توعىزىنشى عاسىردىڭ شەگىندە ەۋرازيانىڭ ۇلى دالاسى اۋماعىنان, بۇگىنگى باتىس قازاقستان جەرىنەن قوزعالعان كوش كارپات تاۋلارى قورشاعان جازىققا جەتىپ توقتادى. بۇل ايماقتا شاتىر تىگىپ, ءتۇتىن تۇتەتكەن حالىق ماجارستان مەملەكەتىن قۇردى. ءحىىى عاسىردا كودان حان باستاعان قۇمان قىپشاقتار سول وڭىرگە قونىپ, ەلگە ەل قوسىلدى. ەتنيكالىق بەلگىلەرى جاعىنان تۇركى ۇلتتارىنا جاقىن ماجار حالقى وسىلاي قالىپتاستى. وسى تاريحي فاكت قازاقستان مەن ماجارستان جۇرتى اراسىنداعى تۋىستىقتىڭ تامىرى تەرەڭدە ەكەنىن ايعاقتايدى. بۇعان قوسا, ەكى ەل 1992 جىلى ديپلوماتيالىق قارىم-قاتىناس ورناتتى. سودان بەرى قوس مەملەكەت ءتۇرلى سالاداعى بايلانىسىن ۇزبەي كەلەدى. ماجارستاننىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى اندراش بارانيمەن اڭگىمەمىزدى وسى جونىندە وربىتتىك.
ەكى ەلدىڭ قارىم-قاتىناسى تەرەڭدەي ءتۇستى
– اندراش مىرزا, جاقىندا قازاقستانعا ماجارستاننىڭ ۇلتتىق ەكونوميكا ءمينيسترى ميحاي ۆارگا باستاعان دەلەگاتسيا كەلىپ كەتتى. بۇل ساپاردىڭ قورىتىندىسى قانداي بولدى؟ ەكى ەلدىڭ قارىم-قاتىناسى جاڭا دەڭگەيگە شىعىپ, جاڭا ساپاعا كوتەرىلدى دەپ ايتا الامىز با؟
– قازاقستان مەن ماجارستان مەملەكەتتەرى اراسىندا تاريحي تامىرلاستىق بار. قازاقتاردىڭ دا, ماجارلاردىڭ دا وتكەنى كوشپەندى ومىردەن تۇرادى. قوس مەملەكەت تە ازاتتىق جولىندا تالاي كۇرەستەردى باستان وتكەرىپ, تاۋەلسىزدىك كەزەڭىندە سەنىمدى سەرىكتەستەرگە اينالىپ, ءوزارا جاقسى قارىم-قاتىناس ورناتا ءبىلدى. ماجارستاننىڭ ۇلتتىق ەكونوميكا ءمينيسترى ميحاي ۆارگانىڭ قازاقستانعا ساپارى ەكى ەلدىڭ قارىم-قاتىناسىن تەرەڭدەتە تۇسكەنى ءسوزسىز. ول باستاپ كەلگەن دەلەگاتسياعا 100-گە جۋىق ادام كىردى. ولاردىڭ اراسىندا مەملەكەتتىك مەكەمەلەردىڭ, مينيسترلىكتەردىڭ وكىلدەرى مەن بيزنەسمەندەر بولدى.
استانادا قازاقستان مەن ماجارستان تاراپتارىنىڭ قاتىسۋىمەن ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ V وتىرىسى, ۇلكەن بيزنەس فورۋم ۇيىمداستىرىلدى. سونداي-اق, ستراتەگيالىق كەڭەستىڭ العاشقى وتىرىسى ءوتتى. قازاقستان جاعىنان وعان سىرتقى ىستەر ءمينيسترى ەرلان ىدىرىسوۆ باسشىلىق جاسادى.
