساباق الىپ, الداعى كوكتەمدە قالالىق پارككە جۋان, ون مەترلىك قايىڭدار وتىرعىزامىز. ارينە, بارلىق گۇلزارلاردى بىردەن قامتۋعا مۇمكىندىگىمىز جوق. بىراق, وسى باعىتتاعى جۇمىس جۇيەلى جۇرگىزىلەدى.
كەيدە ماعان «قالانى جاساندى كوگالداندىرۋعا قالاي قارايسىز؟» دەگەن ساۋال دا قويىلادى. جوعارىدا ايتتىم, اۋا رايىنا توزە الماعان اعاشتار جاپپاي قۋراپ قالعاندا جاساندى اعاشتار قويىلاتىن جاعدايلار بولادى. الايدا, مەن بۇعان قارسىمىن. اعاش ايىرىقشا ءسان بەرەتىن سۇزگى دەسەم دە بولادى. ول اينالاسىنا وتتەگىن بولەدى. سوندىقتان, تامىرىن توپىراققا ءسىڭىرىپ, وتىرعىزاتىن اعاشقا نە جەتسىن؟!
– اعاشتارعا زيان كەلتىرۋشىلەرمەن قالاي كۇرەسۋگە بولادى؟
– اسىرەسە, جاڭا جىل مەرەكەسى قارساڭىندا ءوسىپ تۇرعان اعاشتارعا جاساندى شامدار ءىلۋ وتە زياندى. ويتكەنى, تۇندە شامنىڭ قىزۋى اعاشتى جىلىتىپ, تاڭەرتەڭ ءسوندىرىپ تاستاعان كەزدە وسىمدىكتىڭ تامىرى سۋىقتان بىردەن قاتىپ قالادى. ءبىز بۇل جونىندە سان مارتە ماسەلە دە كوتەردىك. الايدا, اۋداندىق اكىمدىكتەر قالا كوشەلەرىن بەزەندىرۋ دەگەن جەلەۋمەن اعاشتارعا شام ءىلۋدى توقتاتپاي كەلەدى. بىراق, بۇل «استانا كوگالداندىرۋ قۇرىلىسى» اكتسيونەرلىك قوعامىنىڭ باقىلاۋىنا الىنعان نازارداعى ماسەلە.
ءبىر قۋانىشتىسى, مەنى استانالىقتاردىڭ قالا كوشەلەرىن كوگالداندىرىپ, جاسىل جەلەككە بولەگىسى كەلەتىن ىنتا-ىقىلاستارى قۋانتادى. تۇرعىنداردىڭ مۇنداي نيەتى باردا ءبىز جۇمىستى مىندەتتى تۇردە ودان ءارى جانداندىرا تۇسەمىز.
