جۇرتتى جاقسىلىققا جۇمىلدىردى

پرەزيدەنتىمىز قاسىم-جومارت توقاەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا ءبىلىم مەن عىلىم سالاسىنا باسا ءمان بەرىلدى. بۇل ورتا ءبىلىم مەن جوعارى وقۋ ورىندارىندا ءبىلىم ساپاسىن جاقسارتۋ ماسەلەسى. وسىعان وراي جولداۋدا ورىندى سىندار ايتىلعان. ارينە, ول مەكتەپ قابىرعاسىنان وقۋشىلاردىڭ ساپالى ءبىلىم الماۋى بولىپ تابىلادى. بۇعان بىلىكتى پەداگوگتاردىڭ تاپشىلىعى, اسىرەسە اۋىلدى جەرلەردە ءبىلىمىن تولىقتىراتىن وقۋلىقتاردىڭ جەتىسپەۋشىلىگى نەمەسە ونداعى كەزدەسكەن ولقىلىقتاردىڭ بولۋى دا تىكەلەي اسەر ەتەدى. سوڭعى كەزدەردە الەۋمەتتىك جەلىلەردە مەكتەپتە وقىتىلاتىن وقۋلىقتاردا كەزدەسكەن كەمشىلىكتەر كوپشىلىكتىڭ قىزۋ تالقىسىنا الىنىپ, ءتۇرلى قوعامدىق پىكىرلەر تۋىنداعانى بەلگىلى. وسىعان وراي, جولداۋداعى ورتا ءبىلىم ساپاسىن كوتەرۋدە كاسىبي باعىت-باعدار بەرۋ ساياساتىنا كوشۋ, ساپالى وقۋلىقتارمەن قامتاماسىز ەتۋ جانە ءبىلىم بەرۋ دەڭگەيىندە دەربەس قارجىلاندىرۋ ءتارتىبىن ەنگىزۋ سياقتى مىندەتتەردى جۇزەگە اسىرۋدى جۇكتەۋى اسا ماڭىزدى. جولداۋداعى اۋىل بالالارىنا ەرەكشە كوڭىل ءبولىپ, دارىندى بالالاردى وتاندىق جانە شەتەلدىك وقۋ ورىندارىنا دايارلاۋدا جول كارتاسىن ازىرلەۋدى تاپسىرۋى دا وتە ورىندى.
پرەزيدەنتىمىز كورسەتكەندەي, وقۋعا تۇسە الماي قالعان جاستاردىڭ ارنايى ماماندىقتارىنىڭ جوقتىعىنان جۇمىسسىزدار قاتارىنا قوسىلىپ, ءتۇرلى قىلمىستىق ىستەرگە بارۋى جيىلەۋدە. سونىمەن قاتار وقۋ ورنىن ءبىتىرىپ, بىراق ماماندىعىمەن جۇمىسقا ورنالاسا الماعان جاستاردىڭ قاتارى كوبەيدى. ول ءۇشىن اسا قاجەتتى, تاپشى ماماندار دايارلاۋدى قولعا العان ماڭىزدى.
ەلىمىزدىڭ ەكونوميكاسىن, مادەنيەتىن كوتەرۋگە قاجەتتى ءبىلىمدى, بىلىكتى ماماندار دايارلاۋدا جوعارى وقۋ ورىندارىنداعى ءبىلىم ساپاسىن ارتتىرۋعا دا كوڭىل ءبولىنىپ, تالاپ كۇشەيتىلسە, سوڭعى كەزدەردە جىبەرىلىپ جاتقان كەمشىلىكتەر جويىلار ەدى. جولداۋداعى كوڭىلگە اسا قونىمدى قويىلعان مىندەتتەردىڭ اراسىندا الەۋمەتتىك جاعدايدى كۇشەيتۋ, ياعني وتباسى, بالا تاربيەسى, زورلىق-زومبىلىقتى تىيۋ, حالىق دەنساۋلىعىن جاقسارتۋ ماسەلەلەرى دە حالىقتىڭ ويىنان شىعىپ, وسى ىستە قولداۋ كورسەتىپ, ءبىر كىسىدەي جۇمىلادى دەپ ويلايمىن.