قازاقستاننىڭ پرەمەر-ءمينيسترى باقىتجان ساعىنتاەۆ ميحاي ۆارگانى قابىلدادى. مۇنىڭ ءبارى قازاقستان ماجارستانمەن ىنتىماقتاستىق ماسەلەسىنە ءمان بەرىپ قارايتىنىن ايتادى. ماجارستان دەلەگاتسياسىنىڭ قازاقستانعا ساپارى جانە ەكى ەل وكىلدەرىنىڭ وسىنداعى كەزدەسۋلەرى قوس ەلدىڭ قارىم-قاتىناسىنا سەرپىن بەرەتىنىنە سەنىمدىمىن.
– ماجارستان دەلەگاتسياسىنىڭ قازاقستانعا ساپارى بارىسىندا بىرقاتار ەكىجاقتى كەلىسىمدەرگە قول قويىلدى. قوس مەملەكەت قاي تاراپتاردا ىنتىماقتاستىقتى كۇشەيتكەلى وتىر؟
– ماجارستاننىڭ ۇلتتىق ەكونوميكا مينيسترلىگى مەن قازاقستاننىڭ دەنساۋلىق ساقتاۋ جانە الەۋمەتتىك دامۋ مينيسترلىگى اراسىندا حالىقتى جۇمىسپەن قامتۋ, دەنساۋلىق ساقتاۋ سالالارىندا بىرقاتار كەلىسىمدەر جاسالدى. سونىڭ ىشىندە ءدارى-دارمەك ءوندىرۋ مەن مەديتسينالىق قوندىرعىلاردى جاساۋ, مەديتسينالىق تۋريزم تۋرالى مەموراندۋمدارعا قول قويىلدى. سونداي-اق, قوس تاراپتىڭ بيزنەس وكىلدەرى دە بىرنەشە شارت جاساستى. اتاپ ايتساق, ماجارستان مەن قازاقستاننىڭ فارماتسەۆتيكالىق كومپانيالارى قاراعاندى قالاسىنداعى زاۋىتتا قازاقستاندىق ءدارى-دارمەك ءوندىرىسىن كەڭەيتۋ جونىندە كەلىسىمگە كەلدى. ماجارستان جاعى بۇل دارىلەردى ەۋروپا نارىعىندا ساتۋعا كومەكتەسەتىن بولدى. اتالمىش جوبانىڭ قۇنى 5 ميلليون دوللاردى قۇراپ وتىر. بۇعان قوسا, قازاقستاندا ماجارستان تەحنولوگياسىن نەگىزگە الىپ, مەديتسينالىق قوندىرعىلاردى شىعارۋ تۋرالى كەلىسىم جاسالدى.
قازاقستاننىڭ قارجى مينيسترلىگىنىڭ قازىناشىلىق كوميتەتى مەن ماجارستاننىڭ مەملەكەتتىك قازىناشىلىعى دا ءوزارا ارىپتەستىك جوسپارىنىڭ اياسىندا جوبالارىن تياناقتادى.
«قازاقستان تەمىر جولى» ۇلتتىق كومپانياسى مەن ماجارستاننىڭ «Rail Cargo Hungaria Zrt» كومپانياسى اراسىندا حالىقارالىق ينتەرمودالدىق تاسىمالداۋدى دامىتۋ تۋرالى وتە ماڭىزدى كەلىسىم جاسالدى. اتالمىش جوبا تەمىرجول نەمەسە تەڭىز ارقىلى, سونىمەن قاتار اۆتوكولىك جولىمەن جۇك تاسىمالداۋدى قاراستىرادى. ياعني, ترانسكاسپي ايماعىندا, ازيا – ەۋروپا – ازيا باعىتىندا تاسىمالداۋدى دامىتۋعا جول اشادى.
