قازاقستان پرەمەر-ليگاسىنىڭ 29-تۋرىندا «استانا» فۋتبول كلۋبى سىرت الاڭدا قوستانايلىق «توبىل» كومانداسىمەن كەزدەسىپ, ناتيجەسىندە 1:1 ەسەبىمەن تەڭ تارقاستى.
ەۋروپا ليگاسىنىڭ 2-تۋرىندا چەحيالىق
«سلاۆيا» كلۋبىمەن كەزدەسكەننەن كەيىن ەلوردالىق كوماندانىڭ باس باپكەرى ستانيمير ستويلوۆ بۇل جولى ءبىراز ويىنشىلارىن دەمالدىرۋدى ءجون ساناپتى. نەگىزگى قۇرامنىڭ تولىق بولماۋى بىردەن سىر بەردى. الدىمەن ەسەپتى 33-مينۋتتا قوستانايلىقتار اشتى. بۇرىشتامادان بەرىلگەن دوپتى قوناقتاردىڭ قاقپاسىنا جاسۇلان مولداقاراەۆ جايعاستىردى.
الايدا الاڭ يەلەرىن العا تارتقان بۇل ەسەپ كوپكە ساقتالمادى. اراعا نەبارى سەگىز مينۋت سالىپ «استانا» قورعاۋشىسى دميتري شومكو ءوزىنىڭ مانەرىندە سول قاپتالدان بويلاي ەنىپ, «توبىلدىڭ» تورىن توپ ەتكىزدى. ول وسى گولىمەن كەزىندە چەمپيوندار ليگاسىندا «حيك» قاقپاسىنا سالعان تاماشا گولىن كەزدەيسوقتىق ەمەس ەكەنىن تاعى ءبىر دالەلدەگەندەي بولدى. ءبىرىنشى تايمداعى وسى ەسەپ ويىن سوڭىنا دەيىن وزگەرىسسىز قالدى.
وسىلايشا, «استانانىڭ» قپل-داعى 11 ماتچتىق جەڭىستى سەرياسى توقتادى. كوماندا 67 ۇپايمەن تۋرنير كەستەسىندە ەكىنشى ورىندا كەلەدى. ونىڭ الدىنا شىعىپ تۇرعان «قايرات» كومانداسى دا قوناقتا «ەرتىسپەن» تەڭ ويناپ, ۇپاي ءبولىستى. باستى قارسىلاسىنان ەكى-اق ۇپاي قالىپ تۇرعان ەلوردالىق كوماندانىڭ قوسىمشا ءۇش ويىنى بارىن ەسكەرسەك, الماتىلىقتاردى الدا دەپ ايتۋعا ءالى ەرتە.
ورىنبەك وتەمۇرات
