قىسى قىتىمىر, جازى اپتاپ كليماتتى قالادا تۇرعىندار ءۇشىن ەڭ قاجەت دۇنيە – جىلى ايالدامالار سالۋ ءىسىن قالا باسشىلىعى قولعا العالى دا بىرنەشە جىلدىڭ ءجۇزى بولدى. ولاردىڭ سانىنىڭ كوبەيىپ كەلە جاتقانى تۇرعىنداردى, اسىرەسە قارتتاردى قۋانتادى. الىپ قالانىڭ بارلىق كوشەسىندەگى اۆتوبۋس ايالدامالارىنا جىلى تۇراق سالۋ بۇگىنگى تاڭدا مۇمكىن ەمەس ەكەنى دە تۇسىنىكتى.
سوندىقتان ءاربىر جىلى ايالدامانىڭ اۋەلگى كەزەكتە حالىقتىڭ كوپ جۇرەتىن, الدەنەشە باعىتتىڭ اۆتوبۋستارى توعىساتىن, قالا بەردى 20-30 مينۋت كۇتۋگە تۋرا كەلەتىن جيىلىگى الىس باعىتتاعى اۆتوبۋستار توقتايتىن نۇكتەلەرگە سالىنۋىنىڭ ماڭىزى زور ەكەنى بەلگىلى. ماسەلەن, قارتتارىمىزدىڭ كوپ باراتىن جەرلەرى – قالاداعى ەمحانالار, دياگنوز, وڭالتۋ ورتالىقتارى, حالىققا قىزمەت كورسەتۋ ورىندارى, ت.ب. وسىنداي ماڭىزدى نىساندارعا جاقىن ايالدامالاردى جىلى تۇراقپەن قامتاماسىز ەتۋگە باسا نازار اۋدارىلسا, كوپشىلىككە جاسالاتىن قامقورلىقتىڭ ءبىر پاراسى بولارى انىق.
كۇن سايىن ءوسىپ, قاناتىن كەڭگە جايىپ كەلە جاتقان قالامىزدا كەشەگى الىس كورىنەتىن نازارباەۆ ۋنيۆەرسيتەتى ايالداماسى «ەكسپو-17» كورمەسىنەن كەيىن ءىرى ورتالىققا اينالدى. مۇندا, مىڭداعان ستۋدەنتتەرىنەن سىرت, «ەكسپو-17» قالاشىعىنداعى ءتۇرلى كورمەلەر, دۇكەن, داياشىلىق ورىندارىن ارالايتىن تۇرعىندار مەن شەتەلدىك قوناقتار كۇندەلىكتى سابىلىپ جاتادى. ادامدار كوپتەپ تاماشالايتىن «بايتەرەكتەن» كەيىنگى ەكىنشى نىسان «ەكسپو-17» كورمەسىنىڭ شار عيماراتىن ارالاۋ اركىمگە تاڭسىق. مۇنىڭ سىرتىندا نازارباەۆ ۋنيۆەرسيتەتىنىڭ ماڭى توعىز جولدىڭ تورابىنا اينالدى. بۇرىنعى اۋەجاي, عارىش ورتالىعى, قالالىق №2 اۋرۋحانا سياقتى كەشەندى ورتالىقتار باعىتىنا قاتىنايتىن ونعا تارتا باعىتتاعى اۆتوبۋستاردىڭ سىرتىندا قالا ماڭىنداعى قابانباي, قوسشى, تايتوبە اۋىلدارىنا, «لەسنايا پوليانا» ىقشام اۋدانىنا قاتىنايتىن №301, 302, 303, 308, 320 سياقتى بەس باعىتتىڭ اۆتوبۋس جاڭادان اشىلدى. تەك قوسشى اۋىلى مەن «لەسنايا پوليانا» ىقشام اۋدانىندا قالادا قىزمەت ىستەيتىن ادامنىڭ كوپتىگىن قالا قۇرامىنا كىرگەن ۇلكەن اۋىل – قاراوتكەلگە قاتىنايتىن اۆتوبۋستاردىڭ سانىمەن, جيىلىگىمەن سالىستىرۋ ارقىلى-اق اڭعارۋعا بولادى. وسى باعىتقا قاتىنايتىن اۆتوبۋستاردىڭ بارلىعى نازارباەۆ ۋنيۆەرسيتەتى ايالداماسى ارقىلى وتەدى. مىنە, وسىنداي نۇر-سۇلتان قالاسى دەسە الدىمەن ويعا ورالاتىن جىلى ايالداما تۇگىل, gps تابلوسى, ءتىپتى جولدىڭ وڭ قاپتالىنداعى ايالدامادا وتىراتىن ورىندىق تا جوق. كورمە, دۇكەن ارالاپ, تاباندارىنان تاۋسىلىپ كەلگەن ادامدار اۆتوبۋستىڭ كەلۋىن تىكەسىنەن تىك تۇرىپ كۇتەدى. ونىڭ ۇستىنە, جوعارىدا اتالعان ءتۇرلى باعىتقا جۇرەتىن اۆتوبۋستاردىڭ كەيبىرىنىڭ ينتەرۆالى تىم ۇزاق. ءتىپتى №302, 308, 320 باعىتىنداعى اۆتوبۋستاردى ساعاتتاپ كۇتۋگە تۋرا كەلەدى. ەندەشە كەز كەلگەن ايالداماعا سالىنىپ جاتقان جىلى تۇراقتى نازارباەۆ ۋنيۆەرسيتەتى الدىنا نەگە سالماسقا, gps تابلوسىن نەگە ورناتپاسقا؟! وسى قابانباي باتىر داڭعىلىنداعى نازارباەۆ ۋنيۆەرسيتەتى الدىنا جىلى ايالداما سالىنسا, باسشىلىقتىڭ, داياشىلىق, قىزمەت كورسەتۋ ورىندارىنىڭ حالىقتىڭ تۇرمىس جاعدايىمەن ساناسۋىنىڭ ءبىر دالەلى بولار ەدى.
بوداۋحان توقانۇلى,
قوسشى اۋىلىنىڭ تۇرعىنى