كەيكى باتىردىڭ بەت-بەينەسىن قالپىنا كەلتىرەدى
– جۋىردا وسىدان تۋرا ءجۇز جىل بۇرىنعى تورعاي دالاسىنداعى ۇلت-ازاتتىق كوتەرىلىس قاھارماندارىنىڭ ءبىرى – كەيكى باتىردىڭ باس سۇيەگى رەسەيدەن قازاقستانعا جەتكىزىلىپ, دنق ساراپتاماسىن جاساۋ جانە باس سۇيەكتى قالپىنا كەلتىرۋ ءۇشىن ماجارستانعا جونەلتىلدى. ماجارستاننىڭ قازاقستانداعى رەسمي وكىلى رەتىندە ءسىز دە بۇل ۇدەرىسكە قاتىستىڭىز. قازاق حالقىنا اسا ماڭىزدى بۇل وقيعا قالاي وربىگەنىن ءوز اۋىزىڭىزدان ەستىسەك.
– ەكى ەلدىڭ ساياسي جانە ەكونوميكالىق قارىم-قاتىناستان بولەك, سيمۆولدىق مانگە يە تاريحي جانە مادەني مۇرالارىن ساقتاۋ سالالارىندا ىنتىماقتاستىق ورناتقانىنا مەنىڭ كوڭىلىم مارقايادى. شىنىن ايتقاندا, قازاقستان ماجارستانعا قازاقتىڭ ۇلتتىق باتىرى دەڭگەيىندەگى تۇلعاعا قاتىستى ءىستى سەنىپ تاپسىرعانىنىڭ استارىندا قوس مەملەكەتتىڭ ءبىر-بىرىنە دەگەن قۇرمەتى جاتىر. كەيكى باتىرعا قاتىستى ماجارستاننىڭ جاراتىلىستانۋ عىلىمدارى مۋزەيىنىڭ انتروپولوگيالىق ءبولىمى اتقاراتىن جۇمىستى اسا ابىرويلى ءىس دەپ بىلەمىز. ءبىزدىڭ عالىمدارىمىز دنق ساراپتاماسىن جاساپ, ونىڭ نەگىزىندە باتىردىڭ بەت-بەينەسىن قالپىنا كەلتىرەدى.
وسى ءىستى قولعا الماس بۇرىن قازاقستانداعى بۇل ىسكە جاۋاپتى مەكەمەلەرمەن, قازاقستان رەسپۋبليكاسىنىڭ ماجارستانداعى ەلشىلىگىمەن تىعىز قارىم-قاتىناس جاسادىق. ماسەلەن, كەيكى باتىردىڭ باس سۇيەگىن قازاقستاننان شىعارىپ, ەۋروپالىق وداقتىڭ اۋماعىنا كىرگىزگەندە اكىمشىلىك كەدەرگىلەر تۋماس ءۇشىن تەحنيكالىق ماسەلەنى شەشۋ كەرەك بولدى. دالىرەك ايتساق, باتىردىڭ باس سۇيەگى تاريحي جادىگەر ەكەنىن دالەلدەيتىن انىقتاما جازىپ بەردىك. بۇل ءىس ماجارستاننىڭ الماتىداعى باس كونسۋلدىعىنىڭ ارالاسۋىمەن وڭ شەشىمىن تاپتى. قازاقستاننان ماجارستانعا تىكەلەي ۇشاتىن اۋە رەيستەرى جوق. سول سەبەپتەن كەيكىنىڭ باس سۇيەگى ىستانبۇل ارقىلى جونەلتىلدى. جوعارىداعى قۇجات سول ءۇشىن قاجەت بولدى. ال باتىردىڭ باس سۇيەگى بويىنشا اتقارىلاتىن جۇمىستىڭ ناتيجەسى قاراشانىڭ اياعىندا, جەلتوقسان ايىنىڭ باسىندا بەلگىلى بولۋى كەرەك.
– كەيكى باتىردىڭ باس سۇيەگىنە قاي عالىمدار ساراپتاما جاسايدى؟ وسى جاعىنان اقپاراتتى ناقتىلاپ بەرسەڭىز.
