كەشە الماتىداعى اباي اتىنداعى مەملەكەتتىك اكادەميالىق وپەرا جانە بالەت تەاترىندا قازاقستان جازۋشىلارىنىڭ كەزەكتى XV قۇرىلتايى ءوتتى.
جازۋشىلار وداعى – ەلىمىزدەگى ەڭ العاشقى جانە ەڭ ءىرى شىعارماشىلىق بىرلەستىكتەردىڭ ءبىرى. وداق مۇشەلەرىنىڭ ەلىمىزدىڭ مادەني ءومىرىنىڭ دامۋى مەن رۋحاني قۇندىلىقتاردى نىعايتۋعا, جاستاردى تاربيەلەۋ ىسىنە قوسىپ وتىرعان ۇلەسى مول. قۇرىلتايدى قازاقستان جازۋشىلار وداعى باسقارماسىنىڭ توراعاسى نۇرلان ورازالين اشتى. جيىنعا قر مادەنيەت جانە سپورت ءمينيسترى ارىستانبەك مۇحامەديۇلى قاتىسىپ, ەلباسى نۇرسۇلتان نازارباەۆتىڭ قۇتتىقتاۋىن وقىپ بەردى. قۇتتىقتاۋ حاتىندا مەملەكەت باسشىسى قازاقستان جازۋشىلار وداعىنىڭ حV قۇرىلتايىنىڭ جۇمىسىنا تابىس تىلەدى.
قۇرىلتايدا قازاقستان جازۋشىلار وداعى باسقارماسىنىڭ جاڭا قۇراماسىن, باسقارمانىڭ جاڭا توراعاسىن, باقىلاۋ-تەكسەرۋ كوميسسياسىن سايلاپ, اعالار القاسىنىڭ قۇرامىن بەكىتۋ قاراستىرىلعان.
تاۋەلسىزدىكتىڭ العاشقى كۇندەرىنەن باستاپ مەملەكەت تاراپىنان قالامگەرلەر نازاردان تىس قالعان ەمەس. بىلتىر قر مادەنيەت جانە سپورت مينيسترلىگى «مادەنيەت تۋرالى» زاڭعا كىتاپ شىعارۋ بولىگىندە ءتيىستى وزگەرتۋلەر مەن تۇزەتۋلەر ەنگىزدى. بۇل تۇزەتۋلەر تالاي جىلدار بويى شەشىمىن تاپپاي كەلە جاتقان قازاقستاندىق اۆتورلارعا قالاماقى تولەۋ ىسىنە قاتىستى. اتالعان زاڭ قولىنا قالام ۇستاعان جازۋشىلارعا بەرىلىپ جاتقان ۇلكەن مۇمكىندىك, جاڭا سەرپىلىس بولدى. سونداي-اق, ەلىمىزدىڭ وبلىستىق, اۋداندىق, قالالىق, اۋىلدىق كىتاپحانالارىن جاڭا كىتاپتارمەن قامتۋ ماقساتىندا 2017 جىلدان باستاپ كىتاپ تارالىمى 5000 داناعا دەيىن ۇلعايتىلىپ, قالاماقى بەرۋ پروتسەسى تۇبەگەيلى وزگەردى.
ءسويتىپ, ءسوز زەرگەرلەرى باس قوسقان جيىندا وداقتىڭ جاڭا توراعاسى سايلاندى. قالامگەرلەر بەلگىلى اقىن, مەملەكەتتىك سىيلىقتىڭ لاۋرەاتى ۇلىقبەك ەسداۋلەتتىڭ كانديداتۋراسىن ءبىراۋىزدان قولدادى. وداق توراعاسىنىڭ ورىنباسارى بولىپ مەرەكە قۇلكەنوۆ, باۋىرجان جاقىپ, باقىت بەدەلحان جانە اقبەرەن ەلگەزەك كەلدى.
ازامات ەسەنجول
