جىلدىڭ ۇزدىك سپورتشىلارى

ۇلتتىق وليم­پيادا كوميتەتى 2019 جىلدىڭ قورىتىندىسىن جاريالاپ, ۇزدىك سپورتشىلارعا «التىن سامعاۋ» جۇلدەسىن تاپسىردى.ۇزدىك سپورتشىلار ءداستۇر بو­يىنشا awards.olimpic.kz سايتىندا داۋىس بەرۋ ارقىلى انىقتالدى. «التىن سامعاۋ» سىيلىعى لاۋرەاتتارىن 820 مىڭ قازاقستاندىق تاڭدادى.
«جازعى سپورت تۇرلەرى بويىنشا ۇزدىك سپورتشى» اتاعىن بوكستان الەم چەمپيونى اتانعان ­بەكزات نۇرداۋلەتوۆ يەلەندى. ­بەكزات بيىل ەكاتەرينبۋرگتە وتكەن الەم بىرىنشىلىگىندە 81 كەلى سالماقتا جەڭىمپاز بولدى. ول جارتىلاي فينالدا الەمنىڭ ءتورت دۇركىن چەمپيونى, وليمپيادا ويىندارىنىڭ جەڭىمپازى, كۋبالىق لا كرۋستى ايقىن باسىمدىلىقپەن ۇتىپ ەستە قالدى. «قىسقى سپورت تۇرلەرى بويىنشا ۇزدىك سپورتشى» اتالىمىندا مانەرلەپ سىرعاناۋشى ەليزابەت تۇرسىنباەۆا توپ جاردى. ەليزابەت بيىل جاپونيادا وتكەن الەم بىرىنشىلىگىندە كۇمىس جۇلدەگەر اتاندى. ول 16 جاستان جوعارىلار اراسىندا «چەتۆەرنوي سالحوۆ» جاساعان تۇڭعىش سپورتشى بولدى. چيليدە وتكەن جاستار اراسىنداعى الەم چەمپيوناتىندا جۇلدەگەر اتانعان كاراتەشى ءابىلمانسۇر باتىرعالي «جىلدىڭ ەڭ جاس ۇزدىك سپورتشىسى» اتاندى. «جىلدىڭ ۇزدىك كومانداسى» اتاعىنا شايبالى حوككەيدەن قازاقستان ۇلتتىق قۇراماسى لايىقتى دەپ تانىلدى. بيىل قازاقستان حوككەيشىلەرى الەم بىرىنشىلىگىنىڭ ا توبىنداعى ءبىرىنشى ديۆيزيوندا جەڭىمپاز اتانىپ, الەم چەمپيوناتىنىڭ ەليتالىق توبىنا شىقتى.
«التىن سامعاۋ» جۇلدەسىنە بيىلدان باستاپ جاڭا نوميناتسيا قوسىلدى. «پاراليمپيادا سپورتىنىڭ ۇزدىك سپورتشىسى» اتاعى نۇرلان دومبايعا بەرىلدى. نۇرلان بيىل پارا­تاەكۆوندو سپورتىنان وتكەن الەم بىرىنشىلىگىندە چەمپيون اتانعان.ۇلتتىق وليمپيادا كوميتەتىنىڭ پرەزيدەنتى ­تيمۋر قۇلىباەۆ «قازاقستان سپورتىنىڭ جەتىستىگى» ارنايى سىيلىعىن اتاقتى جەلاياق ءامين تۇياقوۆقا سالتاناتتى جاعدايدا تابىس ەتتى. جىل بويى حالىقارالىق جارىستاردا ەل نامىسىن ابىرويمەن قورعاعان ۇزدىك سپورتشىلاردى پرەمەر-مينيستر اسقار مامين, مادەنيەت جانە سپورت ءمينيسترى اقتوتى رايىمقۇلوۆا, نۇر-سۇلتان قالاسىنىڭ اكىمى ­التاي كولگىنوۆ, ەڭبەك ەرى جاقسىلىق ­ۇشكەمپىروۆ, اتاقتى سپورتشىلار ­ولگا ­شيشيگينا, ­قۇرالبەك ­ورداباەۆ, گيۋزەل ­مانيۋروۆا جانە باسقالارى ماراپاتتادى.
الداعى 2020 جىل – وليمپيادا جىلى. تورتكۇل دۇنيەنىڭ ءدۇبىرلى دوداسى جاپونيا استاناسى توكيودا وتەدى. بايراقتى باسەكەدە قازاقستان سپورتشىلارى ەل نامىسىن ابىرويمەن قورعايدى دەپ سەنىممەن قارايمىز.