– باتىردىڭ باس سۇيەگىن ماجارستاندا بەلگىلى انتروپولوگ عالىم اندراش بيرو زەرتتەيدى. بۇل كىسى ماجار حالقىنىڭ شىققان ءتۇبىن جاڭعىرتۋ ماقساتىندا ەكى جىلدا ءبىر رەت ماجارستاندا وتەتىن قۇرىلتايدىڭ دا باس ۇيىمداستىرۋشىسى ەكەنىن ايتا كەتەيىن. وتكەن جازدا اتالمىش قۇرىلتاي كەزەكتى رەت ءوتىپ, وعان قازاقستاننان كەلگەن ۇلكەن دەلەگاتسيا قاتىسىپ كەتتى.
اندراش بيرو بيىلعى تامىز ايىنىڭ اياعى مەن قىركۇيەكتىڭ باسىندا الماتى وبلىسىندا سالت-ءداستۇردى ساقتاۋ ماقساتىن كوزدەگەن فەستيۆالدى دە ۇيىمداستىردى.
كۋمانيادا 300 مىڭعا جۋىق قۇمان قىپشاقتار تۇرادى
– ماجارستانداعى قۇرىلتاي ماسەلەسىن قوزعادىڭىز. ءحىىى عاسىردا ماجارستانعا بارعان قۇمان قىپشاقتاردىڭ تىنىس-تىرشىلىگىنەن دە حابار بەرسەڭىز.
– قازىرگى تاڭدا ماجارستانعا بارعان قۇمان قىپشاقتاردىڭ ۇرپاقتارى ۇلى كۋمانيا مەن كىشى كۋمانيا اتالاتىن ماجارستاننىڭ ەكى ورتالىق وبلىسىندا تۇرىپ جاتىر. ءارتۇرلى ساناقتار ولاردىڭ سانى 300 مىڭعا جۋىقتايتىنىن انىقتادى. ولارعا ورتاق استانا – قارساق قالاسى. ماجارستان ۇكىمەتىندە توعىز ءمينيستردىڭ ەكەۋى – اۋىل شارۋاشىلىعى ءمينيسترى شاندور فازەكاش پەن جوعارىدا اتى اتالعان ۇلتتىق ەكونوميكا ءمينيسترى ميحاي ۆارگا قىپشاقتار قونىستانعان ايماقتاردان شىققانىن قوسا كەتەيىن. شاندور فازەكاش ماجارستانداعى قۇمان قىپشاقتار وداعىنىڭ توراعاسى قىزمەتىن اتقارادى. ىلگەرىرەكتە بۇل كىسى قارساق قالاسىنىڭ مەرى دە بولعان.
– وسىدان ەكى جىل بۇرىن ماجارستاندا قازاق حالقىنىڭ ۇلى اقىنى ابايدىڭ ەسكەرتكىشى مەن استانا كوشەسى اشىلدى. جۋىردا ءسىز اباي ەلىنە بارىپ قايتقان ەكەنسىز. ساپاردان العان اسەرىڭىز قانداي بولدى؟
– قازاق ادەبيەتىندە ابايدىڭ الاتىن ۇلكەن ورنىن ەسەپكە الىپ, ول تىرشىلىك ەتكەن مەكەنگە بارىپ قايتۋدى وزىمە پارىز سانادىم. جيدەبايدىڭ اۋاسى ادامدى شىنىمەن ەرەكشە كۇيگە بولەيدى ەكەن. ونى مەن جان-جۇرەگىممەن سەزىندىم. ءبىر جاعىنان, سول جەر ەۋرازيا قۇرلىعىنىڭ كىندىگى سانالادى. بۇل كەزدەيسوقتىق ەمەس دەپ ويلايمىن. مۇندا ءبىر قۇپيا ءمان جاتقان سياقتى.
قازاق جانە ماجار تىلدەرىنىڭ گرامماتيكاسى وتە ۇقساس
– ءسىزدىڭ قازاق تىلىنەن ساباق الىپ جاتقانىڭىزدى ەستىدىك. بەلگىلى ءبىر دەڭگەيدە تىلىمىزدە سويلەۋدى ۇيرەنىپ تە قالعان شىعارسىز.
