بيىل ەلورداداعى جەتىم بالالاردى جانە اتا-اناسىنىڭ قامقورلىعىنان ايىرىلعان بالالاردى باسپانامەن قامتاماسىز ەتۋ دەڭگەيى 8-8,5 پايىزعا دەيىن ۇلعايادى. كەشە ماجىلىستەگى ۇكىمەت ساعاتىنا قاتىسقان نۇر-سۇلتان قالاسى اكىمىنىڭ ورىنباسارى نۇرلان نۇركەنوۆ وسىنداي مالىمدەمە جاسادى.
رەسمي اقپارات بويىنشا بۇگىنگە دەيىن كەزەكتە تۇرعان باس قالاداعى جەتىم جانە اتا-اناسىنىڭ قامقورلىعىنان ايىرىلعان بالالاردىڭ 3,9 پايىزى عانا باسپاناعا قول جەتكىزگەن.
نۇرلان نۇركەنوۆ بيىل ەلوردادا حالىقتىڭ الەۋمەتتىك جاعىنان ءالسىز توپتارىنا جاتاتىن ازاماتتارعا 1641 پاتەر بەرىلەتىنىن حابارلادى. «بۇگىنگە دەيىن تۇرعىن ءۇيدىڭ كەزەگىندە تۇرعان جەتىم بالالاردىڭ 3,5-4 پايىزى باسپانا الدى. جىلدىڭ سوڭىنا دەيىن بۇل كورسەتكىشتى 8-8,5 پايىزعا دەيىن ۇلعايتامىز. الداعى جىلى تاپسىرىلاتىن پاتەرلەردىڭ سانىن 5 مىڭعا جەتكىزۋدى جوسپارلاپ وتىرمىز. ول كەزدە جەتىم جانە اتا-اناسىنىڭ قامقورلىعىنان ايىرىلعان بالالاردى باسپانامەن قامتاماسىز ەتۋ كورسەتكىشىن 10-11 پايىزعا ارتتىرامىز» دەپ ءتۇسىندىردى اكىم ورىنباسارى.
ول اتالعان ماسەلەنى ءبىر ساتتە تولىقتاي شەشۋ مۇمكىن ەمەستىگىن ءمالىم ەتتى. «ارينە, ءبىز بۇل ماسەلەنى ءبىر ساتتە تولىقتاي شەشە المايمىز. سەبەبى قازىرگى كەزدە باس قالادا ءۇيدىڭ كەزەگىندە 40 مىڭنان اسا ادام تۇرسا, سونىڭ ىشىندە جەتىم بالالاردىڭ سانى 4 مىڭنان اسادى. سول سەبەپتەن حالىقتىڭ تۇرمىسى تومەن توپتارىن باسپانامەن قامتاماسىز ەتۋ ماسەلەسىن شەشىپ, كەزەكتى جويۋ ماقساتىندا ءبىز الداعى 5 جىلعا ناقتى جوسپار جاسادىق. وسى جوسپاردىڭ كومەگىمەن ماسەلە تولىق شەشىلەدى» دەدى اكىم ورىنباسارى.
ۇكىمەت ساعاتىندا ەلىمىز بويىنشا 61397 جەتىم جانە اتا-اناسىنىڭ قامقورلىعىنان ايىرىلعان بالالاردىڭ ءۇي كەزەگىندە تۇرعانى تۋرالى اقپارات ايتىلدى. بيىل اتالعان توپقا جاتاتىندارعا بار-جوعى 518 پاتەر بەرىلگەن.
