«جىلقى جىلى» ەستەلىك مونەتاسى اينالىمعا شىقتى
قازاقستان رەسپۋبليكاسىنىڭ ۇلتتىق بانكى الداعى جىلقى جىلىنا وراي نومينالى 500 تەڭگەلىك التىن جانە كۇمىس ەسكەرتكىش مونەتالارىن اينالىمعا شىعاردى.
«شىعىس كۇنتىزبەسى» توپتاماسىمەن شىعارىلعان مونەتالار 12 قىرلى, بەت جاعىندا جۇلدىزدار شوعىرىنىڭ ميفولوگيالىق سيمۆولدارى بەينەلەنگەن جانە قۇرامى مەن سالماعى كورسەتىلگەن. ال سىرت جاعىندا 2014 جىلدىڭ سيمۆولى – جىلقى بەينەلەنگەن جانە قازاقستان تەڭگە سارايىنىڭ تاۋار بەلگىسى تاڭبالانعان. مونەتانى اينالدىرا جالپاق كۇڭگىرت جيەك جۇرگىزىلگەن, ۇستىندە «2014» دەگەن جازۋى بار قاۋسىرما ورنالاسقان.
31,1 گرامم كۇمىستەن قۇيىلعان تيىن 5 مىڭ دانامەن تارالسا, 7,78 گرامدىق التىن مونەتا 3 مىڭ دانامەن شىعىپ وتىر.
«Proof» ساپاسىنا ساي ەسكەرتكىش مونەتالار كوللەكتسيالىق قۇنى بويىنشا ساتۋعا ارنالعان. ولار كادەسىيلىق وراۋمەن شىعارىلادى جانە قازاقستان رەسپۋبليكاسى ۇلتتىق بانكىنىڭ مەملەكەتتىك, ورىس جانە اعىلشىن تىلدەرىندەگى ءنومىرلىك ساپا سەرتيفيكاتىمەن قوسا بەكىلەدى.
مونەتالاردى قازاقستان رەسپۋبليكاسى ۇلتتىق بانكىنىڭ بارلىق فيليالدارىندا ساتىپ الۋعا بولادى.
قىمبات نۇرعالي