– قازاقستانعا كەلگەن ماجارستان دەلەگاتسياسىن قارسى الۋمەن بايلانىستى كەيىنگى ەكى اي كولەمىندەگى قاربالاس وعان مۇرشا بەرمەدى. ۋاقىتىم تىعىز بولىپ, ءتىل ساباقتارىن الا المادىم. الايدا قازىر ۇيرەنۋدى جالعاستىرىپ جاتىرمىن. كەلەسى جىلدىڭ كوكتەمىندە ءبىر ناتيجەگە جەتەمىن دەپ ويلايمىن. تىم قۇرىعاندا قازاق تىلىندە قىسقا سويلەمدەردى قۇراستىرۋعا شامام جەتەتىنىنە سەنەمىن. اقيقاتىن ايتقاندا, كەيبىر سوزدەردى تۇسىنەتىندەي جاعدايعا جەتتىم. سول ارقىلى سويلەمدەردىڭ ماعىناسىنا دا بويلاي تۇسۋدەمىن. نەگىزىنەن, قازاق جانە ماجار تىلدەرىنىڭ گرامماتيكاسى وتە ۇقساس. ماجار ءتىلى تۇركى تىلدەرى توبىنا جاتپاي, فين-ۋگور تىلدەرى قۇرامىنا كىرسە دە, سويلەمدەردى قۇراۋ قۇرىلىمى جاعىنان قازاق تىلىنە جاقىن. ماسەلەن, قازاقشا «استانادا» دەپ ايتىلسا, ماجارشا بۇل ماعىنانى «بۋداپەشتەن» ءسوزى بەرەدى. سونداي-اق, قازاقتار «تەلەفونىم» دەپ ايتسا, ماجارلار «تەلەفونوم» دەيدى. ەكى ءتىلدىڭ دە ايىرماشىلىعى ءبىر ارىپتە عانا. نەگىزىنەن, سىزدەردىڭ الىپبيلەرىڭىزدە 42 ءارىپ بولسا, بىزدە 44 ءارىپ بار.
عالىمدارىمىز وسمان يمپەرياسى جاۋلاپ العاننان بۇرىن ماجار تىلىنە تۇركى تىلىنەن 300-دەن اسا ءسوز ەنگەنىن انىقتادى. ماجارستان 150 جىل كولەمىندە, 1541-1686 جىلدار ارالىعىندا وسمان يمپەرياسىنىڭ بوداندىعىندا بولعانىن بىلەتىن شىعارسىزدار. الايدا كوپ سوزدەر وسماندىقتار جەرىمىزگە باسىپ كىرمەي تۇرعاندا-اق قولدانىسىمىزدا بولدى. ماسەلەن, الما, ساقال, بالتا, وتو – اكە. تۇستەردى ايتساق, ماجارشا – كەيك, قازاقشا – كوك, سارى ءتۇسىن ءبىز شارگو دەيمىز. بۇل مىسالدار ماجارلار مەن قازاقتاردىڭ جاقىندىعىن تاعى دالەلدەي تۇسەدى.
حالىقارالىق تۇركى اكادەمياسىنىڭ مۇرىندىق بولۋىمەن ماجار ەرتەگىلەرى مەن اڭىزدارى قازاق تىلىنە اۋدارىلىپ, كىتاپ بولىپ جارىق كوردى. كىتاپقا ەنگەن شىعارمالاردى ماجارستاننىڭ سەگەد ۋنيۆەرسيتەتىندە قازاق تىلىنەن ساباق بەرەتىن راۋشانگۇل مۇقىشەۆا ءتارجىمالادى. بۇل كىتاپتى وقىعان قازاقتار ماجارلار ولارعا تۋىسقان حالىق ەكەنىنە كوز جەتكىزىپ, ەكى ۇلتقا ورتاق ۇعىمداردى تابا الادى. ماسەلەن, بايتەرەك ماجار ەرتەگىلەرى مەن اڭىزدارىنىڭ نەگىزگى سيمۆولدارىنىڭ ءبىرى سانالادى. ءبىز ونى «اسپاندى توبەسىمەن سۇيگەن اعاش» دەپ اتايمىز. نەمەسە ماجارلاردا – تۋرۋ قۇسى, ال سىزدەردە – سامۇرىق. وسى كىتاپتى وقىپ-اق ەكى ەلدىڭ تامىرى ءبىر ەكەندىگىن اڭعارۋعا بولادى.
ماجارستاندا قۇسبەگىلىك, سونىڭ ىشىندە بۇركىتپەن اڭ اۋلاۋ سپورتى جاقسى دامىعانىن ايتا كەتەيىن. مەملەكەتىمىز – وسى سپورت تۇرىنەن ورتالىق ازيا چەمپيوناتتارىنا قاتىساتىن ەۋروپاداعى جالعىز مەملەكەت.
«بولاشاق ەنەرگياسى ءبىزدى بىرىكتىرەدى»
– كەلەسى جىلى استانادا ايتۋلى الەمدىك شارا – «ەكسپو-2017» حالىقارالىق مامانداندىرىلعان كورمەسى وتەدى. ماجارستان بۇل كورمەگە قاتىسۋدى راستاعان العاشقى مەملەكەتتەردىڭ وندىعىنا كىرەدى. بۇل تاراپتا قانداي جۇمىس جۇرگىزىلۋدە؟
– بۇگىنگى كۇنگە استانادا ورنالاساتىن ماجارستان پاۆيلونىنىڭ بىرنەشە جوباسى جاسالدى. الداعى ءبىر-ەكى اپتا ىشىندە قانداي جوبا تاڭدالاتىنى جونىندە ناقتى شەشىم شىعۋى ءتيىس. سودان سوڭ ديزاين ءبولشەكتەرى جاسالا باستايدى. پاۆيلوندى جابدىقتايتىن العاشقى مەملەكەتتەردىڭ قاتارىنا كىرەمىز دەپ ويلايمىن.
ناقتى دالەل ايتايىن: اپتا باسىندا «استانا ەكسپو-2017» ۇلتتىق كومپانياسى بەس مەملەكەتكە العاشقى پاۆيلونداردى تاپسىردى. ولاردىڭ اراسىندا ماجارستان پاۆيلونى دا بار. جالپى اۋدانى 411,9 شارشى مەتردى قۇرايتىن اۋماقتى قابىلداپ الدىق. پاۆيلون اتاۋى: «بولاشاق ەنەرگياسى ءبىزدى بىرىكتىرەدى». بۇل تاقىرىپ مەملەكەتىمىزدىڭ قولجەتىمدى ەنەرگيا كوزدەرىنىڭ گەوگرافيالىق, ەكونوميكالىق ەرەكشەلىكتەرىنە نەگىزدەلەدى. ماجارستان سۋ, كۇن جانە جەل ەلى بولىپ سانالادى. سوعان سايكەس پاۆيلونىمىز ەنەرگيانى جانە قالانى جوبالاۋ سالاسىنداعى ەڭ جاڭا قوندىرعىلارمەن تانىستىرادى.
قازاقستان دامۋ جاعىنان قاتتى العا وزدى
– الداعى جەلتوقساندا قازاقستان ءوزىنىڭ تاۋەلسىزدىگىنىڭ 25 جىلدىعىن اتاپ وتەدى. سونداي-اق, جەلتوقسان كوتەرىلىسىنىڭ 30 جىلدىعى دا سول ايدىڭ ەنشىسىندە. سىزدەر كەشە عانا ماجارستانداعى كەڭەس وداعى جۇيەسىنە قارسى كوتەرىلىستىڭ 60 جىلدىعىن اتاپ ءوتتىڭىز. وسى جاعىنان دا ەكى ەل اراسىندا ساباقتاستىقتى بايقايمىز. قازاقستانعا قىزمەتكە كەلگەلى ەلىمىز تۋرالى سىزدە قانداي پىكىر قالىپتاستى؟
– ماجارستان – قازاقستان تاۋەلسىزدىگىن مويىنداعان العاشقى مەملەكەتتەردىڭ ءبىرى. جەلتوقساندا ەلىڭىز تاۋەلسىزدىگىنىڭ 25 جىلدىعىن تويلاسا, سودان شامالى ۋاقىت وتكەن سوڭ, 2017 جىلدىڭ باس جاعىندا قازاقستان مەن ماجارستان اراسىندا ديپلوماتيالىق قارىم-قاتىناستىڭ ورناعانىنا دا شيرەك عاسىر تولادى. ماجارستاننىڭ قازاقستان رەسپۋبليكاسىنداعى تۇڭعىش ەلشىسى قىزمەتىن تانىمال تۇركىتانۋشى عالىم يوجەف تورما اتقاردى. قازاق تىلىندە تاماشا سويلەگەن بۇل كىسى قازاقستان مەن ماجارستان اراسىنداعى ديپلوماتيالىق قارىم-قاتىناستىڭ بەكۋىنە ۇلكەن ەڭبەك ءسىڭىردى.
ءبىر مەملەكەت ءۇشىن 25 جىل – ۇلكەن مەجە. مىسالى, وسى جىلدار ىشىندە دۇنيەگە كەلگەن ۇرپاق قازاقستاننىڭ تاۋەلسىزدىگىن قالىپتى قۇبىلىس رەتىندە قابىلدايدى. بۇل جاعدايعا ۇلكەن ءمان بەرۋىمىز كەرەك. سەبەبى ەستافەتانى قازىرگى جاستاردان قابىلداپ الاتىن كەلەسى ۇرپاق ازات رۋحتا ءوسىپ, جەتىلەدى.
قازاقستان 25 جىل ىشىندە دامۋ جاعىنان قاتتى العا وزدى. وسى ۋاقىت ارالىعىندا ۇلكەن جەتىستىكتەرگە جەتتىڭىزدەر. ءماسەلەن, ەكونوميكالارىڭىزدىڭ ءوسىمى 20 ەسەگە ارتىپتى. وسىنشاما جىلدار ارالىعىندا مۇنداي جەتىستىككە جەتكەن مەملەكەت بار ما, جوق پا, مەن بىلمەيمىن. قازاقستاندىقتاردى تاۋەلسىزدىكتىڭ مەرەيتويىمەن قۇتتىقتاپ, ەلدىڭ بۇدان دا زور جەتىستىكتەرگە جەتە بەرۋىنە تىلەكتەسپىن.
قازاقستانداعى جەلتوقسان كوتەرىلىسى مەن ماجارستاندا 1956 جىلدىڭ قازان ايىندا ورىن العان كوتەرىلىس اراسىنداعى ساباقتاستىقتى دۇرىس بايقادىڭىز. ەكى ەلدىڭ دە ازاتتىق اڭسارى عاسىرلاردىڭ قويناۋىنان تامىر تارتادى. بۇل جايت قوس مەملەكەتتىڭ اراسىندا ديپلوماتيالىق قارىم-قاتىناستىڭ اۋقىمىنان اساتىن بايلانىستىڭ بارىنا كوز جەتكىزە تۇسەدى. قازاقتار دا, ماجارلار دا ەركىندىكتى, بوستاندىقتى ەرەكشە ءسۇيىپ, اسا باعالايتىن رۋحى بيىك حالىقتار. ەكى ەل بۇل اسقاق رۋحتىڭ ارقاسىندا اقىرى دەگەنىنە جەتىپ, تاۋەلسىز مەملەكەتتەردىڭ قاتارىنا قوسىلدى. تاۋەلسىزدىگىمىز ماڭگى جاساي بەرسىن دەگىم كەلەدى.
– ايتقانىڭىز كەلسىن. مازمۇندى سۇحباتىڭىزعا راقمەت!
سۇحباتتاسقان:
امانعالي قالجانوۆ
